អន្តរជាតិ
រកឃើញកាក់សំរឹទ្ធសម័យរ៉ូម៉ាំង១៩ថូនៅអេស្ប៉ាញ ដែលមានតម្លៃរាប់លានដុល្លារ
×![]()
ដោយ: ធីតា
ក្រុមកម្មករនៅតំបន់ Tomares ក្រុង Seville ប្រទេសអេស្ប៉ាញ បានរកឃើញកាក់សម័យរ៉ូម៉ាំងប្រមាណ៦០០គីឡូក្រាម ដែលដាក់ក្នុងថូផ្សេងៗគ្នាចំនួន១៩ ។ តាមជំនាញកាក់សំរឹទ្ធទាំងនោះ គឺជាកំណប់ទ្រព្យតាំងពីសតវត្សរ៍ទី៤ ដែលមានតម្លៃរាប់លានដុល្លារអាមេរិក។
កាលពីចុងខែមេសា ឆ្នាំ២០១៦ អាជ្ញាធរតំបន់ Tomares នៃប្រទេសអេស្ប៉ាញ បានប្រកាសពីការរកឃើញដោយចៃដន្យនូវកាក់សំរឹទ្ធតម្លៃរាប់លានដុល្លារ នៅក្នុងការដ្ឋានមួយ។ អ្នកស្រី Ana Navarro នាយិការសារមន្ទីរបុរាណវិទ្យាប្រចាំក្រុង Seville បានថ្លែងប្រាប់អ្នកសារព័ត៌មានថា៖ «នេះជាការរកឃើញដ៏កម្រមួយ និងមិនដែលធ្លាប់កើតឡើងពីពេលមុនៗ។
ជាការសន្និដ្ឋានជំហានដំបូង កាក់នេះ គឺជាកំណប់ដែលនៅសេសសល់ពីសម័យអាណាចក្ររ៉ូម៉ាំងនាសតវត្សរ៍ ទី៣ និងទី៤ ។ បន្ទាប់ពីការរកឃើញដោយចៃដន្យនេះ ក្រុមកម្មករជីកដី ត្រូវស្នើសុំឲ្យផ្អាកការងារការដ្ឋាន ដើម្បីឲ្យក្រុមស្រាវជ្រាវផ្តើមការរុករកកំណប់ផ្សេងៗនៅក្នុងតំបន់ដែលមានពលរដ្ឋប្រមាណ២៥០០០នាក់នេះ។
អ្នកជំនាញវាយតម្លៃថា កាក់ទាំងនោះ ប្រហែលជាមិនទាន់ត្រូវបានប្រើប្រាស់នោះឡើយ ហើយវាក៏មិនមែនជាកម្មសិទ្ធិរបស់មនុស្សតែម្នាក់នោះដែរ។ កំណប់មហាសាលទាំងនោះ ទំនងជាត្រូវបានប្រើប្រាស់សម្រាប់ការបង់ពន្ធជូនដល់អធិរាជរ៉ូម៉ាំង៕
Tag:
រ៉ូម៉ាំង
អេស្ប៉ាញ
© រក្សាសិទ្ធិដោយ thmeythmey.com
