ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
អត្ថបទពាណិជ្ជកម្ម
បទយកការណ៍/សម្ភាស
ជាតិ
សង្គមជាតិ
២០ឆ្នាំក្រោយមក អតីតសិស្សវិទ្យាល័យក្រឡាញ់ រួមគ្នាធ្វើពិធីរំលឹកគុណគ្រូរបស់ខ្លួន
11, Apr 2016 ,
3:50 pm
រូបភាព
×
ដោយ:
រួបរួម
«សិស្សល្អ រង់ចាំ២០ឆ្នាំដើម្បីតបសងគុណគ្រូ ក៏មិនហួសពេលនោះដែរ»។ នេះជាទស្សនៈរបស់អតីតសិស្សនៅវិទ្យាល័យក្រឡាញ់ ខេត្តសៀមរាប ដែលបានប្រមូលផ្តុំគ្នាជាលើកដំបូងដើម្បីរៀបចំពិធីបុណ្យ «រំលឹកគុណ» ដល់អតីតគ្រូបង្រៀនរបស់ខ្លួន កាលពីថ្ងៃទី៩ ខែមេសា នៅមុនពិធីបុណ្យចូលឆ្នាំថ្មី ប្រពៃណីជាតិ។
ក្រោមការផ្តួចផ្តើមគំនិត និងរៀបចំអស់រយៈពេលជាច្រើនខែរបស់លោក ហូ រិទ្ធី និងមិត្តរួមជំនាន់ មុនជំនាន់ និងក្រោយជំនាន់របស់ខ្លួន កាលពីប្រមាណ២០ឆ្នាំមុននោះ ពិធីបុណ្យរំលឹកគុណគ្រូនៅវិទ្យាល័យក្រឡាញ់ ដែលមានចម្ងាយជាង៥០គីឡូម៉ែត្រ ពីទីរួមខេត្តសៀមរាប បានដំណើរការទៅយ៉ាងរលូន កាលពីថ្ងៃទី៩ ខែមេសា ឆ្នាំ២០១៦ ។
ជាលើកដំបូងបំផុតដែលអតីតគ្រូបង្រៀន និងអតីតសិស្ស បានជួបជុំគ្នាទ្រង់ទ្រាយធំនៅបរិវេណវិទ្យាល័យក្រឡាញ់ បន្ទាប់ពីពួកគាត់បានបែកគ្នាអស់រយៈពេលយ៉ាងហោចណាស់ពី១០ឆ្នាំទៅ២០ឆ្នាំ។ គ្រូបង្រៀនជាច្រើនបានក្លាយជានិវត្តជន ខណៈអតីតសិស្សដែលធ្លាប់បានក្រេបជញ្ជក់យកចំណេះដឹងពីពួកគាត់ សុទ្ធតែមានអាជីវកម្ម និងការងារនៅទីកន្លែងផ្សេងៗគ្នា។
លោក គឹម ប៊ុនថាន់ តំណាងអតីតសិស្សម្នាក់នៅវិទ្យាល័យក្រឡាញ់ បានអះអាងប្រាប់សារព័ត៌មានថ្មីៗថា ពិធីបុណ្យរំលឹកគុណគ្រូជាមួយនឹងពាក្យស្លោកថា «គ្រូមួយថ្ងៃ គ្រូមួយជីវិត» បានប្រព្រឹត្តទៅយ៉ាងរលូនដោយសារតែមានការចូលរួមបរិច្ចាគថវិកា និងសម្ភារពីអតីតសិស្សប្រមាណ១៣០នាក់។
លោក ប៊ុនថាន់ បានផ្តល់របាយការណ៍ថា គ្រូសរុប៦៥នាក់ ក្នុងនោះមានគ្រូចាស់ៗ៣៥នាក់ គ្រូបឋម៣នាក់ និងសិស្ស១១៥នាក់ បានប្រារព្ធពិធីរំលឹកគុណគ្រូ រួមគ្នា ដោយមានការចែកអំណោយអនុស្សាវរីយ៍ និងការរាំច្រៀងកម្សាន្តផងដែរ។
ទាំងលោក ហូ រិទ្ធី លោក ហូ ប៊ុនថន និងអ្នកស្រី ដួង សុភាព ដែលស្ថិតក្នុងចំណោមអ្នកផ្តួចផ្តើមរៀបចំពិធី សុទ្ធតែបានលើកឡើងថា ចំណេះដឹងដែលបានមកពីគ្រូកាលពីប្រមាណ២០មុន សុទ្ធតែជាផ្នែកនៃភាពជោគជ័យរបស់ពួកគាត់នាពេលបច្ចុប្បន្ន។
អ្នកស្រី ឆាវ ណារ៉េត បច្ចុប្បន្នរស់នៅខេត្តបន្ទាយមានជ័យ និងអ្នកស្រី គី រចនា បច្ចុប្បន្នប្រកបរបរនៅខេត្តសៀមរាប សុទ្ធតែបានតាំងចិត្តបន្តចូលរួមពិធីបែបនេះទៀតនាឆ្នាំខាងមុខ។ អ្នកស្រី ណារ៉េត បានសរសេររៀបរាប់នៅក្នុង Group Chat ហ្វេសប៊ុក (ដែលប្រើសម្រាប់ទំនាក់ទំនងរវាងអតីតសិស្សវិទ្យាល័យក្រឡាញ់) ថា ពិធីនេះ មិនត្រឹមតែជាការបង្ហាញនូវការដឹងគុណចំពោះគ្រូបង្រៀនប៉ុណ្ណោះទេ តែក៏ជាឱកាសសម្រាប់អតីតសិស្សទាំងជួបជុំគ្នារំលឹកអនុស្សាវរីយ៍ចាស់ៗកន្លងមកផងដែរ។
លោក អ៊ឹង បូរ៉ាត់ អតីតនាយកសាលា លោក សោ សុទ្ធី អតីតនាយករង និងអ្នកស្រី ហេង ស៊ីថា អតីតគ្រូបង្រៀនម្នាក់នោះ បានបង្ហាញនូវក្តីរំភើបចំពោះការផ្តួចផ្តើមកម្មវិធីដ៏មានអត្ថន័យបែបនេះ។
លោក អ៊ឹង បូរ៉ាត់ បានរំលឹកពីប្រវត្តិរបស់វិទ្យាល័យក្រឡាញ់ ហើយបានលើកទឹកចិត្តដល់អតីតសិស្សរបស់ខ្លួន បន្តធ្វើសកម្មភាពដ៏ប្រពៃនេះ។ អតីតនាយកសាលារូបនេះ បានលើកឡើងថា គ្រូពីសម័យមុន មិនមានការប្រកួតប្រជែងគ្នាដើម្បីតួនាទី និងអំណាចនោះឡើយ ហេតុដូច្នេះហើយ ទើបកេរ្តិ៍ឈ្មោះល្អស្ថិតនៅជាប់ជានិច្ចក្នុងស្មារតីរបស់អតីតសិស្សរបស់ខ្លួន។
លោក សោ សុទ្ធី បានសុំការអធ្យាស្រ័យខ្លះពីអតីតសិស្សចំពោះការដាក់វិន័យដ៏តឹងរ៉ឹងរបស់លោក ខណៈលោកមានតួនាទីជានាយករងសាលា ប៉ុន្តែលោករីករាយដែលទង្វើរបស់លោកនាពេលនោះ បានផ្តល់ផលវិជ្ជមានដល់សិស្ស។
ក្រុមអតីតសិស្សមួយចំនួនតាំងចិត្តរៀបចំកម្មវិធីនាឆ្នាំក្រោយៗទៀត ប៉ុន្តែវាអាស្រ័យលើឆន្ទះ រួមគំនិតគ្នាតែមួយ។ លោក ហូ រិទ្ធី ជឿជាក់ថា សិស្សជំនាន់ក្រោយៗ នឹងបន្តផ្តួចផ្តើមគំនិតរៀបចំកម្មវិធីនេះ៕
រូបថតផ្សេងទៀត សូមចូលទៅកាន់ហ្វេសប៊ុក៖
WE ARE FROM KRALANH
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
© រក្សាសិទ្ធិដោយ thmeythmey.com
អត្ថបទពេញនិយម
សណ្ដែកកួរ ឡើងដល់៤ម៉ឺនរៀល ក្នុងមួយគីឡូក្រាម
6 ថ្ងៃ
«ប្រទានកម្ម»មានន័យដូចម្តេច?
8 ម៉ោង
«ប្រសប់»និង«ប្រសព្វ» មានសូរសព្ទដូចគ្នា តែន័យខុសគ្នា!
1 សប្តាហ៍
តើពេលណាដែលគេសរសេរ«បរិបូរ, បរិបូណ៌ និង បរិបូរណ៍»នៅក្នុងសំណេរភាសាខ្មែរ?
1 ថ្ងៃ
«រឭក»,«រំឮក»,«រំលឹក» និង«រម្លឹក» ពាក្យណាត្រឹមត្រូវ?
2 ថ្ងៃ
អត្ថបទពេញនិយមបន្ថែម