អន្តរជាតិ
មេ CIA ប្តេជ្ញាកម្ចាត់មេក្រុមដែស្ហ ក្នុងខួបនៃការស្លាប់របស់ ប៊ីនឡាដិន
× ក្នុងខួបលើកទី៥នៃការស្លាប់របស់មេដឹកនាំក្រុម អាល់កៃដា និងជាអ្នកដែលស្ថិតនៅពីក្រោយការវាយប្រហារអាគារពាណិជ្ជកម្មពិភពលោកឆ្នាំ ២០០១ លោក អូសាម៉ា ប៊ីនឡាដិន ប្រមុខស្ថាប័ន CIA លោក John Brennan ប្តេជ្ញាកម្ចាត់មេក្រុមភេរវជនរដ្ឋឥស្លាម។ លោកថា ការកម្ចាត់មេដឹកនាំក្រុមនេះនឹងមានឥទ្ធិពលធំធេងក្នុងការកម្ចាត់ភេរវកម្មពិភពលោក។
សូមស្ដាប់ព័ត៌មានលម្អិត៖
ក្នុងខួបលើកទី ៥ នៃការស្លាប់របស់មេដឹកនាំក្រុមអាល់កៃដា អូសាម៉ា ប៊ីនឡាដិន ប្រមុខភ្នាក់ងារចារកម្មមជ្ឈិម (CIA) លោក John Brennan បានប្រកាសតាមកម្ចាត់មេដឹកនាំក្រុមរដ្ឋឥស្លាមឬក្រុមដែស្ហ Abu Bakr al-Baghdadi។ លោកអះអាងថា គ្មានមន្ទិលសង្ស័យអ្វីទេដែលថា ក្រុមភេរវជនរដ្ឋឥស្លាមឬក្រុមដែស្ហនេះនឹងត្រូវកម្ចាត់ចោល ហើយរចនាសម្ព័ន្ធដឹកនាំក្រុមនេះនឹងត្រូវកម្ទេចចោលដែរនៅពេលខាងមុខ។
មន្ត្រីជាន់ខ្ពស់ទទួលបន្ទុកផ្នែកចារកម្មនេះបានពន្យល់ថា ការកម្ចាត់មេដឹកនាំក្រុមភេរវជនរដ្ឋឥស្លាមខាងលើនេះនឹងមានឥទ្ធិពលធំធេងលើប្រតិបត្តិការប្រឆាំងក្រុមភេរវជន។ នេះក៏ដោយសារការបាត់បង់មេដឹកនាំនឹងធ្វើឲ្យក្រុមភេរវជននេះចុះខ្សោយនិងបាត់បង់កម្លាំងក្នុងការបន្តប្រយុទ្ធ។
ជាឧទាហរណ៍ជាក់ស្តែង ដូចជាក្រុមអាល់កៃដា។ ក្រុមនេះ ធ្លាក់ចុះខ្សោយនៅក្រោយពេលដែលមេខ្លោងរបស់ខ្លួន អូសាម៉ា ប៊ីនឡាដិន ត្រូវទាហានអាមេរិកសម្លាប់ក្នុងប្រតិបត្តិការពិសេសឆ្នាំ ២០១១ នោះ។
-រំលឹកការស្លាប់របស់ប៊ិនឡាដិន
តាមពិតទៅ ប៊ីនឡាដិនបានស្លាប់ក្រោមស្នាដៃកងកម្លាំងពិសេសរបស់សហរដ្ឋអាមេរិកដែលត្រូវក្រុងវ៉ាស៊ីនតោនបញ្ជូនចេញពីអាហ្វហ្កានីស្ថានទៅវាយប្រហារទីតាំងមួយកន្លែងស្ថិតនៅទីក្រុងAbbottabad ប្រទេសប៉ាគីស្ថាន។
នាថ្ងៃ ២ខែឧសភា ឆ្នាំ ២០១១ កុម្ម៉ង់ដូរពិសេសរបស់អាមេរិកមួយក្រុមបានបើកប្រតិបត្តិការតាមប្រមាញ់មេដឹកនាំភេរវជន អូសាម៉ា ប៊ីនឡាដិន នៅទីក្រុង Abbottabad ។ ប្រតិបត្តិការពិសេស នោះត្រូវបានគេហៅឈ្មោះថា Neptune spear operation ដែលត្រូវរៀបចំឡើងក្រោមការសម្រេចចិត្តពិសេសរបស់ប្រធានាធិបតីបារ៉ាក់ អូបាម៉ា ក្រោយមានការជជែកពិភាក្សាគ្នាយ៉ាងយកចិត្តទុកដាក់ជាមួយមន្ត្រីចារកម្មនិងមន្ត្រីជាន់ខ្ពស់នៃរដ្ឋបាលលោក ។
ប្រតិបត្តិការចាប់ផ្តើមនៅម៉ោងប្រហែលម៉ោង ១ ពាក់កណ្តាលអាធ្រាតម៉ោងក្នុងតំបន់ឈានចូលថ្ងៃ ២ ឧសភា។ យន្តហោះកងកម្លាំងកុម្ម៉ង់ដូរពីរគ្រឿងនោះហោះចេញពីមូលដ្ឋានទ័ពអាមេរិកនៅអាហ្វហ្កានីស្ថាន ហើយបានទៅដល់ទីតាំង ដែលគេជឿជាក់ថា ប៊ីនឡាដិន កំពុងលាក់ខ្លួន ។ យន្តហោះទាំងនោះចុះចតយឺតៗ ខណៈដែលរាត្រីនោះគ្មានព្រះចន្ទនិងស្ងប់ស្ងាត់ល្អ។ ប៉ុន្តែបញ្ហាមួយកើតឡើង គឺកន្ទុយ ឧទ្ធម្ភាគចក្រមួយគ្រឿងប៉ះទង្គិចនឹងរបងនៃអាគារដែល ប៊ីនឡាដិនស្នាក់នោះនោះផង។
យ៉ាងណាមិញប្រតិបត្តិការនៅតែបន្តទៅមុខ ដោយកងកម្ម៉ង់ដូរពិសេសវាយឆ្មក់ចូលក្នុងអាគារ ហើយប្រតិបត្តិការមានរយៈពេល ៤០ នាទី។ ប៊ីនឡាដិនត្រូវបានកងកម្លាំងនោះសម្លាប់ ហើយមនុស្ស៤នាក់ផ្សេងទៀតរួមទាំងកូនប្រុសលោកផងនោះក៏ត្រូវបានគេសម្លាប់ដែរ។ ភ្លាមនោះសាកសព ប៊ីឡាដិនត្រូវបានគេដឹកជញ្ជូនទៅកាន់អាហ្វហ្កានីស្ថានភ្លាមដើម្បីធ្វើកោសល្យវិច្ច័យនិងកំណត់អត្តសញ្ញាណ។ក្រោយបានទទួលព័ត៌មានពីកងកម្លាំងពិសេស លោក បារ៉ាក់ អូបាម៉ា មិនបានបង្អង់យូរឡើយ ហើយលោកចេញមុខប្រកាសភ្លាមៗពីជោគជ័យដ៏ធំធេងនេះ៕
© រក្សាសិទ្ធិដោយ thmeythmey.com