លោកស្រី ស៊ូជី នៅតែចង់កែរដ្ឋធម្មនុញ្ញ ទោះជាគ្មានសង្ឃឹមក៏ដោយ

អន្តរជាតិ

នយោបាយអន្តរជាតិ

លោកស្រី ស៊ូជី នៅតែចង់កែរដ្ឋធម្មនុញ្ញ ទោះជាគ្មានសង្ឃឹមក៏ដោយ

20, Apr 2016 , 8:19 am

រូបភាព

ដោយ: តន ចាន់រិទ្ធារ៉ា

ប្រមុខគណបក្សសម្ព័ន្ធជាតិដើម្បីប្រជាធិបតេយ្យលោកស្រី អ៊ុងសាន ស៊ូជី ប្រកាសថា លោកស្រីជំរុញឲ្យមានការកែប្រែរដ្ឋធម្មនុញ្ញឆ្នាំ២០០៨ ដែលតាក់តែងដោយក្រុមយោធា។ គោលបំណងនៃវិសោធនកម្មគឺការកសាងប្រជាធិបតេយ្យពេញលេញនៅមីយ៉ាន់ម៉ា ដែលទើបតែងើបចេញពីការគ្រប់គ្រងរបស់យោធា។ ប៉ុន្តែនេះមិនមែនជារឿងងាយស្រួលសម្រាប់លោកស្រី ស៊ូជី នោះទេ ដ្បិតយោធានៅតែមានអំណាចខ្លាំងដែលផ្ដល់ដោយរដ្ឋធម្មនុញ្ញឆ្នាំ២០០៨។

លោកស្រី អ៊ុងសាន ស៊ូជី និយាយថា លោកស្រីនឹងធ្វើវិសោធនកម្មរដ្ឋធម្មនុញ្ញដែលក្រុមយោធាសរសេរក្នុងឆ្នាំ២០០៨ ដើម្បីធ្វើឲ្យមីយ៉ាន់ម៉ាមានប្រជាធិបតេយ្យពិតប្រាកដ។ លោកស្រីថ្លែងដូចនេះ នៅចំពេលដែលគណបក្សរបស់លោកស្រីឈ្នះឆ្នោតឆ្នាំ២០១៥ ហើយមនុស្សជំនិតរបស់លោកស្រីគឺលោក ធិន ច (Htyn Kyaw) ក៏ក្លាយជាប្រធានាធិបតីស៊ីវិលដែលគ្មានប្រវត្តិទាក់ទិននឹងយោធា ហើយលោកស្រីខ្លួនឯងក៏ធ្វើជារដ្ឋមន្ត្រីពីរស្ថាប័ននិងជាទីប្រឹក្សារដ្ឋផងដែរ។

ថ្លែងតាមទូរទស្សន៍ដើម្បីអបអរបុណ្យចូលឆ្នាំថ្មីនៅថ្ងៃទី១៨ ខែមេសា លោកស្រីក៏បញ្ជាក់ពីអនាគតរបស់លោកស្រី និងការលំបាកនានាដែលរង់ចាំរដ្ឋាភិបាលថ្មីដោះស្រាយ។ លោកស្រីថា គោលនយោបាយលោកស្រីគឺការបង្រួបបង្រួមជាតិ នីតិរដ្ឋ វិសោធនកម្មរដ្ឋធម្មនុញ្ញ និងបន្តធ្វើឲ្យប្រជាធិបតេយ្យកាន់តែទៅមុខ។ ចំពោះបញ្ហារដ្ឋធម្មនុញ្ញ លោកស្រីបន្ថែមថា រដ្ឋធម្មនុញ្ញត្រូវតែជាច្បាប់ដែលផ្ដល់កំណើតដល់ប្រជាធិបតេយ្យពិតប្រាកដ ហើយយើងត្រូវតែកែរដ្ឋធម្មនុញ្ញ។

យ៉ាងណាមិញ និយាយមិនមែនស្រួលដូចធ្វើនោះទេ ព្រោះលទ្ធភាពដែលលោកស្រី ស៊ូជី ចង់កែរដ្ឋធម្មនុញ្ញនឹងត្រូវរារាំងដោយក្រុមយោធាដ៏មានឥទ្ធិពល។ រដ្ឋធម្មនុញ្ញឆ្នាំ២០០៨បានផ្ដល់ឲ្យយោធាមីយ៉ាន់ម៉ានូវអំណាចគួរសមក្នុងស្ថាប័ននីតិប្រតិបត្តិនិងនីតិបញ្ញត្តិ។ នៅក្នុងគណៈរដ្ឋមន្ត្រី យោធាមានសិទ្ធិតែងតាំងរដ្ឋមន្ត្រីសំខាន់បីក្រសួងគឺ មហាផ្ទៃ ការពារជាតិ និងកិច្ចការព្រំដែន។ ចំណែកនៅសភាគ្រប់ជាន់ យោធាទទួលបានកៅអី២៥ភាគរយដោយស្វ័យប្រវត្តិ ដែលចំនួននេះគឺគ្រប់គ្រាប់សម្រាប់រារាំងការធ្វើវិសោធនកម្មរដ្ឋធម្មនុញ្ញ។

ជាមួយគ្នានេះ សារព័ត៌មាន Irrawaddy ផ្សាយថា លោកស្រី ស៊ូជី នៅតែទទូចកែរដ្ឋធម្មនុញ្ញដែលសរសេរនៅឆ្នាំ២០០៨ ដោយលោកស្រីថា រដ្ឋធម្មនុញ្ញបច្ចុប្បន្នត្រូវតែកែ ដើម្បីឲ្យប្រទេសទៅមុខ។ កន្លងមក ជ័យលាភីណូបែលសន្តិភាពឆ្នាំ១៩៩១រូបនេះ ក៏ធ្លាប់ចរចាជាមួយក្រុមយោធាទាក់ទិននឹងរឿងរដ្ឋធម្មនុញ្ញនេះដែរ។ លោកស្រីបានជួបជាមួយមេបញ្ជាការទ័ពលោកឧត្តមសេនីយ៍ មីន អ៊ុងឡាំង បីដង តែគ្មានលទ្ធផលផ្លែផ្កាអ្វីទេ។

ជាប្រមុខគណបក្សឈ្នះឆ្នោត លោកស្រី អ៊ុងសាន ស៊ូជី គួរតែធ្វើជាប្រធានាធិបតី ប៉ុន្តែត្រូវរារាំងដោយមាត្រា៥៩នៃរដ្ឋធម្មនុញ្ញដែលចែងថា អ្នកណាដែលមានប្ដីប្រពន្ធឬកូនជាជនបរទេសនោះ មិនអាចធ្វើជាប្រធានាធិបតីបានទេ។ លោកស្រី ស៊ូជី មានអតីតប្ដីនិងកូនប្រុសពីរនាក់ជាជនជាអង់គ្លេស។

ជំនួសមកវិញនោះ លោកស្រី ស៊ូជី សម្រេចចិត្តមិនតតាំងនឹងក្រុមយោធា ដោយជ្រើសលោក ធិន ច ជាប្រធានាធិបតី ខណៈលោកស្រីកាន់តំណែងដ៏មានឥទ្ធិពលដែលទើបបង្កើតគឺទីប្រឹក្សារដ្ឋ។ ក្រៅពីនោះលោកស្រីក៏កាន់តំណែងរដ្ឋមន្ត្រីក្រសួងការបរទេស និងរដ្ឋមន្ត្រីការិយាល័យប្រធានាធិបតី៕