ជាតិ
សង្គមជាតិ
កម្ពុជានឹងរងឥទ្ធិពលខ្លះពីព្យុះដែលអាចកើតពី២៥-២៧នៅមហាសមុទ្រប៉ាស៊ីហ្វិកក្នុងឆ្នាំនេះ
× កម្ពុជានឹងរងឥទ្ធិពលខ្លះ ពីព្យុះដែលអាចកើតមានប្រមាណពី២៥ទៅ២៧ព្យុះ នៅមហាសមុទ្រប៉ាស៊ីហ្វិក ក្នុងរដូវវស្សា ឆ្នាំ២០១៦នេះ។ ព្យុះនេះ ក៏នឹងមានឥទ្ធិពលខ្លះមកលើប្រទេសកម្ពុជា។ នៅក្នុងសេចក្តីជូនដំណឹងរបស់ក្រសួងធនធានទឹក រដូវវស្សា នៅឆ្នាំ២០១៦នេះ នឹងចាប់ផ្តើមនៅសប្តាហ៍ទី១ នៃខែឧសភា និងបញ្ចប់នៅពាក់កណ្តាលខែវិច្ឆិកា។
យោងតាមការព្យាករណ៍អាកាសធាតុបច្ចុប្បន្ន នៅមហាសមុទ្រប៉ាស៊ីហ្វិក អាចនឹងកើតមានព្យុះពី២៥ទៅ២៧ព្យុះ ក្នុងរដូវវស្សា ឆ្នាំ២០១៦នេះ។ កម្ពុជា ក៏នឹងរងឥទ្ធិពលខ្លះ ពីព្យុះនេះដែរ។ បើតាមសេចក្តីជូនដំណឹងរបស់ក្រសួងធនធានទឹក ក្នុងរដូវវស្សាឆ្នាំ២០១៦នេះ នៅមហាសមុទ្រប៉ាស៊ីហ្វិក អាចនឹងមានព្យុះកើតឡើងពី២៥-២៧ព្យុះ ហើយធ្វើដំណើរចូលមកសមុទ្រចិនខាងត្បូងមានចំនួនច្រើន មានឥទ្ធិពលខ្លាំង។
លោក អ៊ុំ រីណា ប្រធាននាយកដ្ឋានឧតុនិយមនៃក្រសួងធនធានទឹក និងឧតុនិយម បានពន្យល់ប្រាប់សារព័ត៌មានថ្មីៗថា ព្យុះដែលអាចនឹងកើតមាននៅមហាសមុទ្រប៉ាស៊ីហ្វិកនោះ មិនមែនសុទ្ធមានឥទ្ធិពលមកខ្យល់កម្ពុជាទាំងអស់នោះទេ។ លោកថា៖ «នេះគ្រាន់តែការព្យាករណ៍ទុកមុន ហើយវិធីសាស្ត្រនៃការព្យាករណ៍មានច្រើន ដូច្នេះវាមិនអាចជាក់លាក់មួយរយភាគរយទេ។ មហាសមុទ្រប៉ាស៊ីហ្វិក នៅឆ្ងាយហើយខ្លះជាកូនព្យុះ វាមិនមកដល់កម្ពុជានោះទេ»។
សេចក្តីជូនដំណឹងដដែល ក៏បានបញ្ជាក់ដែរថា បាតុភូតផ្គរ រន្ទះ និងខ្យល់កន្ទ្រាក់ នៅតែមានឥទ្ធិពលខ្លាំងរហូត ដល់ចុងខែមិថុនា។ ចំណែកឯស្ថានភាពទូទៅនៃរបាយទឹកភ្លៀងនៅរដូវវស្សាឆ្នាំ២០១៦នេះ អាចធ្លាក់ទាបជាងមធ្យមភាគច្រើនឆ្នាំ ចាប់ពីដើមរដូវ ដល់ពាក់កណ្តាលរដូវ ខណៈចាប់ពីពាក់កណ្តាលរដូវ ដល់ចុងរដូវ៖ បរិមាណទឹកភ្លៀងអាចធ្លាក់ខ្ពស់ជាងមធ្យមភាគច្រើនឆ្នាំ។
បើតាមក្រសួងធនធានទឹក នៅតំបន់មាត់សមុទ្រ ខ្យល់មូសុងនីរតី ឬរដូវវស្សានឹងចាប់ផ្តើមនូវសប្តាហ៍ទី២នៃខែឧសភាៈ ចាប់ពីឧសភា ដល់ខែកក្កដា របាយ និងបរិមាណទឹកភ្លៀងមានពីមធ្យម ទៅបង្គួរ ហើយចាប់ពីខែសីហា ដល់ខែវិច្ឆិកា របាយ និងបរិមាណទឹកភ្លៀងមានពីបង្គួរទៅច្រើន។
«តំបន់ទំនាបកណ្តាល ខ្យល់មូសុងនីរតី ឬរដូវវស្សានឹងចាប់ផ្តើមនូវសប្តាហ៍ទី២នៃខែឧសភា។ ស្ថានភាពទឹកភ្លៀងមានពីតិច ទៅមធ្យម ចាប់ពីឧសភា ដល់ខែកក្កដា លើកលែងតែបណ្តាខេត្តនៅក្រោយជួរភ្នំក្រវាញដូចជាតាកែវ និងកំពង់ស្ពឺ និងផ្នែកខាងលិចនៃខេត្តកណ្តាល របាយ និងបរិមាណទឹកភ្លៀង មានតិចជាងបណ្តាខេត្តដទៃទៀត។ ចំណែកចាប់ពីខែសីហា ដល់ខែវិច្ឆិកា របាយ និងបរិមាណទឹកភ្លៀងមានពីបង្គួរទៅច្រើន»។ នេះបើតាមសេចក្តីជូនដំណឹងដដែល ដែលបញ្ជាក់បន្តថា ខ្យល់មូសុងនិរតី ឬរដូវវស្សា នៅតំបន់ខ្ពង់រាប នឹងចាប់ផ្តើមនៅសប្តាហ៍ទី៤ នៃខែឧសភា។ ចាប់ពីឧសភា ដល់ខែកក្កដា របាយ និងបរិមាណទឹកភ្លៀងមានពីតិច ទៅមធ្យម។ ចំណែកចាប់ពីខែសីហា ដល់ខែវិច្ឆិកា របាយ និងបរិមាណទឹកភ្លៀងមានពីបង្គួរទៅច្រើន។
បើតាមសេចក្តីជូនដំណឹងដដែល រដូវវស្សាឆ្នាំ២០១៦ នឹងបញ្ចប់នៅពាក់កណ្តាលខែវិច្ឆិកា ខណៈកូនរដូវប្រាំង អាចនឹងកើតឡើងមានរយៈពេលខ្លីក្នុងសប្តាហ៍ទី៣ និងទី៤ នៃខែកក្កដានៅបណ្តាខេត្តភាគខាងលិចជួរភ្នំក្រវាញ ដូចជាខេត្តតាកែវ កំពង់ស្ពឺ និងខេត្តកណ្តាលភាគខាងលិច៕
Tag:
អ៊ុំ រីណា
អាកាសធាតុ
© រក្សាសិទ្ធិដោយ thmeythmey.com