អន្តរជាតិ
នយោបាយអន្តរជាតិ
ហ៊ីឡារីគ្លីនតុន,ដូណាល់ត្រាំទទួលជ័យជម្នះនៅញូវយ៉ក
× បេក្ខជននាំមុខបក្សប្រជាធិបតេយ្យលោកស្រី ហ៊ីឡារី គ្លីនតុន (Hillary Clinton) បានផ្តួលគូប្រជែងលោកស្រី លោក ប៊ែនី សេនដឺ (Bernie Sanders) ក្នុងការបោះឆ្នោតនៅថ្ងៃអង្គារទី ១៩ មេសា ម្សិលមិញនៅញូវយ៉ក។ ចំណែកក្នុងបក្សសាធារណរដ្ឋ លោក ដូណាល់ ត្រាំ (Donald Trump) នៅតែអាចដណ្តើមយកជ័យជម្នះបានទៀត។
លោកស្រី ហ៊ីឡារី គ្លីនតុន បានទទួលជ័យជម្នះក្នុងការបោះឆ្នោតនៅ ញូវយ៉កថ្ងៃអង្គារទី ១៩ មេសាម្សិលមិញនេះ។ លោកស្រីបានទទួលសំឡេងគាំទ្ររហូតដល់ ៥៧.៦ភាគរយ ខណៈដែលសមាជិកព្រឹទ្ធសភារដ្ឋ Vermontលោក ប៊ែនី សេនដឺបានទទួល ៤២.៧ភារគរយប៉ុណ្ណោះ។
គេវាយតម្លៃជាមុនហើយថា លោកស្រីគ្លីនតុន មានលទ្ធភាពក្នុងការទទួលជោគជ័យនៅញូវយ៉ក ដែលប្រជាជនភាគច្រើនគាំទ្រលោកស្រីស្រាប់។ ក្រោយពេលប្រកាសពីជ័យជម្នះ លោកស្រី ហ៊ីឡារី គ្លីនតុន បានថ្លែងអំណរគុណដល់ប្រជាជនញូវយ៉កផងដែរចំពោះការគាំទ្រលោកស្រី។ លោកស្រីថា៖« អរគុណអ្នក ញូវយ៉ក។ អ្នកផ្តល់ការជឿជាក់របស់អ្នកមកដល់ខ្ញុំកាលពី ១៦ឆ្នាំមុន ហើយអ្នកធ្វើវាម្តងទៀតនៅយប់នេះម្តងទៀត។ ខ្ញុំនឹងមិនបញ្ចប់ការប្រឹងប្រែងធ្វើគ្រប់យ៉ាងដើម្បីអ្នកឡើយ»។
ដើម្បីឈ្នះការតែងតាំងពីបក្ស បេក្ខជបក្សប្រជាធិបតេយ្យត្រូវរកតំណាងរបស់ខ្លួនឲ្យបាន ២៣៨៣ ហើយនៅពេលនេះតំណាងដែលនៅសល់សម្រាប់ការប្រជែងគ្នារវាងលោកស្រី គ្លីនតុន និងលោក សេនដឺមានត្រឹម ១៦៩២នាក់។ បច្ចុប្បន្នលោកស្រី ហ៊ីឡារី គ្លីនតុន បានទទួលអ្នកតំណាងសរុបចំនួន ១៨៩៣នាក់ រួចទៅហើយ ក្នុងចំណោមនោះមានអ្នកតំណាងពិសេស (Super Delegate) ដែលប្រកាសគាំទ្រលោកស្រី ចំនួន ៤៦៩នាក់។
លោក សេនដឺ ទើបទទួលបានអ្នកតំណាងចំនួន ១១៨០នាក់ នៅឡើយ។ នេះបង្ហាញឲ្យឃើញថា ជ័យជម្នះជាថ្មីនេះ ផ្តល់ក្តីសង្ឃឹមច្រើនសម្រាប់លោកស្រីក្នុងការទទួលបានការតែងតាំងពីបក្សនៅក្នុងខែកក្កដាខាងមុខដែរ។
ចំណែកនៅក្នុងបក្សសាធារណរដ្ឋឯណោះវិញ សេដ្ឋីអចលនទ្រព្យលោក ដូណាល់ ត្រាំ នៅតែមានលទ្ធភាពដណ្តើមជ័យជម្នះជាថ្មីទៀតក្នុងការបោះឆ្នោតក្នុងបក្សនៅ ញូវយ៉ក។ សេដ្ឋីរូបនេះអាចរកសំឡេងគាំទ្របានរហូតដល់ ៦០ ភាគរយ ខណៈដែលលោក ចន ខាសិក (John Kasich) បានត្រឹម ២៥.២ ហើយចុងក្រោយលោក ថេត គ្រុស (Ted Cruz) បានសំឡេង ១៤.៨ភាគរយប៉ុណ្ណោះ។ យោងតាមភាគរយនៃសំឡេងគាំទ្រលោក ដូណាល់ ត្រាំ បានទទួលតំណាងចំនួន ៨៩ ក្នុងចំណោមអ្នកតំណាងនៅញូវយ៉កចំនួន ៩៥នោះ។
សូមពន្យល់បន្តិចដែរថា ដើម្បីទទួលការតែងតាំងពីបក្សសម្រាប់ បេក្ខជនបក្សសាធារណរដ្ឋចាំបាច់ត្រូវរកឲ្យបានតំណាងសរុបចំនួន ១២៣៧ ។ បច្ចុប្បន្នលោក ដូណាល់ ត្រាំ រកបានចំនួន ៨៤៥ លោក ថេត គ្រុស រកបាន៥៥៩ និងចុងក្រោយលោក ចន ខាសិក រកបានចំនួន១៤៧ ។ ចំនួនអ្នកតំណាងនៅសេសសល់សម្រាប់បេក្ខជនទាំងបីប្រជែងគ្នាដណ្តើមយកនោះមានត្រឹម ៧៣៤ ប៉ុណ្ណោះ៕
Tag:
ហ៊ីឡារីគ្លីនតុន
ដូណាល់ត្រាំ
ញូវយ៉ក
© រក្សាសិទ្ធិដោយ thmeythmey.com