ជាតិ
តុលាការកោះហៅ ស្រីមុំ និង ធី សុវណ្ណថា ឲ្យចូលបំភ្លឺ
×
កញ្ញា ខុម ចាន់តារាទី ហៅស្រីមុំ និងកញ្ញា ធី សុវណ្ណថា ត្រូវបានព្រះរាជអាជ្ញាអមសាលាដំបូងរាជធានីភ្នំពេញ កោះហៅឲ្យចូលបំភ្លឺ។ ការកោះហៅនេះ ដើម្បីសាកសួរពីរឿងរ៉ាវ ដែលកញ្ញា ធី សុវណ្ណថា បានប្តឹងទៅកាន់តុលាការ កន្លងមក។
លោក កែវ សុជាតិ ព្រះរាជអាជ្ញារងនៃសាលាដំបូងរាជធានីភ្នំពេញ បានចេញដីកាចំនួនពីរ ដើម្បីកោះហៅ កញ្ញា ខុម ចាន់តារាទី និងកញ្ញា ធី សុវណ្ណថា ឲ្យចូលខ្លួនបកស្រាយ នៅពេលខាងមុខនេះ។ យោងតាមដីកាកោះខាងលើ នារីទាំងពីរនេះ ត្រូវចូលខ្លួនផ្តល់ចម្លើយដល់ព្រះរាជអាជ្ញា នៅថ្ងៃផ្សេងគ្នា។
កញ្ញា ធី សុវណ្ណថា ដែលជាដើមបណ្តឹង ត្រូវចូលខ្លួននៅថ្ងៃទី២៧ ខែមេសា ឆ្នាំ២០១៦ ។ ចំណែកឯ កញ្ញា ខុម ចាន់តារាទី ដែលគេសង្ស័យថាជាតួអង្គក្នុងខ្សែអាត់សំឡេង ត្រូវចូលទៅកាន់តុលាការ នៅថ្ងៃទី២៩ ខែមេសា ឆ្នាំ២០១៦ ។
ការកោះហៅពួកគេទាំងពីរ គឺដើម្បីសាកសួរពីដំណើរដើមទង ដែលកញ្ញាធី សុវណ្ណថា ប្តឹងពីបទ «បរិយាហារកេរ្តិ៍ តាមរយៈខ្សែអាត់សំឡេង ដែលបង្ហោះផ្សព្វផ្សាយដោយ ទំព័រហ្វេសប៊ុក ឈ្មោះ រឿងពិត CNRP»។
សូមបញ្ជាក់ថា កាលពីថ្ងៃទី១៩ ខែមេសា ឆ្នាំ២០១៦ កញ្ញា ខុម ចាន់តារាទី បានចូលខ្លួនភ្លឺម្តងរួមមកហើយ តាមដីកាកោះហៅរបស់លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ។ ព្រះរាជអាជ្ញារូបនេះ បានចំណាយពេលជាង៤ម៉ោង ដើម្បីសួរនាំកញ្ញា ខុម ចាន់តារាទី ពីខ្សែអាត់សំឡេងក្នុងទូរសព្ទ និងទំនាក់ទំនងរវាងរូបនាង ជាមួយអ្នកពាក់ព័ន្ធផ្សេងទៀត៕
Tag:
ស្រីមុំ
ធី សុវណ្ណថា
ខ្សែអាត់
© រក្សាសិទ្ធិដោយ thmeythmey.com