អន្តរជាតិ
ត្រាំ និង សេនដឺ ឈ្នះ នៅ Indiana តែ ថេត គ្រុស ដកខ្លួនពីសង្វៀនទាំងខកចិត្ត
× លោកដូណាល់ត្រាំ និងលោក ប៊ែនី សេនដឺ បានទទួលជ័យជម្នះនៅក្នុងការបោះឆ្នោតសាកល្បងនៅរដ្ឋ Indiana នៅថ្ងៃអង្គារទី ៣ ខែឧសភានេះ។ ប៉ុន្តែរឿងដែលគួរឲ្យចាប់អារម្មណ៍នោះ គឺ គូប្រជែងលោក ដូណាល់ ត្រាំ សមាជិកព្រឹទ្ធសភារដ្ឋតិចសាសលោក ថេត គ្រុស សម្រេចចាកចេញពីសង្វៀននយោបាយ វាច្បាស់ណាស់ថានឹង បើកផ្លូវឲ្យសេដ្ឋីអចលនទ្រព្យ ដូណាល់ ត្រាំ នេះទទួលបានការតែងតាំងពីបក្សក្នុងខែកក្កដាខាងមុខនេះ។
លទ្ធផលបោះឆ្នោតនៅរដ្ឋ Indiana បង្ហាញថា លោក ដូណាល់ ត្រាំ (Donald Trump) ជាអ្នកដែលទទួលជ័យជម្នះ។ ជ័យជម្នះជាថ្មីនេះ មិនត្រឹមតែជួយឲ្យលោកកាន់តែខិតទៅរកការតែងតាំងពីបក្សប៉ុណ្ណោះទេ តែវាធ្វើឲ្យគូប្រជែងរបស់លោកសម្រេចដកខ្លួនពីការប្រកួតប្រជែងផងដែរ។
យោងតាមសារព័ត៌មានអាមេរិក Politico លោក ដូណាល់ បានទទួលសំឡេងគាំទ្រជាង ៥០ភាគរយ ហើយលោក ថេត គ្រុស(Ted Cruz) បានត្រឹមជាង៣៦ភាគរយ។ ចុងក្រោយគេគឺ លោក ចន កាសិក (John Kasich) ដែលបានសំឡេងគាំទ្រតែជាង៧ភាគរយ។ ជ័យជម្នះនៅរដ្ឋ Indiana នោះធ្វើឲ្យលោក ដូណាល់ ត្រាំ បានទទួលចំនួនអ្នកតំណាងរហូតដល់ ១០៤៧ ដែលមានន័យថា លោកនៅខ្វះចំនួនអ្នកតំណាងតែជាង ១០០ នាក់ទៀតប៉ុណ្ណោះដើម្បីឈានទៅទទួលការតែងតាំងពីបក្ស។ ដើម្បីឈ្នះការតែងតាំង ក្នុងបក្សសាធារណរដ្ឋ បេក្ខជនម្នាក់ត្រូវរកតំណាងឲ្យបាន ១២៣៧នាក់ ។ ដូច្នេះ ឈ្នះតែពីរ ឬបីរដ្ឋទៀតប៉ុណ្ណោះ លោក ដូណាល់ ត្រាំ រកបានអ្នកតំណាងគ្រប់ចំនួនរួចទៅហើយ។
ត្រលប់មកវិញ រឿងដែលគួរឲ្យភ្ងាក់ផ្អើលក្រោយការប្រកាសលទ្ធផលបោះឆ្នោតក្នុងបក្សសាធារណរដ្ឋ នោះគឺ លោក ថេតគ្រុស បានប្រកាសប្រាប់អ្នកគាំទ្រលោកទាំងទឹកមុខក្រៀមក្រំថា លោកឈប់ឃោសនាបោះឆ្នោតត្រឹមនេះហើយ។ អាចថា បរាជ័យនៅ Indiana នេះជាសារមួយសម្រាប់លោក និងក្រុមអ្នកគាំទ្រលោកថា គ្មានផ្លូវណាដែលអាចឈ្នះ ដូណាល់ ត្រាំ ឡើយ ហើយទោះនៅបន្តទៀតក៏គ្មានន័យអ្វីដែរ។ ការប្រជែងគ្នាក្នុងបក្សសាធារណរដ្ឋឈានដល់ទីបញ្ចប់ហើយ បើយោងតាមស្ថានភាពជាក់ស្តែងនេះ។
ចំណែកនៅក្នុងបក្សប្រជាធិបតេយ្យវិញ សមាជិកព្រឹទ្ធសភា រដ្ឋ Vermont បានផ្តួលគូប្រជែងរបស់លោក គឺលោកស្រី ហ៊ីឡារី គ្លីនតុន ក្នុងរដ្ឋ Indiana។ លោកបានទទួលសំឡេងគាំទ្រ ៥៣ភាគរយ ហើយលោកស្រី ហ៊ីឡារី គ្លីនតុន បានទទួល ៤៧ ភាគរយ។ អាចថា ការប្រជែងក្នុងបក្សប្រជាធិបតេយ្យនេះនៅតែស្វិតស្វាញ នៅឡើយថ្វីបើលោកស្រី ហ៊ីឡារី គ្លីនតុន ឈ្នះបានតំណាងច្រើនរហូតដល់ ២២០២នាក់ទៅហើយនោះ។ចំណែកលោក សេនដឺ ទើបបាន ១៤០០នាក់នៅឡើយ។ សូមបញ្ជាក់បន្តិចដែរ ក្នុងបក្សប្រជាធិបតេយ្យ បេក្ខជនម្នាក់ត្រូវរកអ្នកតំណាងឲ្យបានសរុប២៣៨៣នាក់ ដើម្បីឈានទៅទទួលបានការតែងតាំងពីបក្សប្រជាធិបតេយ្យ៕
© រក្សាសិទ្ធិដោយ thmeythmey.com