អន្តរជាតិ
បក្សប្រជាធិបតេយ្យសប្បាយចិត្ត ពេល ដូណាល់ ត្រាំ ឈានទៅឈ្នះការតែងតាំងពីបក្ស
× គូប្រជែងលោក ដូណាល់ ត្រាំ សមាជិកព្រឹទ្ធសភារដ្ឋតិចសាសលោក ថេត គ្រុស សម្រេចចាកចេញពីសង្វៀននយោបាយថ្ងៃ ទី៣ ឧសភានេះ ក្រោយពេលលោកចាញ់ឆ្នោតនៅរដ្ឋ Indiana។ ការដកខ្លួននេះនឹង បើកផ្លូវឲ្យសេដ្ឋីអចលនទ្រព្យ ដូណាល់ ត្រាំ ក្នុងការឆ្ពោះទៅទទួលបានការតែងតាំងពីបក្សក្នុងខែកក្កដាខាងមុខនេះផង។ តែក្នុងបក្សប្រជាធិបតេយ្យ ថ្វី បើលោក ប៊ែនី សេនដឺ ឈ្នះនៅ Indiana ហើយការប្រកួតក្នុងបក្សនៅស្វិតស្វាញក៏ដោយ គេនៅតែមើលឃើញថា លោកស្រី អតីតរដ្ឋមន្ត្រីការបរទេសអាមេរិក ហ៊ីឡារី គ្លីនតុន នឹងយកជ័យជម្នះមុនសមាជបក្សមកដល់។
សូមស្តាប់ការបកស្រាយរបស់លោក សៅ ផលនិស្ស័យ៖
ការប្រកួតប្រជែងក្នុងបក្សសាធារណរដ្ឋ ដល់ទីបញ្ចប់ទៅហើយ នៅពេលដែលសមាជិកព្រឹទ្ធសភារដ្ឋតិចសាសលោក ថេត គ្រុស ប្រកាសប្រាប់អ្នកគាំទ្រលោកទាំងទឹកមុខក្រៀមក្រំពីគម្រោងដកខ្លួនចេញពីយុទ្ធនាការឃោសនាបោះឆ្នោតនេះ។ លោកប្រាប់អ្នកគាំទ្រលោកបែបនេះក្រោយលទ្ធផលបោះឆ្នោតនៅរដ្ឋ Indiana បង្ហាញថា លោក ដូណាល់ ត្រាំ (Donald Trump) បានទទួលជ័យជម្នះជាថ្មីទៀត។
ថ្វីបើលោក ថេត គ្រុស ដែលជាអ្នកស្ថិតក្នុងលេខរៀងទី ២ ដកខ្លួនក៏ដោយ អភិបាលរដ្ឋ Ohio លោក ចន កាសិក (John Kasich )ដែលបានទទួលសំឡេងគាំទ្រតិចជាងគេរាល់ការបោះឆ្នោតសាកល្បងកន្លងមកនោះនៅរក្សាភាពស្ងៀមស្ងាត់ ហើយបន្តការឃោសនាទៅមុខទៀត។ តាមពិតទៅអ្នកគួរចាកចេញគួរតែអភិបាលរដ្ឋ Ohio នេះទេព្រោះកាលណាលោកនៅបន្តមានតែជួយបំបែកសំឡេងប៉ុណ្ណោះ។ កន្លងមកលោក ធ្លាប់ចងសម្ព័ន្ធភាពជាមួយលោក ថេត គ្រុស ដើម្បីរារាំងលោក ដូណាល់ ត្រាំ ដែរ ប៉ុន្តែចុងក្រោយលោក ចន កាសិក នេះក្បត់សន្យា។
១. ថេត គ្រុស ដកខ្លួន ព្រោះដឹងថាគ្មានលទ្ធភាពឈ្នះ
លទ្ធផលបោះឆ្នោតនៅរដ្ឋ Indiana បានបង្ហាញពីជ័យជម្នះរបស់លោក ដូណាល់ ត្រាំ ប្រៀបដូចជាវាយសំពោងលោក ថេត គ្រុស មួយព្រនង់ដូច្នេះដែរ។ លោករំពឹងទុកជាមុនថា លោកផ្តួលសេដ្ឋី ដូណាល់ ត្រាំ ក្នុងការបោះឆ្នោតសាកល្បងនេះ ព្រោះមានតែជ័យជម្នះនៅ Indiana ទេទើបលោកមានទឹកមានលេបនិងបន្តប្រកួតទៀតបាន។ បើឈ្នះនៅ Indiana មែន លោក ថេត គ្រុស សំឡឹងឃើញជ័យជម្នះបន្តនៅរដ្ឋ Cleveland។ តែគួរឲ្យសោកស្តាយ លទ្ធផលខុសឆ្ងាយពីការរំពឹងទុក។
បរាជ័យនៅរដ្ឋ Indiana ជាទឡ្ហីករណ៍មួយបង្ហាញក្រុមអ្នកគាំទ្រនិងលោក ថេត គ្រុស ផ្ទាល់នោះថា គ្មានផ្លូវណាដែលលោកអាចដើរទាន់លោក ដូណាល់ ត្រាំទេ។ បន្តធ្វើអ្វី បើបន្តទៅគ្មានន័យដដែល។ ដូច្នេះ ការដកខ្លួននោះជាជម្រើសមួយដ៏ត្រឹមត្រូវ។
ជ័យជម្នះនៅរដ្ឋ Indiana ជួយឲ្យលោក ដូណាល់ ត្រាំ បានទទួលចំនួនអ្នកតំណាងសរុបរហូតដល់ ១០៤៧ ដែលមានន័យថា លោកនៅខ្វះអ្នកតំណាងត្រឹមតែជាង ១០០ នាក់ទៀតប៉ុណ្ណោះដើម្បីឈានទៅទទួលការតែងតាំងពីបក្ស។ នេះក៏ដោយសារ ដើម្បីឈ្នះការតែងតាំង ក្នុងបក្សសាធារណរដ្ឋ បេក្ខជនម្នាក់ត្រូវរកតំណាងឲ្យបាន ១២៣៧នាក់ ។
២.ដូណាល់ ត្រាំ សប្បាយចិត្ត តែបក្សប្រជាធិបតេយ្យរឹតតែសប្បាយចិត្តជាងលោកទៅទៀត
នៅពេលដែល អវត្តមានរបស់លោក ថេត គ្រុស លោក ដូណាល់ ត្រាំ រីករាយខ្លាំង ព្រោះលោកនេះហើយជាអ្នកតំណាងបក្សសាធារណរដ្ឋដែលនឹងត្រូវចូលប្រកួតយកតំណែងប្រធានាធិបតីនៅខែវិច្ឆិកាខាងមុខ។ មហាសេដ្ឋីរូបនេះ រំពឹងមុតមាំថាលោកនឹងនាំជ័យជម្នះមកឲ្យបក្សសាធារណរដ្ឋ ដែលចាញ់ឆ្នោតពីរអាណត្តិមកហើយនោះ។
លោក ដូណាល់ ត្រាំ ប្រកាសភ្លាមៗក្រោយទទួលជ័យជម្នះនៅ Indiana ថាលោក នឹងឈ្នះនៅក្នុងខែវិច្ឆិកាហើយលោកប្តេជ្ញា នាំមកនូវការឯកភាពគ្នាក្នុងបក្សសាធារណរដ្ឋផងដែរ។
តែវាជារឿងស្រមៃកណ្តាលថ្ងៃទេដឹង។ បេក្ខជននាំមុខបក្សសាធារណរដ្ឋរូបនេះសប្បាយចិត្តនិងមានមោទនភាពចំពោះជ័យជម្នះកន្លងមក ហើយលោកគិតថា តំណែងប្រធានាធិបតីនឹងក្លាយជារបស់លោកផង។ ប៉ុន្តែលោក ដូណាល់ ត្រាំ មិនសក្តិសមជាដៃគូររបស់បេក្ខជនបក្សប្រជាធិបតេយ្យទោះជាលោក ប៊ែនី សេនដឺ ឬលោកស្រី ហ៊ីឡារី គ្លីនតុន ឡើយ។
វាជារឿងពិតមិនអាចប្រកែកបានឡើយដែលថា លោក ដូណាល់ ត្រាំ ឈ្នះភ្លូកទឹកភ្លូកដីក្នុងការបោះឆ្នោតសាកល្បងក្នុងបក្ស ហើយវាមិនមែនមានន័យថាលោកនឹងឈ្នះការបោះឆ្នោតថ្នាក់ជាតិដែរ។ យោងតាមសារព័ត៌មាន Huffington Post របាយការណ៍ស្ទង់មតិជារួមបង្ហាញថា លោក ដូណាល់ ត្រាំ ទទួលការគាំទ្រតិចជាងលោកស្រី ហ៊ីឡារី គ្លីនតុន បើនិយាយដល់ការបោះឆ្នោតថ្នាក់ជាតិ។ ដូច្នេះហើយទើបបក្សប្រជាធិបតេយ្យរីករាយជាងលោក ដូណាល់ត្រាំ ដែលនឹងក្លាយជាអ្នកឈ្នះការតែងតាំងពីបក្សផ្ទាល់ទៅទៀត។
ត្រលប់មកមើលក្នុងបក្សប្រជាធិបតេយ្យវិញម្តង។ សមាជិកព្រឹទ្ធសភា រដ្ឋ Vermont លោក ប៊ែនី សេនដឺ បានផ្តួលគូប្រជែងរបស់លោក គឺលោកស្រី ហ៊ីឡារី គ្លីនតុន ក្នុងរដ្ឋ Indiana ដោយលោកដណ្តើមបានសំឡេងគាំទ្រ ៥៣ភាគរយ ហើយលោកស្រី ហ៊ីឡារី គ្លីនតុន បានទទួល ៤៧ ភាគរយ។ ប៉ុន្តែគេវាយតម្លៃជាមុនរួចហើយថា លោកស្រី ហ៊ីឡារី គ្លីនតុន នឹងឈ្នះ ព្រោះលោកស្រីរកបានតំណាងច្រើនរហូតដល់ ២២០២នាក់ទៅហើយ។ ចំណែកលោក សេនដឺ ទើបបាន ១៤០០នាក់នៅឡើយ។ ក្នុងបក្សប្រជាធិបតេយ្យ បេក្ខជនម្នាក់ត្រូវរកអ្នកតំណាងឲ្យបានសរុប២៣៨៣នាក់ ដើម្បីឈានទៅទទួលបានការតែងតាំងពីបក្ស៕
© រក្សាសិទ្ធិដោយ thmeythmey.com