អន្តរជាតិ
នយោបាយអន្តរជាតិ
សមាជិក OPEC នៅតែគ្មានជំហររួម ខណៈកិច្ចប្រជុំបញ្ចប់ដោយគ្មានលទ្ធផល
×
ក្រុមប្រទេសផលិតប្រេងធំៗបរាជ័យឈានដល់សម្រេចបានកិច្ចព្រមព្រៀងដើម្បីកាត់បន្ថយការផលិតប្រេងឆៅ និងបង្កើនតម្លៃប្រេងដែលកំពុងតែធ្លាក់ចុះ។ ប្រទេសផលិតប្រេងដែលជាសមាជិក OPEC និងមិនមែន OPEC មិនបានឯកភាពគ្នាលើបរិមាណផលិតកម្មប្រេងនោះទេ ស្របពេលដែលប្រទេសផលិតប្រេងធំៗដូចជាអ៊ីរ៉ង់មិនបានទៅប្រជុំដែលធ្វើនៅទីក្រុងដូហា ប្រទេសកាតានោះទេ។
លោក តន ចាន់រីទ្ធធារ៉ា លម្អិតព័ត៌មាន
កិច្ចប្រជុំនៃអង្គការប្រទេសនាំចេញប្រេង (OPEC) បានបញ្ចប់ទៅដោយគ្មានកិច្ចព្រមព្រៀងសំដៅកាត់បន្ថយបរិមាណប្រេងឆៅដែលត្រូវផលិត ខណៈអង្គការនេះកំពុងតែព្យាយាមបង្កើនតម្លៃប្រេងឆៅលើទីផ្សារអន្តរជាតិ តាមរយៈការទម្លាក់បរិមាណផ្គត់ផ្គង់។ ប្រទេសជាច្រើនដែលចូលរួមកិច្ចប្រជុំនៅថ្ងៃទី១៧ ខែមេសា មិនឯកភាពគ្នាលើគោលការណ៍អ្វីនោះទេ បើទោះជាពួកគេខិតខំកំណត់បរិមាណប្រេងឆៅដែលត្រូវផលិតក្នុងមួយថ្ងៃមិនឲ្យហួសបរិមាណផលិតនៅខែមករា ឆ្នាំ២០១៦ក៏ដោយ។
នៅក្រោយកិច្ចប្រជុំ៦ម៉ោងរបស់ OPEC រដ្ឋមន្ត្រីថាមពលកាតាលោក Mohammed Saleh al-Sada បានត្រឹមតែនិយាយថា ប្រទេសទាំងអស់នឹងបន្តការពិភាក្សាគ្នារហូតដល់កិច្ចប្រជុំ OPEC ក្នុងខែមិថុនាខាងមុខ។ ចំណែកឯ រដ្ឋមន្ត្រីប្រេងរបស់អូម៉ង់បញ្ជាក់ថា មូលហេតុដែលមិនអាចចេញកិច្ចព្រមព្រៀងបាន ដោយសារតែសមាជិក OPEC មិនបានចូលរួមប្រជុំទាំងអស់ទេ ជាពិសេសអ៊ីរ៉ង់ដែលជាប្រទេសផលិតប្រេងដ៏ធំមួយ។
យ៉ាងណាមិញ អ៊ីរ៉ង់ដែលមិនចូលរួមប្រជុំនៅទីក្រុងដូហាបកស្រាយថា ខ្លួននឹងមិនទទួលយកសំណើទាំងឡាយណាដែលសំដៅដល់ការកាត់បន្ថយផលិតកម្មប្រេងរបស់ខ្លួននោះទេ លុះត្រាតែខ្លួនទទួលបានទីផ្សារប្រេងឆៅដូចដែលធ្លាប់មាននៅមុនពេលរងទណ្ឌកម្ម។ នេះក៏ដោយសារតែអ៊ីរ៉ង់កំពុងសម្រុកបង្កើនផលិតកម្មប្រេងឆៅរបស់ខ្លួនឡើងវិញ បន្ទាប់ពីលោកខាងលិចព្យួរទណ្ឌកម្មដែលបានដាក់នៅក្រោយការសម្រេចបានកិច្ចព្រមព្រៀងនុយក្លេអ៊ែរ។
បើតាមទូរទស្សន៍ Al Jazeera អ៊ីរ៉ង់មិនមែនជាសមាជិក OPEC តែឯងដែលមិនព្រមកាត់ បន្ថយបរិមាណប្រេងឆៅនោះទេ។ អារ៉ាប៊ី សាអូឌីត ដែលជាប្រទេសផលិតប្រេងដ៏ធំមួយ ក៏មានជំហរបន្តការផលិតរបស់ខ្លួនផងដែរ ព្រោះមិនចង់បាត់បង់អតិថិជនរបស់ខ្លួនទៅប្រទេសផលិតប្រេងដែលមិនមែនជាសមាជិកOPEC ដូចជាអាមេរិកជាដើម។
សូមបញ្ជាក់ថា ការធ្លាក់ចុះតម្លៃប្រេងឆៅលើទីផ្សារអន្តរជាតិបានប៉ះពាល់យ៉ាងខ្លាំងដល់ប្រទេសផលិតប្រេង។ អេក្វាទ័រនិងវ៉េណេស៊ុយអេឡា ជាប្រទេសពីរដែលរងគ្រោះខ្លាំងជាងគេ ដោយសារការធ្លាក់ចុះនេះ។ នៅពេលនេះ សេដ្ឋកិច្ចវ៉េណេស៊ុយអេឡាកំពុងប្រឈមមុខនឹងការធ្លាក់ចុះដែលមិនធ្លាប់មានក្នុងរយៈពេល៤០ឆ្នាំមកនេះ ហើយសេដ្ឋកិច្ចប្រទេសនេះនឹងបន្តធ្លាក់១០ភាគរយនៅក្នុងឆ្នាំ២០១៦នេះ។
អង្គការ OPEC ដែលមានសមាជិក១៣ប្រទេសកំពុងតែស្វះស្វែងរកមធ្យោបាយដើម្បីរួមគ្នាបង្អាក់ការផ្គត់ផ្គង់ប្រេងឆៅលើទីផ្សារ ដើម្បីជួយសង្គ្រោះសមាជិកខ្លួនកំពុងរងវិបត្តិដែលបណ្ដាលមកពីតម្លៃប្រេងធ្លាក់ចុះ។ យ៉ាងណាក្ដី ប្រទេសទាំងនោះដូចជាមិនមានគោលជំហររួមគ្នាឡើយ។ ប្រទេសផលិតប្រេងធំៗដូចជា អ៊ីរ៉ង់និងអារ៉ាប៊ី សាអូឌីតជាដើមនោះ មិនព្រមបន្ថយបរិមាណប្រេងផលិតទេ ពោលគឺបន្តផលិតកម្មប្រេងរបស់ខ្លួនដដែល៕
© រក្សាសិទ្ធិដោយ thmeythmey.com