អន្តរជាតិ
ឡាវជ្រើសបានប្រធានាធិបតី និងនាយករដ្ឋមន្ត្រីថ្មី
× សភាជាតិឡាវបានសម្រេចរើសមេដឹកនាំប្រទេសសម្រាប់អាណត្តិថ្មីរួចរាល់ហើយនៅក្នុងកិច្ចប្រជុំអាណត្តិទី៨របស់ខ្លួន។ អគ្គលេខាធិការបក្សកុម្មុយនីស្តឡាវលោក ប៊ុនញ៉ាង វរ៉ាជិត ត្រូវបានតែងតាំងជាប្រធានាធិបតី ខណៈលោក ថងលួន ស៊ីសូលីត ត្រូវជ្រើសរើសជានាយករដ្ឋមន្ត្រីថ្មីផងដែរ។
ជាងបួនខែក្រោយសន្និបាតបក្សកុម្មុយនីស្តឡាវនៅខែមករា សភាជាតិឡាវបានបោះឆ្នោតជ្រើសរើសមេដឹកនាំថ្មីសម្រាប់ដឹកនាំក្បាលម៉ាស៊ីនរដ្ឋាភិបាល ដែលរួមមានតំណែងប្រធានាធិបតី និងតំណែងនាយករដ្ឋមន្ត្រី។ ការតែងតាំងនេះ ជាសញ្ញាបង្ហាញពីការបន្តសកម្មភាពអាថ៌កំបាំងរបស់ផ្ទៃក្នុងបក្សកុម្មុយនីស្តឡាវ ដែលគ្រប់គ្រងប្រទេសចាប់តាំងពីចប់សង្គ្រាមវៀតណាមមក។
នៅក្នុងកិច្ចប្រជុំសភានៅថ្ងៃទី២០ ខែមេសា ដែលផ្សាយតាមទូរទស្សន៍ផងនោះ ប្រធានសភាជាតិលោកស្រី Pany Yathotou ប្រកាសថា អគ្គលេខាធិការបក្សកុម្មុយនីស្តឡាវលោក ប៊ុនញ៉ាង វរ៉ាជិត (Bounnhang Vorachit) ត្រូវបានសមាជិកឯកភាពឲ្យកាន់តំណែងជាប្រធានាធិបតីជំនួសលោក ជុំម៉ាលី សាយ៉ាសន ( Choummaly Sayasone)។
ជាមួយគ្នានេះ សភាជាតិដែលមានសមាជិក១៤៩រូប ក៏បានសម្រេចជ្រើសរើសឧបនាយករដ្ឋមន្ត្រីលោក ថងលួន ស៊ីសូលីត (Thongloun Sisoulith) ជានាយករដ្ឋមន្ត្រីថ្មីផងដែរ។ លោក ថងលួន ដែលជារដ្ឋមន្ត្រីការបរទសដែរនោះ ត្រូវបន្តវេនពីលោក ថុងស៊ីង ថាម៉ាវង្ស (Thongsing Thammavong)។
បើតាមទីភ្នាក់ងារព័ត៌មាន Reuters ដំណើរការបោះឆ្នោតនិងជ្រើសរើសក្នុងសភាជាតិឡាវ ធ្វើទៅក្នុងរង្វង់ពេលមួយម៉ោងប៉ុណ្ណោះ។ បន្ទាប់ពីត្រូវបានជ្រើសរើសជាប្រធានាធិបតីលោក ប៊ុនញ៉ាង វរ៉ាជិត និយាយថា លោកនឹងប្រឹងប្រែងដើម្បីគោលនយោបាយសន្តិភាពលើឆាកអន្តរជាតិ ការបង្រួបបង្រួម មិត្តភាព និងសហប្រតិបត្តិការល្អ។
សូមរម្លឹកថា ឡាវជាប្រទេសដែលមានកំណើនសេដ្ឋកិច្ចខ្ពស់ក្នុងចំណោមប្រទេសមានកំណើនសេដ្ឋកិច្ចល្អដទៃទៀត។ ថ្វីបើពុំមានព្រំដែនសមុទ្រក៏ដោយ ឡាវមានកំណើនGDP ដល់ទៅ៧ភាគរយក្នុងរយៈពេលមួយទសវត្សរ៍ចុងក្រោយនេះ ដោយសារតែឡាវអាចផលិតថាមពលអគ្គីសនីយ៉ាងច្រើនលក់ទៅឲ្យអ្នកជិតខាង ជាពិសេសថៃតែម្ដង។
ទាក់ទិននឹងបញ្ហានយោបាយវិញ ឡាវមានទំនាក់ទំនងជិតស្និទ្ធជាមួយវៀតណាម ព្រោះមានរបបនយោបាយកុម្មុយនីស្តដូចគ្នា។ ប៉ុន្តែមួយរយៈក្រោយមក ចិនក៏ជ្រៀតចូលមកបញ្ចូលឥទ្ធិពលរបស់ខ្លួនផងដែរ៕
© រក្សាសិទ្ធិដោយ thmeythmey.com