ចន កាសិក ដកខ្លួនទុកឲ្យលោក ដូណាល់ ត្រាំ ក្លាយជាតំណាងបក្ស

អន្តរជាតិ

នយោបាយអន្តរជាតិ

ចន កាសិក ដកខ្លួនទុកឲ្យលោក ដូណាល់ ត្រាំ ក្លាយជាតំណាងបក្ស

05, May 2016 , 10:50 am

រូបភាព

ដោយ: ថ្មីៗ

បេក្ខជនបក្សសាធារណរដ្ឋ និងជាអភិបាលរដ្ឋ Ohio លោក ចន កាសិក (John Kasich) បានប្រកាសដកខ្លួនចេញពីការប្រកួតប្រជែងក្នុងបក្សនៅថ្ងៃ ៤ឧសភាម្សិលមិញនេះ។ ការដកខ្លួនរបស់លោកកើតឡើងមួយថ្ងៃក្រោយលោក ថេត គ្រុស (Ted Cruz) សម្រេចដកខ្លួនដែរ ហើយលោក ដូណាល់ ត្រាំ (Donald Trump) ក៏ក្លាយជាតំណាងបក្សជាស្វ័យប្រវត្តិ។

ចុងក្រោយ អភិបាលរដ្ឋ Ohio លោក ចន កាសិក ក៏ប្រកាសដើរចេញពីការប្រកួតប្រជែងក្នុងការបោះឆ្នោតក្នុងបក្សដែរ។ ការសម្រេចចិត្តនេះកើតឡើងត្រឹមមួយថ្ងៃប៉ុណ្ណោះក្រោយលោក ថេត គ្រុស ថាលោកបញ្ចប់យុទ្ធនាការបោះឆ្នោតរបស់លោក។ ការដកខ្លួនចេញរបស់អ្នកទាំងពីរ ជួយឲ្យលោក ដូណាល់ ត្រាំ ក្លាយជាអ្នកតំណាងរបស់បក្សសាធារណរដ្ឋជាស្វ័យប្រវត្តិ។

យ៉ាងណាមិញ កាលពីម្សិលមិញនេះ មុនមានការប្រកាសដកខ្លួនចេញជាផ្លូវការ លោក ចន កាសិក បានថ្លែងប្រាប់អ្នកគាំទ្រលោកថា មានតែលោកម្នាក់ប៉ុណ្ណោះដែលអាចផ្តល់ក្តីសង្ឃឹមសម្រាប់បក្សសាធារណរដ្ឋបាន។ ដែលមានន័យថា អ្នកសាធារណរដ្ឋត្រូវបន្តគាំទ្រលោក បើចង់ឃាំងលោក ដូណាល់ ត្រាំ មិនឲ្យបន្តទៅមុខទៀត។

តែបញ្ហាត្រង់ថា កន្លងមកលោក ចន កាសិក ស្ថិតនៅលេខរៀងក្រោមគេបង្អស់ ព្រោះមិនបានទទួលសំឡេងគាំទ្រច្រើនឡើយ។ បើនិយាយទៅ ទោះជាលោកត្រដរនៅក៏មិនមានលទ្ធភាពអ្វីផ្តួលសេដ្ឋីអចលនទ្រព្យលោក ដូណាល់ ត្រាំ ឡើយ។ លោកអាចមានសង្ឃឹមម្យ៉ាងគត់គឺ នៅបន្តឃោសនាដល់ថ្ងៃសមាជបក្សចុងក្រោយ ព្រោះពេលអ្នកសាធារណរដ្ឋប្រមូលផ្តុំគ្នា គេនឹងអាចសម្រេចជាថ្មីចំពោះអ្នកដែលត្រូវតំណាងបក្សទៅចូលរួមប្រកួតប្រជែងជាមួយបេក្ខជនបក្សប្រជាធិបតេយ្យ។

ប៉ុន្តែ វាមិនអាចទៅរួចឡើយ។ កន្លងមកលោក ដូណាល់ ត្រាំ បានព្រមានថានឹងបង្កើតបញ្ហានិងកុប្បកម្ម បើសិនជាគណបក្សសាធារណរដ្ឋមិនជ្រើសរើសលោកជាបេក្ខជនតំណាងគណបក្ស នៅពេលដែលលោកបានទទួលជ័យជម្នះបន្តបន្ទាប់និងបានសំឡេងគ្រប់គ្រាន់ហើយនោះ។

គេរំពឹងថា លោក ចន កាសិក ប្រហែលជាអាចឈរឈ្មោះប្រកួតប្រជែងយកតំណែងអនុប្រធានាធិបតី។ លោក ចន កាសិក ផ្ទាល់មិនបានបញ្ជាក់ឬបកស្រាយបែបណាទេ ចំពោះការប្រជែងយកតំណែងអនុប្រធានាធិបតីនេះ។ ប៉ុន្តែលោក ដូណាល់ ត្រាំ ដែលនាំមុខគេនិងជាក់ស្តែងក្លាយជាតំណាងរបស់បក្សទៅហើយនោះ បានថ្លែងនៅថ្ងៃពុធម្សិលមិញថា លោកពេញចិត្តលោក ចន កាសិក ហើយលោកក៏ចង់ឲ្យលោក ចន កាសិក ក្លាយជាអនុប្រធានាធិបតីនៅពេលដែលលោកក្លាយជាប្រធានាធិបតី៕