តំណាងប្រជាពលរដ្ឋ ដែលគ្រោងដង្ហែញត្តិទៅកាន់អង្គភាពប្រឆាំងអំពើពុករលួយ ត្រូវបានសាលារាជធានីភ្នំពេញ អញ្ជើញឲ្យចូលជួប។ ការកោះហៅនេះ គឺទាក់ទងនឹងគម្រោងតវ៉ាប្រឆាំងនឹងការឃុំខ្លួនមន្ត្រីអាដហុក និងគ.ជ.ប ទាក់ទងនឹងសំណុំរឿងស្រីមុំ ដ៏ល្បីល្បាញ។
ប្រជាពលរដ្ឋប្រមាណជា៥០០០នាក់ បានរួមគ្នាធ្វើលិខិតផ្លូវការមួយ ដើម្បីដាក់ជូនសាលារាជធានីភ្នំពេញ កាលពីថ្ងៃទី៤ ឧសភា។ ការដាក់លិខិតទៅកាន់សាលារាជធានីភ្នំពេញ គឺដើម្បីសុំអនុញ្ញាតពីអាជ្ញាធរ ក្នុងការដង្ហែញត្តិរួមគ្នា ទៅកាន់អង្គភាពប្រឆាំងអំពើពុករលួយ ដើម្បីតវ៉ាការឃុំខ្លួន មន្ត្រីអាដហុកនិងមន្ត្រីគ.ជ.ប។
លោកស្រី គឹម សារ៉ាន់ តំណាងប្រជាពលរដ្ឋមួយរូប ដែលបានផ្តិតមេដៃក្នុងលិខិតនោះ បានអះអាងថា ពួកគាត់មិនទាន់ទទួលបានការឆ្លើយតបពីអាជ្ញាធរទេ ជុំវិញសំណើរខាងលើ។ ប៉ុន្តែ ភាគីសាលារាជធានីភ្នំពេញ បានហៅទូរសព្ទទៅកាន់លោកស្រី ដើម្បីឲ្យលោកស្រីរួមទាំងតំណាងមួយចំនួនទៀត ដែលចូលរួមផ្តិតមេដៃ ចូលទៅកាន់សាលារាជធានីភ្នំពេញ នៅថ្ងៃទី៥ ខែឧសភានេះ។
តំណាងប្រជាពលរដ្ឋរូបនេះ មិនទាន់ដឹងច្បាស់ពីគោលបំណងនៃការកោះហៅរបស់សាលារាជធានីភ្នំពេញនោះទេ។ យ៉ាងណាក៏ដោយ លោកស្រី គឹម សារ៉ាត់ យល់ថា អាជ្ញាធរទំនងជាចង់សួរនាំពួកគាត់ ពីគម្រោងនៃការតវ៉ានៅមុខអង្គភាពប្រឆាំងអំពើពុករលួយហើយ ទើបបានជាចង់ជួបតំណាងពលរដ្ឋដោយផ្ទាល់បែបនេះ។
«អម្បាញ់មិញហ្នឹង គេតេមកខ្ញុំ គេឲ្យខ្ញុំ និងអ្នកផ្សេងទៀត ទៅសាលាក្រុង។ ឥឡូវហ្នឹងខ្ញុំកំពុងតែសួរពួកគាត់ថាទៅឬមិនទៅ។ ពួកខ្ញុំមិនទាន់សម្រេចចិត្តយ៉ាងម៉េចទេ ចាំពិភាក្សាគ្នាសិន»។ នេះជាការបញ្ជាក់បន្ថែមរបស់លោកស្រី គឹម សារ៉ាត់។
ជុំវិញបញ្ហានេះ សារព័ត៌មានថ្មីៗមិនអាចសុំការបំភ្លឺពីលោក ឃួន ស្រេង អភិបាលរងសាលារាជធានីភ្នំពេញ ឡើយ ដោយសារហៅទូរចូលដែរ តែលោកមិនបានបកស្រាយអ្វីនោះទេ ព្រោះកំពុងជាប់រវល់ហើយក៏បិទទូរសព្ទតែម្តង។
ខ្លឹមសារនៃលិខិតដែលដាក់ជូនសាលារាជធានីភ្នំពេញ បានឲ្យដឹងថា ប្រជាពលរដ្ឋប្រមាណជា២០០០នាក់ គ្រោងនឹងប្រមូលផ្តុំគ្នានៅមុខអង្គភាពប្រឆាំងអំពើពុករលួយ នៅថ្ងៃទី៧ ខែឧសភា ដើម្បីស្នើឲ្យបញ្ឈប់ការគំរាមកំហែង និងធ្វើទុក្ខបុកម្នេញមកលើសកម្មជនសិទ្ធិមនុស្សរួមទាំងមន្ត្រីអង្គការនានា។
ពេលថ្មីៗនេះ មន្ត្រីអាដហុក៤រូប រួមមាន លោក នី សុខា, លោក យី សុខសាន្ត, លោក ណៃ វង់ដា និងលោកស្រី លឹម មុន្នី ព្រមទាំងលោក នី ចរិយា អគ្គលេខាធិការរងរបស់គ.ជ.ប ត្រូវបានអង្គភាពប្រឆាំងអំពើពុករលួយឃាត់ខ្លួនរយៈពេល២ថ្ងៃ ដើម្បីសាកសួរពួកគេ ជុំវិញលិខិតចំហ របស់កញ្ញា ខុម ចាន់តារាទី ហៅស្រីមុំ។ បន្ទប់ពីសួរចប់សព្វគ្រប់ អង្គភាពប្រឆាំងអំពើពុករលួយ បានបញ្ជួនខ្លួនអ្នកទាំង៥ រួមទាំងសំណុំរឿង ទៅកាន់តុលាការ ដើម្បីអនុវត្តច្បាប់បន្ត។
ក្រោយសាកសួរអស់រយៈពេល២ថ្ងៃ តុលាការសម្រេចបញ្ជូនមន្ត្រីអាហុក ទៅឃុំខ្លួនបណ្តោះអាសន្ននៅពន្ធនាគារព្រៃស ក្រោមបទចោទ «សូកប៉ាន់សាក្សី» កាលពីថ្ងៃទី២ ឧសភា។ ចំណែកឯ មន្ត្រីគ.ជ.ប ត្រូវបាននាំខ្លួនទៅឃុំបណ្តោះអាសន្ន នៅពន្ធនាគារភ្នំពេញ (PJ) ក្រោមបទចោទ «សមគំនិតក្នុងរឿងសូកប៉ាន់សាក្សី» ៕