ជាតិ
សង្គមជាតិ
សម្តេច ហ៊ុន សែន ស្នើព្រះមហាក្សត្រតែងតាំងលោក ឡុង ឌីម៉ង់ ជំនួសលោក ស៊ុត ឌីណា
× ភ្នំពេញ៖ សម្តេច ហ៊ុន សែន បានស្នើព្រះមហាក្សត្រតែងតាំងលោក ឡុង ឌីម៉ង់ អ្នកនាំពាក្យសាលារាជធានីភ្នំពេញ ជាឯកអគ្គរាជទូតវិសាមញ្ញ និងពេញសមត្ថភាពខ្មែរ ប្រចាំសាធារណរដ្ឋកូរ៉េ ជំនួសលោក ស៊ុត ឌីណា នៅថ្ងៃទី៨ ខែមេសា ឆ្នាំ២០១៦នេះ។
យោងតាមលិខិតទូលថ្វាយព្រះករុណាព្រះបាទ នរោត្តម សីហមុនី ចុះថ្ងៃទី៨ ខែមេសានេះ សម្តេច ហ៊ុន សែន បានសរសេរថា៖«យោងតាមតម្រូវការការងារចាំបាច់របស់រាជរដ្ឋាភិបាលអាណត្តិទី៥ នៃរដ្ឋសភា ទូលព្រះបង្គំជាខ្ញុំ សូមក្រាបបង្គំទូលស្នើសុំព្រះករុណាជាអម្ចាស់ជីវិតលើត្បូង សូមទ្រង់ព្រះមេត្តាប្រោសព្រះរាជទានបញ្ចប់ភារកិច្ចឯកឧត្តម ស៊ុត ឌីណា ពីឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជា ប្រចាំសាធារណរដ្ឋកូរ៉េ និងស្នើសុំតែងតាំងលោក ឡុង ឌីម៉ង់ ជាឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជា ប្រចាំសាធារណរដ្ឋកូរ៉េជំនួសវិញ»។
សម្តេច សរសេរបន្តថា៖«សេចក្តីដូចបានក្រាបបង្គំទូលថ្វាយខាងលើ សូមព្រះករុណាជាអម្ចាស់ ជីវិតលើត្បូងជាទីសក្ការៈទ្រង់ព្រះរាជតម្រិះលើសេចក្តីស្នើសុំខាងលើ ដោយព្រះទ័យអនុគ្រោះបំផុត»។
លោក ឡុង ឌីម៉ង់ បានប្រាប់សារព័ត៌មានថ្មីៗ មុននេះបន្តិច ថា លោកទទួលបានព័ត៌មានថា សម្តេចនាយកដ្ឋមន្ត្រី ហ៊ុន សែន បានស្នើព្រះមហាក្សត្រតែងតាំងរូបលោក តាមរយៈសារព័ត៌មានដែរ។ កូនប្រុសលោក ឡុង វីសាលោ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិរូបនេះ ប្តេជ្ញាថា ប្រសិនបើព្រះមហាក្សត្រតែងតាំងលោកជាអគ្គរាជទូតខ្មែរប្រចាំ ប្រទេសកូរ៉េខាងត្បូងនោះ លោកនឹងបំពេញការងារអស់ពីកម្លាំងកាយ និងកម្លាំងចិត្ត បម្រើព្រះមហាក្សត្រ រដ្ឋាភិបាល និងប្រជាជន ដើម្បីផលប្រយោជន៍ជាតិ។
Tag:
ឡុង ឌីម៉ង់
ស៊ុត ឌីណា
© រក្សាសិទ្ធិដោយ thmeythmey.com