អាមេរិក-កូរ៉េខាងត្បូង-ជប៉ុន ព្រមព្រៀងចាត់វិធានការប្រឆាំងការបង្កហេតុកូរ៉េខាងជើង

អន្តរជាតិ

អាមេរិក-កូរ៉េខាងត្បូង-ជប៉ុន ព្រមព្រៀងចាត់វិធានការប្រឆាំងការបង្កហេតុកូរ៉េខាងជើង

20, Apr 2016 , 4:58 pm

រូបភាព

ដោយ:

មន្ត្រីការទូតជាន់ខ្ពស់អាមេរិក ជប៉ុន និងកូរ៉េខាងត្បូង បានព្រមព្រៀងគ្នាក្នុងការចាត់វិធានការដើម្បីដាក់សម្ពាធទៅលើកូរ៉េខាងជើង ប្រសិននៅតែបន្តសកម្មភាពបង្កហេតុបន្ថែមទៀត។ ជំនួបនេះធ្វើឡើងបន្ទាប់ ពីមានការលេចចេញនូវរបាយការណ៍ចារកម្មមួយដែលបានបង្ហាញថាកូរ៉េខាងជើងត្រៀមបាញ់សាកល្បងនុយក្លេអ៊ែរជាលើកទីប្រាំ។

អនុរដ្ឋមន្ត្រីការបរទេសអាមេរិក Antony Blinken រួមជាមួយសមភាគីលោក លោកអនុរដ្ឋមន្ត្រីការបរទេស ជប៉ុន Akitaka Saiki និងអនុរដ្ឋមន្ត្រីការបរទេសកូរ៉េខាងត្បូង Lim Sung-nam នៅថ្ងៃទី១៩ ខែមេសា ម្សិលមិញ បានជួបពិភាក្សាគ្នាក្នុងក្រុងសេអ៊ូលលើស្ថានភាពវិវត្តចុងក្រោយនៅក្នុងឧបទ្វីបកូរ៉េ។ នេះ បើយោងតាមសារព័ត៌មានរុស្ស៊ី Sputnik International ដែលបានដកស្រង់ពីវិទ្យុ KBS World Radio ។

ក្នុងជំនួបនោះ ភាគីទាំងបី បានថ្លែងការណ៍ថ្កោលទោសយ៉ាងខ្លាំងលើសកម្មភាពដ៏គឃ្លើនរបស់កូរ៉េខាងជើងក្នុងការបាញ់សាកល្បងអាវុធនុយក្លេអ៊ែរ និងមីស៊ីល។ នេះបើយោងប្រភពព័ត៌មានដដែល ដែលបានដកស្រង់សម្តីលោកអនុរដ្ឋមន្ត្រីការបរទេសកូរ៉េខាងត្បូង Lim Sung-nam ដែរថា សហគមន៍អន្តរជាតិ មិនគួរលើកលែងសកម្មភាពបង្កហេតុរបស់កូរ៉េខាងជើងឡើយ ហើយកូរ៉េខាងជើង អាចប្រឈមនូវទណ្ឌកម្ម និងការទុកឲ្យនូវឯកាពីសហគមន៍អន្តរជាតិផងដែរ។

សូមបញ្ជាក់ផងដែរ ថ្មីៗនេះ មានរបាយការណ៍ចារកម្មមួយដែលចុងក្រោយត្រូវបានទទួលស្គាល់ដោយប្រធានាធិបតីកូរ៉េខាងត្បូង បានបង្ហាញថា កូរ៉េខាងជើង កំពុងតែត្រៀមបាញ់សាកល្បងអាវុធនុយក្លេ អ៊ែរលើកទី៥មុនពេលនៃសមាជជាតិរបស់ខ្លួនដែលសកម្មភាពនេះ បានបំពានទៅនឹងបម្រាមរបស់អង្គការសហប្រជាជាតិជាថ្មី។ ការបាញ់លើកទី៤របស់កូរ៉េខាងជើង ត្រូវបានធ្វើឡើងកាលពីថ្ងៃទី០៦ ខែ មករាកន្លងទៅ។

សូមរម្លឹកផងដែរថា ក្រុមប្រឹក្សាសន្តិសុខអង្គការសហប្រជាតិនៅថ្ងៃទី០២ ខែមីនាបានអនុម័តជាឯកច្ឆ័នលើសេចក្តីសម្រេចថ្មីមួយទៀតប្រឆាំងសកម្មភាពដ៏គឃ្លើនរបស់កូរ៉េខាងជើងក្នុងការបាញ់សាកល្បងគ្រាប់បែកមីស៊ីលតាំងពីឆ្នាំ២០១៤ និង២០១៥ និងជាពិសេសនោះការបាញ់គ្រាប់បែកបរមាណូនៅថ្ងៃទី០៦ ខែមករា និងនៅថ្ងៃទី០៧ ខែកុម្ភៈ ឆ្នាំ២០១៦នេះ។ សេចក្តីសម្រេចលេខ២២៧០ ដែលបានបញ្ញាត្តិ៥២ចំណុចនោះ ត្រូវបានចាត់ទុកថាជាទណ្ឌកម្មមួយដ៏ធ្ងន់ធ្ងរបន្ថែមលើទណ្ឌកម្មដែលបានអនុម័តដោយក្រុមប្រឹក្សាសន្តិសុខកន្លងមក៕