អន្តរជាតិ
ប្រធានាធិបតីថ្មីឡាវ បំពេញទស្សនកិច្ចនៅចិន បន្ទាប់ពីវៀតណាម ប្រធានាធិបតីថ្មីឡាវ លោក Bounnhang Vorachit
× ប្រព័ន្ធនយោបាយ រួមជាមួយនឹងកត្តាភូមិសាស្ត្រស្រដៀងគ្នា បានជំរុញឲ្យប្រទេសដែលគ្មានសមុទ្រមួយសោះឡាវ ត្រូវអោបក្រសោបសម្ព័ន្ធមិត្តចិន និងវៀតណាមដែលជាគូបដិបក្ខក្នុងជម្លោះអធិបតេយ្យក្នុងពេលជាមួយគ្នា។ ជាក់ស្តែងនោះបន្ទាប់ពីតែងតាំងក្បាលម៉ាស៊ីនឡាវថ្មី លោកប្រធានាធិបតី Bounnhang Vorachit បានចាប់ផ្តើមបំពេញទស្សនកិច្ចទៅកាន់បណ្តាប្រទេសពីរដែលជាត្រូវបានគេស្គាល់ថាជាមហាមិត្តគឺវៀតណាម និងចិនដែលដំណើរនោះត្រូវបានមើលឃើញថាការណែនាំខ្លួន ដែលត្រូវតែធ្វើឡើង ប្រកបដោយតុល្យភាព។
លេខាធិការបក្សកុម្មុយនីស្ត និងជាប្រធានាធិបតីថ្មីឡាវ លោក Bounnhang Vorachit នឹងបំពេញទស្សនកិច្ចសុឆន្ទៈផ្លូវការរយៈពេលបីថ្ងៃនៅក្នុងប្រទេសចិនដែលនឹងត្រូវចាប់ផ្តើមពីថ្ងៃទី០៣ដល់ថ្ងៃទី០៥ខែឧសភា។ ដំណើរនេះ ធ្វើឡើងក្រោមការអញ្ជើញដោយសមភាគីលេខាបក្សកម្មុយនីស និងជាប្រធានា ធិបតីចិន លោក ស៊ី ជិនពីង។ នេះបើយោងតាមភា្នក់ងារព័ត៌មាន Xinhua ដែលបានដកស្រង់ពីការអះអាងរបស់អ្នកនាំពាក្យនាយកដ្ឋានអន្តរជាតិបក្សកុម្មុយនីស្តចិន។
អ្វីដែលគួរកត់សម្គាល់នោះ ដំណើរទស្សនកិច្ចរបស់លោក Bounnhang Vorachit ទៅកាន់ចិន គឺជាប្រទេសទីពីរហើយដែលប្រមុខដឹកនាំថ្មីរូបនេះ ធ្វើដំណើរក្រៅប្រទេសក្នុងតួនាទីជាប្រធានាធិបតីរបស់ឡាវ។ នៅថ្ងៃទី២៥ដល់ទី២៧ ខែមេសាកន្លងទៅ លោក Bounnhang Vorachit បានបំពេញទស្សនកិច្ច ផ្លូវការក្រៅប្រទេសលើកដំបូងទៅកាន់វៀតណាមដែលទើបតែជ្រើសរើសក្បាលម៉ាស៊ីនរដ្ឋាភិបាលថ្មី ផងដែរនោះ។
ក្នុងដំណើរទស្សនកិច្ចបីថ្ងៃទៅកាន់អ្នកជិតខាង និងសម្ព័ន្ធមិត្តយូរឆ្នាំនោះ លោក Bounnhang Vorachit ក៏បានបញ្ជាក់ជាថ្មីពីគោលជំហរមិនប្រែប្រួលរវាងឡាវ និងវៀតណាម។ លោក បានថ្លែង ថាវៀតណាមជាប្រទេសទីមួយដែលលោកបំពេញទស្សនកិច្ចចាប់តាំងពីលោកត្រូវបានជ្រើសរើសជាមេដឹកនាំថ្មីរបស់ឡាវ ដែលនេះចង់បង្ហាញថាថ្នាក់ដឹកនាំឡាវគោរពឲ្យតម្លៃដល់ការពង្រឹងទំនាក់ទំនងប្រទេសទាំងពីរ។ លោក Bounnhang សង្កត់ធ្ងន់ថា «វៀតណាមនឹងនៅតែជាមិត្តជិតស្និទ្ធ និងទុកចិត្តបានរបស់ឡាវ»។
ឡាវ ត្រូវរក្សាគោលជំហរតុល្យភាពនៃអំណាចរវាងមហាមិត្តទាំងពីរ ចិន-វៀតណាម
ទាំងចិន និងវៀតណាម សុទ្ធសឹងតែជាដៃគូដ៏សំខាន់បំផុតដែលឡាវមិនអាចខ្វះបាន។ វៀតណាម បានក្លាយជាសម្ព័ន្ធមិត្តដ៏ជិតស្និទ្ធរបស់ឡាវ ចាប់តាំងពីឡាវ ទទួលបានឯករាជ្យពីម្ចាស់អាណានិគមបារាំងឆ្នាំ១៩៥៣។ ប្រទេសទាំងពីរ ធា្លប់ជាមូលដ្ឋានសង្គ្រាមគ្នាទៅវិញទៅមកក្នុងអំឡុងសង្គ្រាមឥណ្ឌូចិនលើកទី១ និងលើកទី២។ ស្របជាមួយនឹងភាពស្និទ្ធស្នាលនេះ ចិនក៏ជាសម្ព័ន្ធដ៏ធំរបស់ឡាវទាំងផ្នែកនយោបាយ និងសេដ្ឋកិច្ចផងដែរ។ ការលូតលាស់នៃសេដ្ឋកិច្ចឡាវ គឺជារឿងដែលមិនអាចប្រកែកបានថាជាចំណែកមួយដ៏ធំពីជំនួយ និងកិច្ចសហប្រតិបត្តិការរបស់ចិន។ ជាពិសេសនោះ ក្រោមកិច្ចសហប្រតិបត្តិការលើហេដ្ឋារចនាសម្ព័ន្ធ និងគំនិតផ្តួចផ្តើមជាច្រើនរបស់ចិនដែលរួមបញ្ចូលទាំងខ្សែក្រវ៉ាត់មួយ វិថីមួយ ផងដែរនោះ ឡាវ បានប្រែក្លាយពីប្រទេសដែលគ្មានសមុទ្រដ៏ឯកោ(Land Lock Nation) មកជាប្រទេសដែលមានការតភ្ជាប់ (Land-Linked Nation)។
យ៉ាងណាក៏ដោយ ពីក្រោយនៃទំនាក់ទំនងដ៏ជិតស្និទ្ធនេះ ឡាវ ក៏មានបញ្ហាទើសទាល់មួយដែលធ្វើឲ្យ ឡាវត្រូវមានគោលជំហរតុល្យភាពមួយរវាងដៃគូទាំងពីរនោះ។ បញ្ហាទើសទាល់នោះគឺ ជម្លោះសមុទ្រចិនខាងត្បូងដែលជាជម្លោះរួមរវាងចិនជាមួយនឹងសមាជិកអាស៊ានដែលរួមបញ្ចូលទាំងវៀតណាមផងដែរនោះ។ វៀតណាម និងចិន ធ្លាប់ប្រឈមមុខគ្នាទាំងផ្នែកការទូត និងផ្នែកយោធាជាច្រើនលើកច្រើនសារមកហើយដោយសារតែជម្លោះអធិបតេយ្យមួយនេះ។ ជាពិសេសនោះ ថ្មីៗនេះ ក៏ចាប់ផ្តើមការរិះគន់ជាបណ្តើរហើយ ក្រោយពីរដ្ឋាភិបាលក្រុងប៉េកាំង បានប្រកាសពីកិច្ចព្រមព្រៀងជាឯកច្ឆ័នជាមួយនឹងបណ្តាសមាជិកអាស៊ានរាប់បញ្ចូលទាំងឡាវពីបញ្ហាសមុទ្រចិនខាងត្បូង។
តិច ឬច្រើន ប្រសិន ឡាវ មានគោលជំហរងាកទៅរកភាគីណាមួយខ្លាំងនោះ ភាគីម្ខាង នឹងមានការអន់ចិត្តជាក់ជាពុំខាន។ ហើយអ្វីដែលសំខាន់នោះ ក្នុងនាមជាប្រធានអាស៊ានជាលើកទី២ក្នុងឆ្នាំ២០១៦ ឡាវ ដែលកំពុងតែដឹកនាំដោយប្រធានាធិបតីថ្មី Bounnhang Vorachit ត្រូវតែបែងចែកឲ្យបាននូវផលប្រយោជន៍ និងទំនាក់ទំនងជាមួយប្រទេសជិតខាងដើម្បីរក្សាកេរ្តិ៍ឈ្មោះក្នុងឆាកអន្តរជាតិ៕
© រក្សាសិទ្ធិដោយ thmeythmey.com