អន្តរជាតិ
ឥណ្ឌា អាមេរិក តាមដានសញ្ញានាវាមុជទឹកចិននៅមហាសមុទ្រឥណ្ឌា
× ឥណ្ឌានិងអាមេរិកកំពុងជជែកគ្នាពីកិច្ចសហប្រតិបត្តិការរួមដើម្បីតាមដានសញ្ញានាវាមុជទឹកក្នុងមហាសមុទ្រឥណ្ឌា។ វាជាសញ្ញាក្នុងការឈានឆ្ពោះទៅពង្រឹងចំណងការពារជាតិរវាងមហាអំណាចទាំងពីរ ហើយវាក៏កើតឡើងនៅមហាយក្សចិនបន្តបង្កើនសកម្មភាពយោធានៅតំបន់សមុទ្រចិនខាងត្បូង ដែលអាចបង្កផលប៉ះពាល់ដល់ការត្រួតត្រារបស់ឥណ្ឌានៅមហាសមុទ្រឥណ្ឌា។
សូមស្ដាប់ព័ត៌មានលម្អិត៖
ក្រសួងការពារជាតិឥណ្ឌានិងអាមេរិកកំពុងបន្តជជែកគ្នាពីការរៀបចំសហប្រតិបត្តិការរួមមួយដើម្បីតាមដានសញ្ញានាវាមុជទឹកនៅក្នុងមហាសមុទ្រឥណ្ឌា។ ការរៀបចំបង្កើតកិច្ចសហប្រតិបត្តិការរួមគ្នារវាងមហាអំណាចទាំងពីរធ្វើឡើងក្នុងគោលដៅពង្រឹងនិងពង្រីកទំនាក់ទំនងការពារជាតិ និងកិច្ចសហប្រតិបត្តិការសន្តិសុខផងដែរ។
យោងតាមទីភ្នាក់ងារព័ត៌មាន Reuters កិច្ចប្រតិបត្តិការនេះនឹងអាចធ្វើឡើងក្នុងក្របខណ្ឌនៃទំនាក់ទំនងរវាងកងទ័ពជើងទឹកឥណ្ឌា និងកងទ័ពជើងទឹកអាមេរិក។ ហើយមន្ត្រីយោធាអាមេរិកម្នាក់ដែលមិនបញ្ចេញអត្តសញ្ញាណនោះបានអះអាងថា វាជំហានដំបូងមួយដើម្បីឆ្ពោះទៅ ពង្រឹងសមត្ថភាពយោធាក្នុងសង្គ្រាមប្រឆាំងនាវាមុជទឹកថែមទៀតផង។ ហើយការពង្រឹងសមត្ថភាព និងយុទ្ធសាស្ត្រប្រឆាំងនាវាមុជទឹកនឹងត្រូវលើកទៅជជែកគ្នាក្នុងចំណោមកងទ័ពជើងទឹកទាំងពីរនៅពេលខាងមុខផងដែរ។
យ៉ាងណាក៏ដោយការពិភាក្សាគ្នាបង្កើតប្រតិបត្តិការរួមគ្នានេះ ត្រូវរៀបចំឡើងនៅពេលដែល អាមេរិកនិងឥណ្ឌា បង្ហាញក្តីបារម្ភខ្លាំងពីសកម្មភាពរបស់ចិនដែលកំពុងវាតទីនៅក្នុងតំបន់សមុទ្រចិនខាងត្បូង។ ហើយសកម្មភាពយោធានៅក្រោមសមុទ្ររបស់ចិនក៏កើតមានឡើងជាញឹកញាប់ផងដែរនៅក្នុងមហាសមុទ្រឥណ្ឌា។ ជាការពិតឥណ្ឌាបារម្ភថា ចិនកំពុងតែធ្វើសកម្មភាពដែលធ្វើឲ្យប៉ះពាល់ដល់ដែនឥទ្ធិពលរបស់ខ្លួនដែលស្ថិតនៅមហាសមុទ្រឥណ្ឌាផងដែរ។
បើតាមមន្ត្រីជើងទឹកឥណ្ឌា នាវាមុជទឹកចិន បានចូលមកក្នុងមហាសមុទ្រប៉ាស៊ីហ្វិក ជាមធ្យមចំនួន ៤ដងក្នុងរយៈពេល៣ខែ។ នាវាមុជទឹកខ្លះធ្វើដំណើរទៅក្បែរសមុទ្រអាន់ដាម៉ាន់ និងកោះ Nicobar ដែលស្ថិតនៅជ្រោយម៉ាឡាកា មុនបន្តដំណើរទៅសមុទ្រចិនខាងត្បូង។
សូមទាញការចាប់អារម្មណ៍បន្តិចដែរថា រដ្ឋាភិបាលក្រុង ញូដែលី បានឯកភាពជាមួយក្រុងវ៉ាស៊ីនតោនកាលពីខែមុនដើម្បីបើកផ្លូវឲ្យកងទ័ពអាមេរិកប្រើប្រាស់មូលដ្ឋានយោធារបស់ខ្លួនបានក្នុងករណីចាំបាច់ ហើយជាថ្នូរមកវិញ ឥណ្ឌានឹងទទួលបានឱកាសទទួលបានបច្ចេកវិទ្យាយោធាទំនើបរបស់អាមេរិកដើម្បីធ្វើយ៉ាងណារត់តាមឲ្យទាន់មហាយក្សចិន។
អាមេរិកនិងឥណ្ឌាធ្លាប់ធ្វើសមយុទ្ធយោធាជើងទឹករួមគ្នារួចហើយ ហើយនៅពេលខាងមុខនោះភាគីអាចប្រើប្រាស់យន្តហោះឈ្លបយកការណ៍ទំនើប P-8 ដើម្បីប្រមែរប្រមូលព័ត៌មាននិងចែករំលែកព័ត៌មាននោះក្នុងប្រតិបត្តិការតាមដានសញ្ញានាវាមុជទឹកផងដែរ។ យន្តហោះ P-8 ជាយន្តហោះទំនើបបំផុតមួយរបស់អាមេរិក ហើយឥណ្ឌាក៏មានយន្តហោះនេះប្រើប្រាស់ដែរ។ វាអាចមានសមត្ថភាពខ្ពស់ក្នុងការចាប់សញ្ញានាវាមុជទឹកដែលធ្វើដំណើរក្នុងសមុទ្រថែមទៀតផង។
ខណៈដែលមិនទាន់មានការបញ្ជាក់ពីកាលបរិច្ឆេទនៃការរៀបចំសហប្រតិបត្តិការក្នុងសង្គ្រាមប្រឆាំងនាវាមុជទឹកជាមួយអាមេរិកក៏ដោយ គេទទួលបានព័ត៌មានថា ឥណ្ឌា និងសហរដ្ឋអាមេរិក ត្រៀមរៀបចំសមយុទ្ធយោធាប្រឆាំងនាវាមុជទឹកនៅខែមិថុនាខាងមុខនេះនៅសមុទ្រហ្វីលីពីនខាងជើង។ ហើយជប៉ុន ដែលកំពុងធ្វើសកម្មភាពតាមដានសញ្ញានាវាមុជទឹករបស់ចិននៅតំបន់សមុទ្រប៉ាស៊ីហ្វិកខាងលិចនោះក៏នឹងចូលរួមក្នុងលំហាត់យោធាពហុភាគីនេះដែរ៕
© រក្សាសិទ្ធិដោយ thmeythmey.com