អន្តរជាតិ
នយោបាយអន្តរជាតិ
លោកប្រាយុទ្ធ ចេញមុខការពារតំណែងយោធាក្មួយប្រុសថាមិនមែនជា«គ្រួសារនិយមឡើយ»
× ថ្មីៗនេះ មានរបាយការណ៍បែកធ្លាយមួយ បង្ហាញថាប្អូនប្រុសរបស់លោកនាយករដ្ឋមន្ត្រីថៃប្រាយុទ្ធ ច័ន្ទ អូចា ដែលមានតំណែងជាមន្ត្រីយោធាជាន់ខ្ពស់ បានតែងតាំងកូនប្រុសរបស់ខ្លួនក្នុងតំណែងជាន់ខ្ពស់យោធាផងដែរ។ បញ្ហានេះ ត្រូវបានលោកនាយករដ្ឋមន្ត្រីប្រាយុទ្ធ ច័ន្ទ អូចា ចេញមុខការពារដោយលោកថាវាមិនមានពាក់ព័ន្ធនឹងរឿងគ្រួសារនិយមឡើយ។
លោកនាយករដ្ឋមន្ត្រីរដ្ឋប្រហារយោធា ប្រាយុទ្ធ ច័ន្ទ អូចា នៅថ្ងៃទី១៩ ខែមេសា ម្សិលមិញបានចេញមុខការពារប្អូនប្រុសរបស់លោក ដែលរងពីការចោទនៃគ្រួសារនិយមនៅក្នុងតំណែងកងទ័ព។ ប្រតិកម្ម នេះ ធ្វើឡើងក្រោយពីមានការបែកធា្លយឯកសារសំងាត់ដែលបង្ហាញថាលោកឧត្តមសេនីយ៍ ប្រ៊ីចា ច័ន្ទ អូចា ដែលជាប្អូនប្រុសលោក ប្រាយុទ្ធ ច័ន្ទ អូចា បានផ្តល់តំណែងកងទ័ពមួយដល់កូនប្រុសខ្លួន ។
ឯកសារបែកធ្លាយ ដែលចុះហត្ថលេខាដោយលោកឧត្តមសេនីយ៍ ប្រ៊ីចា ច័ន្ទ អូចា ដែលមានតំណែងជាលេខាអចិន្ត្រៃយ៍នៃក្រសួងការពារជាតិថៃ នោះ បាននិយាយថាលោក ប៉ាទីប៉ាត ច័ន្ទ អូចា ដែលមានអាយុ២៥ឆ្នាំ នឹងកាន់តំណែងកិច្ចការស៊ីវិលក្នុងកងទ័ពភូមិភាគ៣ ដែលមានប្រាក់ខែប្រមាណ ១៥០០០បាត។ នេះបើយោងតាមដកស្រង់ដោយសារព័ត៌មានបាងកកប៉ុស្តិ៍។
ជុំវិញបញ្ហានេះ លោក ប្រាយុទ្ធ បានបញ្ជាក់ថា វា គ្រាន់ជាបញ្ហាតូចមួយ និងជាការតែងតាំងដ៏សាមញ្ញមួយប៉ុណ្ណោះ។ នេះបើយោងតាមប្រភពព័ត៌មានដដែលដែលបានដកស្រង់សម្តី លោក ប្រាយុទ្ធ ដែរថា ការតែងតាំងកូនចៅជំនាន់ក្រោយក្នុងកងទ័ព ក៏ព្រោះតែគេអាចបង្កើនការទុកចិត្តពីអ្វីដែលឪពុកម្តាយពួកគេ បានធ្វើកន្លងមកសម្រាប់ប្រទេស។ លោក ប្រាយុទ្ធ បានថ្លែងប្រាប់អ្នកសារព័ត៌មានយ៉ាងខ្លីចុងក្រោយថា «អ្វីគ្រប់យ៉ាង គឺស្របច្បាប់ និងត្រឹមត្រូវ»។
ជាមួយគ្នានេះដែរ នៅថ្ងៃទី១៨ ខែមេសាកន្លងទៅ លោកឧត្តមសេនីយ៍ ប្រ៊ីចា ច័ន្ទ អូចា ក៏បានការពារចំពោះតំណែងនោះដែរ។ លោក ថាកូនប្រុសរបស់លោក អាចនឹងខ្វះខាតនូវបទពិសោធន៍ផែ្នកយោធា តែ សក្តិសមនឹងតំណែងនោះ ដ្បិតកូនប្រុសលោក ធ្លាប់មានបទពិសោធន៍ធ្វើការក្នុងកិច្ចការទំនាក់ទំនងសាធារណៈផងដែរ។
លោក ប្រ៊ីចា ក៏បានសង្កត់ធ្ងន់ដែរថា ប្រហែលគ្រួសារត្រកូល «ច័ន្ទ អូចា» មានការចាប់អារម្មណ៍ពីសាធារណៈហើយបានជាមានការចោទបែបនេះ។ លោក ថា មានកូនមន្ត្រីយោធាជាន់ខ្ពស់ជាច្រើនបានចូលជាបម្រើការជាកងទ័ព នៅពេលមានការជ្រើសរើស។
សូមបញ្ជាក់ផងដែរថា លោកឧត្តមសេនីយ៍ ប្រាយុទ្ធ ច័ន្ទ អូចា ដែលជាមេបញ្ជាការកំពូលកងទ័ពថៃ បានឡើងកាន់តំណែងជានាយករដ្ឋមន្ត្រី ក្រោយពីមានរដ្ឋប្រហារយោធាថ្ងៃទី២២ ខែឧសភា ឆ្នាំ២០១៤ ។ ក្រោមការដឹកនាំដោយរបបសឹកនេះ មានការលើកចោទជាច្រើនទាក់ទងនឹងបញ្ហាគ្រួសារនិយម និង បញ្ហាពុករលួយដោយមន្ត្រីយោធាជាន់ខ្ពស់ តែបញ្ហានោះ ក៏ត្រូវបានច្រានចោលជាបន្តបន្ទាប់ផងដែរ៕
© រក្សាសិទ្ធិដោយ thmeythmey.com