ជាតិ
សិល្បះ
១៧ មេសា ទិវាមរណៈ ដោយ លោក គង្គ ប៊ុនឈឿន
× ១៧ មេសា ឆ្នាំ១៩៧៥ ជាថ្ងៃដ៏ចុកចាប់បំផុតដែលកវីនិពន្ធ គង្គ ប៊ុនឈឿន ចងចាំក្នុងជីវិត។ ក្នុងកម្រងកំណាព្យ ដែលមានចំណងជើងថា «កម្ពុជា ខ្លងខែក» លោក គង្គ ប៊ុនឈឿន សរសេររៀបរាប់រឿងពិតនៃជីវិតខ្មែរក្នុងរបបវាលពិឃាត ដែលមានកំណាព្យចំនួន៣០អត្ថបទផ្សេងៗគ្នា។
កំណាព្យទី៣០ នៅក្នុងសៀវភៅ «កម្ពុជាខ្លងខែក» លោក គង្គ ប៊ុនឈឿន បានសរសេររៀបចំទាក់ទងនឹងថ្ងៃនៃការមកដល់នៃរបបវាលពិឃាត។ កំណាព្យបទពាក្យ៥ ក្រោមចំណងជើងថា «១៧មេសា ទិវាមរណ:» ត្រូវបានលោក គង្គ ប៊ុនឈឿន សរសេរតាក់តែងឡើងនៅទីក្រុងបាងកក ប្រទេសថៃ កាលពីថ្ងៃទី៥ ខែមិថុនា ឆ្នាំ២០០៣ ។
ពេលនេះ ១៧មេសា ឆ្នាំ២០១៦ គឺជាថ្ងៃមួយដែលមិនអាចបំភ្លេចបាននោះឡើយសម្រាប់កូនចៅ គ្រួសារលោក គង្គ ប៊ុនឈឿន និងប្រជាជាតិខ្មែរទាំងមូល ពីព្រោះវាថ្ងៃនៃការទទួលមរណភាពរបស់វីរកវីនិពន្ធដ៏ឆ្នើមរបស់កម្ពុជារូបនេះ។
កើតនៅថ្ងៃទី១៨ ខែតុលា ឆ្នាំ១៩៣៩ នៅភូមិចំការសំរោង ឃុំចំការសំរោង ស្រុកបាត់ដំបង ខេត្តបាត់ដំបង លោក គង្គ ប៊ុនឈឿន ជាប់ឈ្មោះជាអ្នកនិពន្ធដ៏ឆ្នើមម្នាក់របស់កម្ពុជា ជាពិសេសស្នាដៃដែលរំលេចឲ្យឃើញពីសោភណភាពដ៏ល្អប្រណីតនៃខេត្តបាត់ដំបង និងស្ទឹងសង្កែ នាសម័យកាលរបស់លោក។
ម្ចាស់កវីស្ទឹងសង្កែរូបនេះ បានទទួលមរណភាពកាលពីម៉ោង៧ព្រឹកម៉ោងនៅក្នុងប្រទេសន័រវេ ដែលត្រូវនៅម៉ោង១រសៀលម៉ោងនៅកម្ពុជាថ្ងៃទី១៧ខែមេសា៕
© រក្សាសិទ្ធិដោយ thmeythmey.com