ជាតិ
សង្គមជាតិ
រដូវរៀបការ៖ ភ្ញៀវស្រីៗ អស់ធ្ងន់ជាងបុរស
× ទាំងប្រុសទាំងស្រី បានរអ៊ូរទាំឥតដាច់អំពីចំនួនលិខិតអញ្ជើញចូលរួមក្នុងពិធីមង្គលការមិត្តភក្តិ កូនមិត្តភក្តិ បងប្អូន ក្មួយ មា មីង ជាដើម។ ចំនួនលិខិតអញ្ជើញគឺជារឿងមួយ ប៉ុន្តែរឿងធ្ងន់ធ្ងរមួយទៀតសម្រាប់ស្ត្រី គឺការចំណាយច្រើនជាងបុរស។ សម្លៀកបំពាក់ ការតែងលំអកាយ និងរួមទាំងការចងដៃ បូកបញ្ចូលគ្នាធ្វើឲ្យស្ត្រីកាន់តែរអានឹងការអញ្ជើញចូលរួមក្នុងពិធីមង្គលការ។
នៅហាងធ្វើសក់ផាត់មុខមួយកន្លែង មាននារីវ័យក្មេង និងវ័យកណ្តាលជាច្រើនកំពុងអង្គុយរង់ចាំ និងអង្គុយឲ្យគេផាត់មុខឲ្យ។ ក្នុងចំណោមអ្នករង់ចាំ គឺមានកញ្ញា សុខចេង ដែលមានទឹកមុខមិនសូវសប្បាយចិត្តឡើយ ដោយសារនេះគឺជាការផាត់មុខលើកទី៥ហើយមកដល់ចុងខែមីនា។ បានន័យថា សុខចេងបានទទួលសំបុត្រអញ្ជើញក្នុងពិធីអាពាហ៍ពិពាហ៍ចំនួន៤រួចហើយ។ ហាក់ដូចជាគ្មានជម្រើសឡើយ ហើយសុខចេងត្រូវបង្ខំចិត្តទៅចូលរួមក្នុងពិធីរៀបការនេះ។ ការចំណាយពេលវេលារៀបចំខ្លួន វាជារឿងដ៏គួរឲ្យធុញទ្រាន់មួយហើយ ប៉ុន្តែជាងនេះទៅទៀត សុខចេង ត្រូវខ្វាយខ្វល់ទៅលើការការចងដៃ។ សុខចេង ពន្យល់ថា៖«ពេលចូលរួមម្តងៗ យើងត្រូវសង្កេតមើលថាតើជាពិធីតូច ឬធំយ៉ាងណា? ការផ្តល់ចំណងដៃ (លុយ) វាត្រូវធ្វើទៅតាមនោះដែរ។ ដូច្នេះវាធ្វើឲ្យប៉ះពាល់ដល់ចំណាយប្រចាំខែរបស់ខ្ញុំ»។
នៅក្បែរ សុខចេង គឺកញ្ញា នីតា ដែលកំពុងទទួលការផាត់មុខ។ កញ្ញា នីតា យល់យ៉ាងច្បាស់អំពីទំនាក់ទំនងក្នុងសង្គម ដោយទទួលស្គាល់ថាការអញ្ជើញចូលរួមក្នុងពិធីបុណ្យ ឬពិធីអាពាហ៍ពិពាហ៍យ៉ាងដូច្នេះ វាបង្ហាញអំពីចំណងមិត្តភាព និងការគោរពរាប់អានគ្នា។ ប៉ុន្តែនីតាក៏មិនអាចនៅស្ញៀម និងទ្រាំទទួលលិខិតអញ្ជើញដោយសប្បាយចិត្តរហូតនោះដែរ។ នីតា ព្រលយឲ្យដឹងផងដែរថាពេលខ្លះ កញ្ញាត្រូវខ្ចីលុយមិត្តភក្តិដើម្បីចំណាយសម្រាប់ពិធីទាំងនេះផង។
ហេតុអ្វីបានជាពេលខ្លះ នីតាត្រូវខ្ចីបុលទៀតផងនោះ? នីតា រៀបរាប់ខ្ទង់ចំណាយឲ្យស្តាប់យ៉ាងដូច្នេះថា៖«ផាត់មុខធ្វើសក់នៅកន្លែងធម្មតាអស់ត្រឹម៤ដុល្លារ ឬ៥ដុល្លារ។ ពេលខ្លះបើយើងចង់ទៅកន្លែងល្អបន្តិច ត្រូវចំណាយឡើងដល់១០ដុល្លារ ឬ២០ដុល្លារ។ នៅរឿងសម្លៀកបំពាក់ ដែលយើងត្រូវកាត់ញឹកញាប់ ដើម្បីកុំឲ្យគេឃើញយើងស្លៀកពាក់ដដែល។ បើជួលសម្លៀកបំពាក់ម្តងៗ ក៏អស់ពី១៥ដុល្លារ ទៅ២០ដុល្លារដែរ»។ នីតា ក៏រម្លឹកអំពីគ្រឿងអលង្ការលំអកាយទៀតផង។
សម្រាប់កញ្ញា ផាណែត វិញ ស្ត្រីតែងប្រឹងប្រែងតុបតែងខ្លួនដើម្បីគ្រាន់តែពាក្យមួយប៉ុណ្ណោះ គឺត្រូវចូលចំណោមគេឲ្យចុះ។ ផាណែត ទទួលស្គាល់ថា ចូលរួមក្នុងពិធីអាពាហ៍ពិពាហ៍ពិតជាសប្បាយរីករាយ ប៉ុន្តែបើនិយាយដល់ការចំណាយរបស់ស្ត្រីវិញ ផាណែត ក៏ងក់ក្បាលយល់ព្រមថា ស្ត្រីចំណាយច្រើនជាងបុរស។ មិនទាន់និយាយអំពីការចងដៃផង គ្រាន់តែត្រឹមផាត់មុខធ្វើសក់ ផាណែត ចំណាយពី៨ដល់១០ដុល្លាររួចទៅហើយ។
ចំណែកឯម្ចាស់ហាងផាត់មុខធ្វើសក់នៅក្នុងផ្សារមួយកន្លែងក្នុងរាជធានីភ្នំពេញគឺអ្នកស្រីគន្ធា បានអះអាងថា អ្នកស្រីទទួលបានអតិថិជនច្រើន ជាពិសេសនៅថ្ងៃចុងសប្តាហ៍។ អ្នកស្រីយលតម្លៃផាត់មុខធ្វើសក់ពី៥ដុល្លារ ទៅ៧ដុល្លារ។ អ្នកស្រី គន្ធា បញ្ជាក់ប្រាប់ត្រង់ថា អ្នកស្រីតែងតែឮអតិថិជនរបស់អ្នកស្រីរអ៊ូញឹកញាប់អំពីការអញ្ជើញចូលរួមពិធីមង្គលការនេះ។ អ្នកស្រីបញ្ជាក់ថា ម្នាក់ៗបានត្អូញត្អែរប្រាប់គ្នាតែពីចំនួនលិខិតអញ្ជើញដែលពួកគេទទួលបានជារៀងរាល់ខែ។
មង្គលការប្រហារប្រាក់ខែ។ ឃ្លាត្រូវបានដឹងឮ គ្រប់ៗគ្នាហើយ ប៉ុន្តែហាក់គ្មានដំណោះស្រាយសោះ៕
© រក្សាសិទ្ធិដោយ thmeythmey.com