អន្តរជាតិ
រដ្ឋាភិបាលថ្មីវៀតណាមរងការរិះគន់ ក្រោយត្រីរាប់លានក្បាលទើរនៅឆ្នេរសមុទ្រ
×![]()
ដោយ: តន ចាន់រិទ្ធារ៉ា
រដ្ឋាភិបាលថ្មីវៀតណាមកំពុងតែឈឺក្បាល នឹងត្រីរាប់លានក្បាលដែលងាប់ និងទើរតាមបណ្ដោយមាត់សមុទ្រនៅភូមិភាគកណ្ដាលនៃប្រទេស ដែលមានប្រវែង១២៥ម៉ាយ។ បញ្ហានេះ នឹងក្លាយជាការសាកល្បងសមត្ថភាពរដ្ឋាភិបាលវៀតណាម ដែលទើបឡើងកាន់តំណែងមិនទាន់បានមួយខែស្រួលបួលផងនោះ។
ត្រីរាប់លានក្បាលងាប់ និងទើរតាមបណ្ដោយឆ្នេរដ៏វែង របស់ភាគកណ្ដាលវៀតណាម កំពុងបង្កការព្រួយបារម្ភយ៉ាងខ្លាំង ដល់រដ្ឋាភិបាលថ្មីវៀតណាមរបស់នាយករដ្ឋមន្ត្រីលោក Nguyen Xuan Phuc ហើយវាក្លាយជាមេរៀនសាកល្បងដ៏ធំ សម្រាប់លោក Nguyen។ ប្រជាជនវៀតណាម បានរិះគន់រដ្ឋាភិបាលយ៉ាងខ្លាំង នៅតាមបណ្ដាញសង្គម ដ្បិតមិនមានតម្លាភាព និងឆ្លើយតបយឺត ចំពោះបញ្ហាដែលកើតឡើង ខណៈដែលអ្នកតវ៉ាជាច្រើន ប្រមូលគ្នានៅតាមទីក្រុងធំ និងបណ្ដាខេត្តនានា។
ចំពោះការងាប់សន្ធឹកសន្ធាប់បែបបនេះ រដ្ឋាភិបាលវៀតណាមនៅមិនទាន់ដឹងពីមូលហេតុ ដែលបណ្ដាលឲ្យត្រីរាប់លានក្បាលទើរតាមឆ្នេរ ក្នុងខេត្តចំនួនបួន ដែលកើតឡើងចាប់ពីថ្ងៃទី៦ដល់ទី១៨ ខែមេសា។ រដ្ឋាភិបាលវៀតណាមបញ្ជាក់ថា ការងាប់ច្រើនបែបនេះ បានប៉ះពាល់យ៉ាងខ្លាំងដល់សេដ្ឋកិច្ច និងបរិស្ថាន។
ទាក់ទិននឹងហេតុការណ៍នេះ គេព្រួយបារម្ភយ៉ាងខ្លាំង ចំពោះការបំផ្លាញលើបរិស្ថាន សុវត្ថិភាពចំណីអាហារ និងការគ្របគ្រងលើការរកស៊ី។ សារព័ត៌មាន Chicago Tribune ផ្សាយថា សារព័ត៌មានក្នុងស្រុកវៀតណាម បានលើកជាសំណួរ ពាក់ព័ន្ធនឹងបំពង់បង្ហូរសំរាមរបស់រោងចក្រដែក Formosa ដែលមានទីតាំងក្នុងខេត្ត Ha Tinh ។ យ៉ាងណាក្ដី នៅថ្ងៃទី២៦ ខែមេសា ក្រុមហ៊ុន Formosa បដិសេធមិនពាក់ព័ន្ធនឹងបញ្ហានេះទេ ដោយអះអាងថា ខ្លួនចាយលុយ៤៥លានដុល្លារ សម្រាប់ប្រព័ន្ធសម្អាតទឹក។
ជាមួយគ្នានេះ រដ្ឋាភិបាលវៀតណាមបញ្ជាក់ដែរថា ខ្លួនគ្មានភស្តុតាងបង្ហាញថា ក្រុមហ៊ុន Formosa ពាក់ព័ន្ធនឹងរឿងនេះទេ។ ប៉ុន្តែបើតាមអាជ្ញាធរ ត្រីទាំងនេះងាប់ដោយសារពុលសារធាតុតុកស៊ីន ដែលបញ្ចេញដោយសកម្មភាពមនុស្ស និងជំនោរក្រហម។
យ៉ាងណាមិញ ប្រជាជនវៀតណាមរាប់ពាន់នាក់ ធ្វើបាតុកម្មនៅតាមទីតាំងជាច្រើន ដោយរួមបញ្ចូលទាំងរដ្ឋធានីហណូយផងដែរ។ ព្រមគ្នានេះ លើបណ្ដាញហ្វេសប៊ុកឯណោះវិញ គេឃើញមាន ការចែករម្លែករូបធ្វើបាតុកម្មនៅខេត្តភាគខាងត្បូង និងភាគកណ្ដាល។ មួយវិញទៀត ប៉ូលិសក៏បានចាប់ខ្លួនមនុស្សពីរនាក់ ដែលប្រមូល និងចែកព័ត៌មានលើអ៊ីនធឺណិត ដើម្បីប្រមូលមនុស្សមកធ្វើបាតុកម្ម។
ការបាត់បង់ចំនួនត្រីដ៏ច្រើននេះ ក៏ប៉ះពាល់ដល់ឧស្សាហកម្មនេសាទ និងវិស័យទេសចរណ៍ផងដែរ។ អ្នកនេសាទក្នុងខេត្ត Quang Binh បានបាត់បង់ចំណូលចំនួនជាង៥លានដុល្លារ ខណៈដែលអ្នកទេសចរប្រមាណ៣០ភាគរយ លុបចោលគម្រោងកម្សាន្តទៅកាន់តំបន់នោះ៕
ត្រីរាប់លានក្បាលងាប់ និងទើរតាមបណ្ដោយឆ្នេរដ៏វែង របស់ភាគកណ្ដាលវៀតណាម កំពុងបង្កការព្រួយបារម្ភយ៉ាងខ្លាំង ដល់រដ្ឋាភិបាលថ្មីវៀតណាមរបស់នាយករដ្ឋមន្ត្រីលោក Nguyen Xuan Phuc ហើយវាក្លាយជាមេរៀនសាកល្បងដ៏ធំ សម្រាប់លោក Nguyen។ ប្រជាជនវៀតណាម បានរិះគន់រដ្ឋាភិបាលយ៉ាងខ្លាំង នៅតាមបណ្ដាញសង្គម ដ្បិតមិនមានតម្លាភាព និងឆ្លើយតបយឺត ចំពោះបញ្ហាដែលកើតឡើង ខណៈដែលអ្នកតវ៉ាជាច្រើន ប្រមូលគ្នានៅតាមទីក្រុងធំ និងបណ្ដាខេត្តនានា។
ចំពោះការងាប់សន្ធឹកសន្ធាប់បែបបនេះ រដ្ឋាភិបាលវៀតណាមនៅមិនទាន់ដឹងពីមូលហេតុ ដែលបណ្ដាលឲ្យត្រីរាប់លានក្បាលទើរតាមឆ្នេរ ក្នុងខេត្តចំនួនបួន ដែលកើតឡើងចាប់ពីថ្ងៃទី៦ដល់ទី១៨ ខែមេសា។ រដ្ឋាភិបាលវៀតណាមបញ្ជាក់ថា ការងាប់ច្រើនបែបនេះ បានប៉ះពាល់យ៉ាងខ្លាំងដល់សេដ្ឋកិច្ច និងបរិស្ថាន។
ទាក់ទិននឹងហេតុការណ៍នេះ គេព្រួយបារម្ភយ៉ាងខ្លាំង ចំពោះការបំផ្លាញលើបរិស្ថាន សុវត្ថិភាពចំណីអាហារ និងការគ្របគ្រងលើការរកស៊ី។ សារព័ត៌មាន Chicago Tribune ផ្សាយថា សារព័ត៌មានក្នុងស្រុកវៀតណាម បានលើកជាសំណួរ ពាក់ព័ន្ធនឹងបំពង់បង្ហូរសំរាមរបស់រោងចក្រដែក Formosa ដែលមានទីតាំងក្នុងខេត្ត Ha Tinh ។ យ៉ាងណាក្ដី នៅថ្ងៃទី២៦ ខែមេសា ក្រុមហ៊ុន Formosa បដិសេធមិនពាក់ព័ន្ធនឹងបញ្ហានេះទេ ដោយអះអាងថា ខ្លួនចាយលុយ៤៥លានដុល្លារ សម្រាប់ប្រព័ន្ធសម្អាតទឹក។
ជាមួយគ្នានេះ រដ្ឋាភិបាលវៀតណាមបញ្ជាក់ដែរថា ខ្លួនគ្មានភស្តុតាងបង្ហាញថា ក្រុមហ៊ុន Formosa ពាក់ព័ន្ធនឹងរឿងនេះទេ។ ប៉ុន្តែបើតាមអាជ្ញាធរ ត្រីទាំងនេះងាប់ដោយសារពុលសារធាតុតុកស៊ីន ដែលបញ្ចេញដោយសកម្មភាពមនុស្ស និងជំនោរក្រហម។
យ៉ាងណាមិញ ប្រជាជនវៀតណាមរាប់ពាន់នាក់ ធ្វើបាតុកម្មនៅតាមទីតាំងជាច្រើន ដោយរួមបញ្ចូលទាំងរដ្ឋធានីហណូយផងដែរ។ ព្រមគ្នានេះ លើបណ្ដាញហ្វេសប៊ុកឯណោះវិញ គេឃើញមាន ការចែករម្លែករូបធ្វើបាតុកម្មនៅខេត្តភាគខាងត្បូង និងភាគកណ្ដាល។ មួយវិញទៀត ប៉ូលិសក៏បានចាប់ខ្លួនមនុស្សពីរនាក់ ដែលប្រមូល និងចែកព័ត៌មានលើអ៊ីនធឺណិត ដើម្បីប្រមូលមនុស្សមកធ្វើបាតុកម្ម។
ការបាត់បង់ចំនួនត្រីដ៏ច្រើននេះ ក៏ប៉ះពាល់ដល់ឧស្សាហកម្មនេសាទ និងវិស័យទេសចរណ៍ផងដែរ។ អ្នកនេសាទក្នុងខេត្ត Quang Binh បានបាត់បង់ចំណូលចំនួនជាង៥លានដុល្លារ ខណៈដែលអ្នកទេសចរប្រមាណ៣០ភាគរយ លុបចោលគម្រោងកម្សាន្តទៅកាន់តំបន់នោះ៕
Tag:
វៀតណាម
© រក្សាសិទ្ធិដោយ thmeythmey.com
