អ្នកស្លាប់កើនច្រើនជាង៧៧នាក់ ព្រោះរញ្ជួយដីនៅអេក្វាឌ័រ

អន្តរជាតិ

អ្នកស្លាប់កើនច្រើនជាង៧៧នាក់ ព្រោះរញ្ជួយដីនៅអេក្វាឌ័រ

17, Apr 2016 , 9:26 pm

រូបភាព

ដោយ: ថ្មីៗ

មនុស្សច្រើនជាង៧៧នាក់បានស្លាប់ដោយសារការរញ្ជួយដីកម្រិត ៧.៨ រ៉ិចទ័រ នៅប្រទេសអេក្វាឌ័រ នៅល្ងាចថ្ងៃសៅរ៍ ទី១៦មេសា ។ ទាហាននិងប៉ូលិសរាប់ម៉ឺននាក់បានចូលរួមក្នុងប្រតិបត្តិការរុករកនិងសង្គ្រោះប្រជាជននៅតាមតំបន់ដែលរងគ្រោះដោយសារការរញ្ជួយដីដ៏ធ្ងន់ធ្ងរមិនធ្លាប់មានក្នុងរយៈពេលប៉ុន្មានទសវត្សរ៍ចុងក្រោយនេះ។

យោងតាមសារព័ត៌មាន BBC មនុស្សស្លាប់ដោយសារគ្រោះមហន្តរាយរញ្ជួយដីកម្រិត ៧.៨រ៉ិចទ័រនៅប្រទេសអេក្វាឌ័រ បានកើនឡើងដល់ច្រើនជាង ៧៧នាក់ ហើយមនុស្សយ៉ោងហោចណាស់ ៥០០នាក់រងរបួសផងដែរ ។ ចំណែកការរុករកនិងសង្គ្រោះមនុស្សដែលរងគ្រោះថ្នាក់នោះកំពុងបន្តធ្វើឡើងរហូតមកដល់ពេលនេះ។ អាជ្ញាធរអះអាងថា ដោយសារការរុករកនៅកំពុងបន្ត ចំនួនអ្នកស្លាប់អាចកើនឡើងជាបន្តបន្ទាប់ទៀតផងដែរ។

ប៉ូលិសប្រហែល ៣៥០០នាក់ និងទាហាន ១០០០០នាក់ត្រូវបានពង្រាយ ទៅកាន់ទីតាំងដែលរងការវាយប្រហារដោយរលករញ្ជួយនេះ ជាពិសេសនៅតំបន់ឆ្នេរស្ថិតនៅភាគ ពាយ័ព្យប្រទេសតែម្តង។ កងកម្លាំងទាំងនោះក្រៅពីចុះជួយរុករកមនុស្សកប់ក្រោមសំណង់អាគារ សង្គ្រោះជនរងគ្រោះ ជាដើមនោះ ពួកគេក៏មានភារកិច្ចទប់ស្កាត់ការលួចរបស់របរ ឬទ្រព្យសម្បត្តិឯកជននានាកើតមានឡើងនៅក្នុងតំបន់ដែលរងគ្រោះ។

ក្រោយព្រឹត្តិការណ៍នេះកើតឡើង ប្រធានាធិបតីអេក្វាឌ័រ Rafael Correa បានសម្រេចចេញដំណើរត្រលប់ពីប្រទេសអ៊ីតាលីមកប្រទេសអេក្វាឌ័រវិញ ហើយលោកបានចេញក្រឹត្យដាក់ប្រទេសក្នុងភាពអាសន្ន និងអំពាវនាវឲ្យប្រជាជនរក្សាការអត់ធ្មត់និងសាមគ្គីគ្នាដើម្បីដោះស្រាយបញ្ហាលំបាកនេះ៕