អន្តរជាតិ
នយោបាយអន្តរជាតិ
ការចរចាសន្តិភាពស៊ីរីអាចបរាជ័យ ក្រោយក្រុមឧទ្ទាមស្នើផ្អាកការចរចា
×
ក្រុមឧទ្ទាមប្រឆាំងស៊ីរីបានស្នើទៅកាន់អង្គការសហប្រជាជាតិឲ្យផ្អាកដំណើរការចរចាសន្តិភាពនៅទីក្រុងហ្សឺណែវ ដើម្បីរង់ចាំឲ្យរដ្ឋាភិបាលក្រុងដាម៉ាស់បង្ហាញពីការយកចិត្តទុកដាក់លើដំណើរការសន្តិភាពជាមុន។ ការផ្អាកនេះ ទំនងជាសញ្ញានាំដល់ការដួលរលំការចរចាសន្តិភាពដែលគាំទ្រដោយអង្គការសហប្រជាជាតិ សម្រាប់បញ្ចប់សង្គ្រាមដែលកើតតាំងពីឆ្នាំ២០១១។
ការចរចាសន្តិភាពនៅស៊ីរីបានឈានមកដល់ចំណុចបរាជ័យ បន្ទាប់ពីគណៈកម្មាធិការចរចាជាន់ខ្ពស់ ដែលជាក្រុមឧទ្ទាមប្រឆាំងនៅស៊ីរី ស្នើផ្អាកការពិភាក្សាដែលធ្វើនៅស្នាក់ការអង្គការសហប្រជាជាតិនៅទីក្រុងហ្សឺណែវ។ ក្រុមប្រឆាំងចង់បានភាពប្រាកដប្រជាពីរបបលោកប្រធានាធិបតី បាសសា អាល់អាសាដ ចំពោះការចរចាសន្តិភាព និងការគោរពបទឈប់បាញ់។ បើទោះបីជាប្រកាសផ្អាកចរចាក៏ដោយ ក្រុមប្រឆាំងមិនបានចាកចេញពីទីក្រុងហ្សឺណែវនោះទេ។
នៅថ្ងៃទី១៨ ខែមេសា ក្រុមប្រឆាំងនិយាយថា ទាហានរដ្ឋាភិបាលលោក អាសាដ នៅតែបន្តរុលទៅមុខ ហើយនេះមានន័យថា បទឈប់បាញ់គឺបរាជ័យទៅហើយ និងបានស្នើឲ្យពន្យារពេលការចរចា។ ចំណែកឯ ក្រុមឧទ្ទាមដែលចោទរដ្ឋាភិបាលស៊ីរីថាកំពុងវាយលុកទីក្រុង Aleppo ក៏បើកយុទ្ធនាការមួយប្រឆាំងនឹងកងកម្លាំងរដ្ឋាភិបាលក្នុងខេត្ត Latakia ដែលជាប់មាត់សមុទ្រមេឌីទែរ៉ានេផងដែរ។
មន្ត្រីជាន់ខ្ពស់ក្រុមប្រឆាំងលោក Mohammad Alloush ប្រាប់សារព័ត៌មានReuters ថា វាគ្មានផ្លូវដែលក្រុមប្រឆាំងវិលរកតុចរចាវិញនោះទេ នៅពេលដែលសកម្មភាពយោធានៅតែមាន ហើយវិបត្តិមនុស្សធម៌នៅតែលំបាកនោះ។ លោកថា យើងចង់បានការចរចាដែលពិតប្រាកដ មិនមែនក្លែងក្លាយនោះទេ។ ការលើកឡើងនេះទំនងជាចង់សំដៅដល់របបលោក អាសាដ ដែលយកការចរចាជាលេស ដើម្បីបន្តប្រតិបត្តិការយោធារបស់ខ្លួន។
យ៉ាងណាមិញ បេសកជនពិសេសអង្គការសហប្រជាជាតិលោក Staffan de Mistura មិនបានមើលឃើញពីសារៈសំខាន់នៃការសម្រេចចិត្តរបស់ក្រុមប្រឆាំងនោះទេ។ ជាមួយគ្នានេះ ក្រុមរបស់លោកនឹងបន្តជួបជាមួយអ្នកចរចាមកពីក្រុមប្រឆាំង ដរាបណាពួកគេមិនទាន់ចាកចេញពីទីក្រុងហ្សឺណែវនោះ។ លោក de Mistura ក៏បានទទួលស្គាល់ដែរថា អំពើហិង្សាគឺជារឿងគួរឲ្យព្រួយបារម្ភ ជាពិសេសនៅជុំវិញទីក្រុងAleppo ហើយលោកអាចនឹងនិយាយរឿងនេះជាមួយក្រុងមូស្គូនិងវ៉ាស៊ីនតោន ប្រសិនស្ថានការនៅតែមិនទាន់ល្អប្រសើរទៀតនោះ។
សូមបញ្ជាក់ថា ការចរចាសន្តិភាពនៅទីក្រុងហ្សឺណែវមានទិសដៅបញ្ចប់សង្គ្រាមរ៉ាំរ៉ៃរវាងភាគីជម្លោះនៅស៊ីរី ដែលបណ្ដាលឲ្យមនុស្សច្រើនជាងពីរសែននាក់បាត់បង់ជីវិត និងរាប់លាននាក់ទៀតក្លាយជាជនភៀសខ្លួន។ ជម្លោះនេះ ក៏ជួយដល់ការពង្រីកឥទ្ធិពលរបស់ក្រុមជ្រុលនិយមរដ្ឋឥស្លាម ដែលកំពុងអុកឡុកទឹកដីមួយធំររវាងស៊ីរីនិងអ៊ីរ៉ាក់ ហើយថែមទាំងទាក់ទាញមហាអំណាចមួយចំនួនចូលមកពាក់ព័ន្ធនឹងបញ្ហានេះផងដែរ។
យ៉ាងណាក៏ដោយ ការចរចានេះហាក់មិនបានលទ្ធផលជាទីគាប់ចិត្តទេ ដ្បិតភាគីជម្លោះទាំងអស់មានជំហរផ្សេងគ្នា និងមានមហាអំណាចជួយពីក្រោយដូចគ្នា។ ក្រុមឧទ្ទាមប្រឆាំងទទួលជំនួយពីលោកខាងលិច សម្រាប់ប្រយុទ្ធនឹងរបបលោក អាសាដ ខណៈដែលប្រធានាធិបតី អាសាដ មានរុស្សីជួយពីក្រោយដែលធ្វើឲ្យលោកអាចដណ្ដើមកាន់កាប់ទឹកដីពីក្រុមប្រឆាំងមកគ្រប់គ្រងវិញជាបន្តបន្ទាប់៕
Tag:
ស៊ីរី
កិច្ចចរចាសន្តិិភាពហ្សឺណែវ
Staffan de Mistura
© រក្សាសិទ្ធិដោយ thmeythmey.com