អន្តរជាតិ
នយោបាយជាតិ
ឯកឧត្តម កឹម សុខា ប្រហែលមិនចូលបំភ្លឺក្នុងតុលាការឡើយ
× ឯកឧត្តម កឹម សុខា ត្រូវបានព្រះរាជអាជ្ញាចេញដីកាកោះហៅ ឲ្យចូលខ្លួនមកបំភ្លឺនៅសាលាដំបូងរាជធានីភ្នំពេញ នៅថ្ងៃទី១១ ខែឧសភាខាងមុខនេះ ដើម្បីសាកសួរករណីបរិហារកេរ្តិ៍ កញ្ញា ធី សុវណ្ណថា ។ ព័ត៌មានកោះហៅឯកឧត្តម កឹម សុខា នេះត្រូវបានចុះផ្សាយដោយសារព័ត៌មាន Fresh News។ កញ្ញា ធី សុវណ្ណថា ប្តឹងឯកឧត្តម កឹម សុខា អនុប្រធានគណបក្សសង្គ្រោះជាតិ ពីបទ«បរិហារកេរ្តិ៍» ដោយទាមទារសំណង១លានដុលា្លរអាមេរិក។
ជុំវិញដីកាកោះហៅឯកឧត្តម កឹម សុខា លោក អេង ឆៃអ៊ាង ក៏មិនទាន់បានដឹងនិងទទួលបានដីកានៅឡើយទេ។ មន្ត្រីជាន់ខ្ពស់គណបក្សសង្គ្រោះជាតិរូបនេះ ហាក់ដូចជាហួសចិត្តនិងគ្មានវាចារអ្វីដែលឆ្លើយតបនឹងដីកាកោះហៅ ឯកឧត្តម កឹម សុខា នេះឡើយ។ តែយ៉ាងណាលោក អេង ឆៃអ៊ាង គ្រាន់តែបង្ហើបថា ប្រធានស្តីទីគណបក្សសង្គ្រោះជាតិ ប្រហែលជាមិនចូលបំភ្លឺតាមដីកានេះទេ ព្រោះសំអាងលើអភ័យឯកសិទ្ធិរដ្ឋសភា។
ថ្លែងប្រាប់សារព័ត៌មានថ្មីៗមន្ត្រីជាន់ខ្ពស់បក្សប្រឆាំងរូបនេះ បានបញ្ជាក់ដូច្នេះថា៖«ប្រហែលគាត់មិនចូលច្រើនជាង ព្រោះគាត់មានអភ័យឯកសិទ្ធិ ដែលចង់ចូលបំភ្លឺក៏បាន មិនចូលបំភ្លឺក៏បាន។ តែបើគេចង់រំលោភលើអភ័យឯកសិទ្ធិនេះ ឲ្យគេរំលោភទៀតទៅ»។
បើតាមលោក អេង ឆៃអ៊ាង ឯកឧត្តម កឹម សុខា មិនបានចេញទៅណាទេ ពោលគឺប្រធានស្តីទីកំពុងនៅក្នុងប្រទេសកម្ពុជា។
កញ្ញា ធី សុវណ្ណថា ធ្លាប់អះអាងថា ដើមឡើយ នាងមិនបានប្តឹងឯកឧត្តម កឹម សុខា នោះទេ តែនាងចង់ឲ្យតុលាការ វែករកមុខអ្នក ដែលបរិហារកេរ្តិ៍នាង ក្នុងខ្សែអាត់សំឡេង ដែលចោទប្រកាន់នាង បោកប្រាស់ប្រាក់មូលនិធិក្រៅប្រទេស យកទៅទិញឡាននិងផ្ទះប៉ុណ្ណោះ។ ប៉ុន្តែ បន្ទាប់ពី កញ្ញា ខុម ចាន់តារាទី ហៅស្រីមុំ បានទម្លាយរឿងអាស្រូវស្នេហា រវាងនាង ជាមួយឯកឧត្តម កឹម សុខា កញ្ញា ធី សុវណ្ណថា ក៏បានចាត់ទុកបុរសដែលបរិហារកេរ្តិ៍នាង ក្នុងខ្សែអាត់សំឡេង ថាជាឯកឧត្តម កឹម សុខា។ ដូច្នេះហើយ ទើបកញ្ញា ធី សុវណ្ណថា ប្តឹងឯកឧត្តម កឹម សុខា ដោយទាមទារសំណង១លានដុល្លារ និងស្នើឲ្យតុលាការ ដាក់ទោសអនុប្រធានគណបក្សប្រឆាំងរូបនេះតាមផ្លូវច្បាប់៕
Tag:
កឹម សុខា
ធី សុវណ្ណថា
© រក្សាសិទ្ធិដោយ thmeythmey.com