អន្តរជាតិ
នយោបាយអន្តរជាតិ
ប្រព័ន្ធមីស៊ីល S-500 ត្រៀមបម្រើវិស័យការពារជាតិរុស្ស៊ី រូបភាពតំណាង៖ ប្រព័ន្ធមីស៊ីល S-400
× ប្រព័ន្ធការពារដែនអាកាសឬប្រព័ន្ធមីស៊ីលប្រឆាំងយន្តហោះរុស្ស៊ីស៊េរីទំនើប S-500 នឹងបង្ហាញខ្លួននៅពេលឆាប់ៗនេះ។ ប្រព័ន្ធមីស៊ីលប្រឆាំងយន្តហោះ S-500 នឹងក្លាយជាប្រព័ន្ធការពារអាកាសទំនើបនិង មានសមត្ថភាពខ្ពស់បំផុតមួយ ហើយសូម្បីតែយន្តហោះចម្បាំងបំបាំងកាយដូចជា F-35 , F-22 និងយន្តហោះទម្លាក់គ្រាប់B-2 របស់អាមេរិកក៏ពិបាកគេចពីប្រព័ន្ធមីស៊ីលនេះដែរ។
ទាហានរុស្ស៊ីសង្ឃឹមថានឹងអាចទទួលបានប្រព័ន្ធមីស៊ីលប្រឆាំងយន្តហោះស៊េរីទំនើបនិងចុងក្រោយបំផុតម៉ាក S-500 នៅពេលឆាប់ៗខាងមុខនេះ។ ប៉ុន្តែក្រសួងការពារជាតិរុស្ស៊ីមិនបានបញ្ជាក់ច្បាស់ទេថា ថ្ងៃណាឬខែណាដែលសព្វាវុធនេះត្រូវដាក់ឲ្យប្រើប្រាស់ជាផ្លូវការនោះ។
យោងតាមសារព័ត៌មាន Rossiya-24 លោកឧត្តមសេនីយ៍ Viktor Gumyonny មេបញ្ជាការកងកម្លាំងការពារដែនអាកាសរុស្ស៊ីបានថ្លែងថា គម្រូដំបូងបំផុតនៃប្រព័ន្ធមីស៊ីល S-500 នេះនឹងត្រូវដាក់ឲ្យកងទ័ពរុស្ស៊ីប្រើប្រាស់ឆាប់ៗ ហើយវានឹងក្លាយជាសព្វាវុធដែលទំនើបនិងមានប្រសិទ្ធភាពបំផុតដែរក្នុងចំណោមសព្វាវុធលើពិភពលោក។ ហើយប្រព័ន្ធ S-500 មួយកងដំបូងនឹងត្រូវគេពង្រាយដើម្បីការពារទីតាំងសំខាន់ៗមានដូចជាក្រុងម៉ូស្គូ និងតំបន់ភាគខាងកណ្តាលរបស់រុស្ស៊ីផងដែរ។
បាញ់់បានចម្ងាយរហូតដល់ជាង ៦០០គីឡូម៉ែត្រ ដែលវាមានន័យថាវាអាចកម្ទេចមីស៊ីលប៉ាលីស្ទិកឆ្លងទ្វីបបានថែមទៀត។ រឿងដែលសំខាន់អាវុធនេះក៏អាចមានសមត្ថភាពវាយប្រហារកម្ទេចមីស៊ីលដែលហោះលើអាកាសបានចំនួន ១០ព្រមគ្នាតែម្តង។ ហើយបើតាមគម្រោងរបស់រុស្ស៊ី មីស៊ីលបាញ់ចេញពី S-500 អាចហោះបានល្បឿនរហូតដល់៥គីឡូម៉ែត្រក្នុងវិនាទីឯណោះ។
ក្រៅពីអ្វីដែលបានរៀបរាប់ខាងលើ ប្រព័ន្ធមីស៊ីល S-500 នេះមានលក្ខណៈសម្បត្តិពិសេសផ្សេងទៀតជាច្រើន ហើយលក្ខណៈសម្បត្តិមួយចំនួននោះដូចគ្នាទៅនឹងប្រព័ន្ធមីស៊ីលដែលអាមេរិកកំពុងប្រើប្រាស់ THAAD ផងដែរ។
សព្វាវុធទំនើបរបស់រុស្ស៊ីនេះ វានឹងកា្លយជាគ្រោះថ្នាក់ធំសម្រាប់ប្រទេសលោកខាងលិចជាពិសេសអាមេរិកផងដែរ។ សូម្បីតែយន្តហោះចម្បាំងបំបាំងកាយ F-22 និង F-35 រួមទាំងយន្តហោះទម្លាក់គ្រាប់បែក B-2 របស់អាមេរិកនោះក៏ពិបាកគេចឲ្យផុតពីប្រព័ន្ធមីស៊ីលនេះដែរ៕
© រក្សាសិទ្ធិដោយ thmeythmey.com