អន្តរជាតិ
អូស្ត្រាលី៖ ឈ្មោះ Wi-fi ដ៏គួរឲ្យភ័យខ្លាចមួយ បង្ខំឲ្យយន្តហោះចុះចតអស់ពីរម៉ោង
×![]()
ដោយ: ធីតា
យន្តហោះក្រុមហ៊ុន Qantas ដែលហោះហើរពីក្រុង Perth ទៅក្រុងមែលប៊ន ប្រទេសអូស្ត្រាលី បានបង្ខំចិត្តចុះចតរយៈពេល២ម៉ោងកាលពីចុងសប្តាហ៍កន្លងមក បន្ទាប់ពីអ្នកដំណើរម្នាក់ឃើញ Wi-Fi Hotspot មួយដែលមានឈ្មោះថា «mobile detonation device» (ឧបករណ៍បំផ្ទុះចល័ត)។
មុនពេលដែលយន្តហោះចេញពីអាកាសយានដ្ឋាន Melbourn Airport អ្នកដំណើរស្រីម្នាក់ បានឃើញ Wi-Fi ដែលមានឈ្មោះថា «mobile detonation device» (ឧបករណ៍បំផ្ទុះចល័ត)។ គាត់បានរាយការណ៍ទៅកាន់បុគ្គលិកយន្តហោះ បន្ទាប់មកពីឡុត និងភ្នាក់ងារសន្តិសុខអាកាសយានដ្ឋាន បានសម្រេចឲ្យយន្តហោះចុះចត ដោយខ្លាចក្រែងមានការគម្រាមកំហែងភេរវកម្ម។
បុគ្គលិកយន្តហោះ បានប្រាប់អ្នកដំណើរឲ្យរាយការណ៍ពី Wi-Fi ឈ្មោះដ៏សាហាវនេះ ប៉ុន្តែគ្មានអ្នកណាម្នាក់ចេញមុខឡើយ។ បន្ទាប់មក អ្នកដំណើរទាំងអស់ត្រូវបានស្នើឲ្យចុះពីយន្តហោះដើម្បីទទួលការត្រួតពិនិត្យសារជាថ្មី រួមទាំងកាបូបរបស់ពួកគេផងដែរ ប៉ុន្តែគ្មានអ្វីដែលគួរឲ្យសង្ស័យនោះឡើយ។
ក្រោយការចុះចតអស់រយៈពេល២ម៉ោង យន្តហោះសម្រេចហោះហើរធម្មតា ប៉ុន្តែក្នុងនោះ អ្នកដំណើរប្រមាណ៥០នាក់ បានធ្វើការបដិសេធ ដោយសម្រេចទៅជិះយន្តហោះជើងថ្មីមួយទៀត។ នេះបើតាមសេចក្តីរាយការណ៍របស់ Channel Seven។
គេជឿថា ម្ចាស់ Wi-Fi អាចស្ថិតក្នុងចំណោមមនុស្សដែលនៅអាកាសយានដ្ឋាន ដែលធ្វើឡើងក្នុងគោលបំណងលេងសើចតែប៉ុណ្ណោះ៕
Tag:
ប្លែក
© រក្សាសិទ្ធិដោយ thmeythmey.com
