សមាគមចុងភៅប្រកាសរកអ្នកចូលរួមប្រកួតធ្វើនំផ្លែអាយ

ជាតិ

សមាគមចុងភៅប្រកាសរកអ្នកចូលរួមប្រកួតធ្វើនំផ្លែអាយ

11, Apr 2016 , 2:54 pm

រូបភាព

សកម្មភាព បង្រៀនធ្វើនំផ្លែអាយនៅព្រឹកថ្ងៃទី១១ មេសានេះ

ដោយ: អុីសា រ៉ហានី (Isa Rohany)

សៀមរាប៖ សមាគមចុងភៅកម្ពុជា ដែលសហការរៀបចំកម្មវិធីបង្អែមនៃក្តីស្រឡាញ់ក្នុងព្រឹត្តិការណ៍អង្គរសង្ក្រាន្តឆ្នាំ២០១៦ បានប្រកាសជ្រើសរើសសាធារណជនទូទៅ ដើម្បីចូលរួមប្រកួតធ្វើនំផ្លែអាយ។ កម្មវិធីប្រកួតនេះ នឹងធ្វើឡើងក្នុងបរិវេណភូមិបង្អែមនៃក្តីស្រឡាញ់ ដែលមានទីតាំងនៅជាប់ទីសក្ការព្រះអង្គចេក ព្រះអង្គចម ឫមុខព្រះរាជដំណាក់។

ប្រធានសមាគមចុងភៅកម្ពុជា លោក ឡុង បូរ៉ា បានប្រកាសពីការប្រកួតធ្វើនំផ្លែអាយ។ លោក បូរ៉ា បានប្រកាសរកអ្នកចូលរួមធ្វើនំផ្លែអាយនៅព្រឹកថ្ងៃទី១១ មីនានេះ នៅពេលដែលលោកកំពុងបង្រៀនពីការធ្វើនំនេះ ដល់អ្នកចូលរួមនៅក្នុងភូមិបង្អែមនៃក្តីស្រឡាញ់ ប្រមាណ ៣០នាក់។ លោកបញ្ជាក់យ៉ាងដូច្នេះថា៖« យើងបើកទូលាយសម្រាប់សាធារណជន ដែលចង់ប្រកួត។ ការប្រកួតចាប់ពីថ្ងៃទី១៣ ដល់១៦ ពីម៉ោង ៣រសៀលតទៅ»។

បើតាមប្រធានសមាគមចុងភៅ សាធារណជនទាំងអស់អាចដាក់ពាក្យចូលរួមប្រកួតបាន នៅភូមិបង្អែមនៃក្តីស្រឡាញ់ចាប់ពីពេលនេះតទៅ ហើយការប្រកួតតម្រូវឲ្យមានសមាជិក៣នាក់។ ក្នុងមួយប្រកួតគឺមាន ៥ក្រុម និងត្រូវប្រើពេលចំនួន៣០នាទី ដើម្បីប្រជែងធ្វើនំផ្លែអាយឲ្យបានច្រើនជាងគេ។ ក្រុមណាដែលធ្វើនំផ្លែអាយបានច្រើនជាងគេ នឹងទទួលបានចំណាត់ថ្នាក់លេខមួយ។

គួរបញ្ជាក់ថា កម្មវិធីបង្អែមនៃក្តីស្រឡាញ់ គឺជាកម្មវិធីមួយថ្មីក្នុងព្រឹត្តិការណ៍អង្គរសង្ក្រាន្ត។ កម្មវិធីនេះ នឹងធ្វើនំផ្លែអាយ និងនំបាយត្រៀប ដើម្បីចែកជូនដល់សាធារណជន ទាំងភ្ញៀវជាតិ និងអន្តរជាតិចូលរួមពិសារដោយឥតគិតថ្លៃ។ ការចែកជូន គឺចាប់ពីថ្ងៃទី១៣ ដល់ថ្ងៃទី១៦ មេសា ពីម៉ោង៩ព្រឹក ដល់ម៉ោង៥ល្ងាច។ អ្នករៀបចំកម្មវិធីនេះបញ្ជាក់ថា វត្ថុធាតុដើម ដែលបានត្រៀមក្នុងការរៀបចំកម្មវិធីនេះ រួមមាន អង្ករដណ្តើប១០០០គីឡូក្រាម ម្សៅដណ្តើប១០០០គីឡូក្រាម ស្ករផែន ៥០០គីឡូក្រាម ស្ករត្នោត ៥០០គីឡូក្រាម ខ្ទិះដូង មួយពាន់លីត្រ ដូងទុំ ២០០ផ្លែ និងល្ងចំនួន ៣០ គីឡូក្រាម៕