សៀវភៅខៀវជប៉ុន រងប្រតិកម្មពីចិននិងកូរ៉េខាងត្បូង ដ្បិតបញ្ហាចម្រូងចម្រាសដែនអធិបតេយ្យ

អន្តរជាតិ

សៀវភៅខៀវជប៉ុន រងប្រតិកម្មពីចិននិងកូរ៉េខាងត្បូង ដ្បិតបញ្ហាចម្រូងចម្រាសដែនអធិបតេយ្យ

19, Apr 2016 , 8:59 pm

រូបភាព

ដោយ:

ក្រសួងការបរទេសជប៉ុន បានចេញផ្សាយសៀវភៅខៀវ (Diplomatic Bluebook) ឆ្នាំ២០១៦ ដែលជារបាយការណ៍កំណត់ពីគោលនយោបាយការបរទេសរបស់ជប៉ុន។ បើទោះបីជាចំណុចមួយចំនួនបាន និយាយពីសារសំខាន់នៃទំនាក់ទំនងជាមួយនឹងអ្នកជិតខាងក៏ដោយ សៀវភៅខៀវនោះ ក៏បានរងនូវការរិះគន់ពីសំណាក់ ចិន និងកូរ៉េខាងត្បូង ដ្បិតមានការកំណត់ចំណុចមួយចំនួនដែលប៉ះពាល់ដល់អធិបតេយ្យ។

Diplomatic Bluebook ដែលបានចុះផ្សាយនៅថ្ងៃទី១៥ ខែមេសា កន្លងទៅ បានចាត់ទុកកូរ៉េខាងត្បូង ជារដ្ឋនៃប្រទេសជិតខាងដ៏សំខាន់បំផុតរបស់ជប៉ុនដែលបានចែករំលែកផលប្រយោជន៍យុទ្ធសាស្ត្ររវាងគ្នាទៅវិញទៅមក។ គោលជំហររបស់ជប៉ុនទៅកាន់កូរ៉េខាងត្បូងអាចឈានមកដល់ពេលនេះបានក៏ជាលទ្ធផលមួយនៃកិច្ចព្រមព្រៀងរវាងរដ្ឋាភិបាលទាំងពីរទាក់ទងលើបញ្ហាប្រវត្តិសាស្ត្រស្តីពីទាសភាពផ្លូវភេទដែលចុះហត្ថលេខានៅឆ្នាំ២០១៥កន្លងទៅ។

យ៉ាងណាក៏ដោយទន្ទឹមការបង្ហាញពីគោលជំហរស្និទ្ធស្នាលនេះ ក៏មានបញ្ហាចម្រូងចម្រាសដែលបាន បញ្ញាត្តិនៅក្នុងសៀវភៅខៀវនោះផងដែរ។ ភ្លាមៗក្រោយនៃការចុះផ្សាយសៀវភៅនោះ កូរ៉េខាងត្បូង បានរិះគន់ជប៉ុនដែលបានបញ្ជាក់ជាថ្មីលើដែនអធិបតេយ្យកោះថាជារបស់ខ្លួន និង ទទូចឲ្យជប៉ុន ដកចំណុចនោះជាបន្ទាន់ផងដែរ។ តំបន់កោះដែលជប៉ុនបាននិយាយ និងកំពុងស្ថិតក្រោមការគ្រប់គ្រងដោយកូរ៉េខាងត្បូងនោះ ត្រូវបានជប៉ុនហៅថាកោះTakeshima និងកូរ៉េខាងត្បូងហៅថាកោះDokdo។

« វា គឺជារឿងដ៏គួរឲ្យសោកស្តាយសម្រាប់ជប៉ុនក្នុងការនិយាយម្តងហើយម្តងទៀតលើដែនអធិបតេយ្យ Dokdo ដែលជាចំណុចរួមនៃអធិបតេយ្យយើង តាមប្រវត្តិសាស្ត្រ ច្បាប់អន្តរជាតិ និងកត្តាភូមិសាស្ត្រនោះ»។ នេះ គឺជាសេចក្តីថ្លែងការប្រតិកម្មរបស់ក្រសួងការបរទេសកូរ៉េខាងត្បូងដែលបានដកស្រង់ ដោយសារព័ត៌មាន Japan Time។

ជាមួយគ្នានេះផងដែរ សៀវភៅខៀវ ក៏បាននិយាយពីបញ្ហានៅសមុទ្រខាងកើត និងសមុទ្រចិនខាងត្បូង ដែលបានប៉ះពាល់ និងទទួលនូវរងប្រតិកម្មពីរដ្ឋាភិបាលក្រុងប៉េកាំងផងដែរ។ យោងតាមសារព័ត៌មាន People’s Daily នៅថ្ងៃទី១៨ ខែមេសាម្សិលមិញ អ្នកនាំពាក្យក្រសួងការបរទេសចិនលោក Lu Kang បានថ្លែងថាជប៉ុន គួរតែបញ្ឈប់ការបំផ្លើសបញ្ហាដែនសមុទ្រ និងការបង្កើតកំណត់សម្គាល់ដែលមិនមានការទទួលខុសត្រូវ ដែលអាចបង្កើតឲ្យមានភាពចម្រូងចម្រាសក្នុងទំនាក់ទំនងទ្វេភាគី ក៏ដូចជាស្ថានភាពនៅក្នុងតំបន់ទៀតផង៕