កីឡាជាតិ
ជាតិ
ស្វាយរៀងឡើងឈរលេខ១ ខណៈភ្នំពេញក្រោនធ្វើឲ្យការពារជាតិស្គាល់ចាញ់
×
ការប្រកួតបាល់ទាត់ក្របខណ្ឌមិត្តហ្វូនខេមបូឌានលីករដូវកាល២០១៦ បានបញ្ចប់ការប្រកួតសប្តាហ៍ទី៥របស់ខ្លួន កាលពីថ្ងៃអាទិត្យ ទី១០ ខែមេសា ដោយក្រុមភ្នំពេញក្រោន បានទំលាក់ក្រុមលេខ១ ក្នុងសប្តាហ៍ទី៤ ក្រសួងការពារជាតិ ឲ្យធ្លាក់មកលេខ២ ខណៈក្រុមព្រះខ័នរាជស្វាយរៀង ឈរចំណាត់លេខ១ ជាបណ្តោះអាសន្នក្នុងសប្តាហ៍ទី៥ ចំណែកបឹងកេតឈរចំណាត់លេខ៣ បន្ទាប់ពីឈ្នះខេមបូឌានថាយហ្គឺរ។
ម្ចាស់ជើងឯករដូវកាលមុន ភ្នំពេញក្រោន បានទំលាក់ក្រុមលេខ១បណ្តោះអាសន្តសប្តាហ៍ទី៤ ក្រសួងការពារជាតិ ធ្លាក់មកចំណាត់ថ្នាក់លេខ២ បន្ទាប់ពីក្រុមនេះបានយកឈ្នះក្រសួងការពារជាតិ ២-១ នាការប្រកួតកាលពីថ្ងៃទី៩ ខែមេសា នៅកីឡដ្ឋានកងយោធពលខេមរភូមិន្ទ ជាហេតុធ្វើឲ្យក្រុមនេះទទួលបាន ៣ពិន្ទុ បន្ថែម ដើម្បីឈរក្នុងចំណាត់ថ្នាក់លេខ៤ជាបណ្តោះអាសន្នក្នុងសប្តាហ៍ទី៥។
ចំណែកក្រុមឈរចំណាត់ថ្នាក់លេខ២ លីកកំពូលកម្ពុជាបណ្តោះអាសន្នសប្តាហ៍ទី៤ ព្រះខ័នរាជស្វាយរៀង ក្រោយពីយកឈ្នះក្រុមម្ចាស់ផ្ទះវេស្ទើនភ្នំពេញ ៣-១ កាលពីថ្ងៃទី១០ ខែមេសា ធ្វើឲ្យក្រុមនេះទទួលបាន៣ពិន្ទុបន្ថែម នាំឲ្យក្រុមនេះឈរចំណាត់ថ្នាក់លេខ១ ក្នុងក្របខណ្ឌមិត្តហ្វូនខេមបូឌានលីកជាបណ្តោះអាសន្ន។ ចំណែកវេស្ទើនក្រោយពីចាញ់ព្រះខ័នរាជស្វាយរៀងឈរចំណាត់ថ្នាក់បន្ទាប់ពីបាតតារាងអាស៊ីអឺរ៉ុប។
ក្នុងថ្ងៃនោះដែរ ក្រុមបឹងអង្គរអែហ្វស៊ី ក្រោយពីយកឈ្នះលើក្រុម ខេមបូឌានថាយហ្គឺរ ២-១ នៅក្នុងពហុកីឡដ្ឋានជាតិ បានធ្វើឲ្យក្រុមដែលឈរក្នុងចំណាត់ថ្នាក់លេខ៣ក្នុងក្របខណ្ឌមិត្តហ្វូនខេមបូឌានលីកសប្តាហ៍ទី៤មួយនេះ ទទួលបាន៣ពិន្ទុបន្ថែម សម្រាប់ឈរចំណាត់ថ្នាក់លេខ៣ ជាបណ្តោះអាសន្នសម្រាប់សប្តាហ៍ទី៥។
នាការប្រកួតក្នុងសប្តាហ៍ទី៥នោះដែរ ក្រុមណាហ្គាវើល បានយកឈ្នះក្រុមអាស៊ីអឺរ៉ុបយូណាយធីត ១-០ ខណៈក្រុមមជ្ឈមណ្ឌលកំចាត់មីនកម្ពុជា ចែកគ្នាម្នាក់មួយពិន្ទុជាមួយក្រុមអគ្គស្នងការនគរបាលជាតិ ដោយរក្សាលទ្ធផល ២-២ ធ្វើឲ្យណាហ្គាវើល ឈរក្នុងចំណាត់ថ្នាក់លេខ៥ ខណៈស៊ីម៉ាក់ ឈរក្នុងចំណាត់ថ្នាក់លេខ៧ជាបណ្តោះអាសន្នដូចគ្នា។
យោងតាមតារាង ព្រះខ័នរាជស្វាយរៀងឈរលេខ១ដោយមាន១៣ពិន្ទុ ខណៈក្រសួងការពារជាតិ និងបឹងកេតអង្គរ មាន១២ពិន្ទុ ដោយការពារជាតិឈរនៅលេខ២ ដោយសាររូបមន្ត Head to Head។ ភ្នំពេញក្រោនឡើងទៅលេខ៤ ដោយមាន៨ពិន្ទុ ខណៈណាហ្គាវើល លេខ៥មាន៧ពិន្ទុ។
ខេមបូឌានថាយហ្គឺរធ្លាក់ទៅលេខ៦ ដោយមាន៦ពិន្ទុ ស៊ីម៉ាក់លេខ៧ មាន៤ពិន្ទុ ខណៈអគ្គស្នងការដ្ឋាននគរបាលជាតិ វេស្ទើនភ្នំពេញ និងអាស៊ីអឺរ៉ុបយូណាយធីត មិនទាន់ស្គាល់ជ័យជម្នះម្តងណាឡើយ ដោយនគរបាលជាតិរកបាន៤ពិន្ទុ វេស្ទើនមាន២ពិន្ទុ និងអាស៊ីអឺរ៉ុបមាន១ពិន្ទុ៕
Tag:
បាល់ទាត់
Cambodian League 2016
© រក្សាសិទ្ធិដោយ thmeythmey.com