ចិន ទទូចឲ្យជប៉ុនកុំលូកដៃរឿងសមុទ្រចិនខាងត្បូង ហើយមើលប្រវត្តិសាស្ត្រខ្លួនឯង

អន្តរជាតិ

នយោបាយជាតិ

ចិន ទទូចឲ្យជប៉ុនកុំលូកដៃរឿងសមុទ្រចិនខាងត្បូង ហើយមើលប្រវត្តិសាស្ត្រខ្លួនឯង

05, May 2016 , 3:37 pm

រូបភាព

ដោយ:

ប៉ុន្មានថ្ងៃចុងក្រោយ នាយករដ្ឋមន្ត្រី និងរដ្ឋមន្ត្រីការបរទេសជប៉ុន បាននិងកំពុងតែបំពេញទស្សនកិច្ចផ្លូវ ការទៅកាន់តំបន់អឺរ៉ុប និងអាស៊ីអាគ្នេយ៍។ អំឡុងពេលនៃដំណើរទស្សនកិច្ចនោះ ជប៉ុន បានលើកឡើង ពីការព្រួយបារម្ភពីបញ្ហាសមុទ្រចិនខាងត្បូង ហើយការលើកឡើងនេះ បានធ្វើឲ្យចិន មិនសប្បាយចិត្តនោះទេ និងថែមទាំងទទូចកុំឲ្យលូកដៃបញ្ហានោះ។

អ្នកនាំពាក្យក្រសួងការបរទេសចិន លោក Hong Lei នៅថ្ងៃទី០៤ ខែឧសភាម្សិលមិញ បានប្រតិកម្ម ទៅនឹងការលើកឡើងរបស់ប្រមុខដឹកនាំជប៉ុនពីការព្រួយបារម្ភពីសកម្មភាពយោធូបនីយកម្មរបស់ចិន នៅក្នុងសមុទ្រចិនខាងត្បូង។ លោក ក៏បានទទូចឲ្យជប៉ុនបញ្ឈប់ការព្យាយាមលើកបញ្ហានេះ ដ្បិត ជប៉ុនគ្រាន់តែជារដ្ឋខាងក្រៅប៉ុណ្ណោះ។

នាឱកាសនៃសង្ខេបព័ត៌មានប្រចាំថ្ងៃ លោក Hong Lei បានអះអាងថា បើនិយាយពីបញ្ហាសមុទ្រចិនខាងត្បូង ជប៉ុនគ្រាន់តែជារដ្ឋខាងក្រៅប៉ុណ្ណោះ។ តែសកម្មភាពគ្រប់យ៉ាងវាហាក់ដូចជាចង់បង្ហាញពីវត្តមាននៅក្នុងជម្លោះនោះដែរ។ យ៉ាងណាក៏ដោយ លោក ថា សកម្មភាព ទាំងនោះមិនមានន័យអ្វី ឡើយសម្រាប់ចិន។

នាឱកាសដដែល អ្នកនាំពាក្យរូបនោះ បានសង្កត់ធ្ងន់ថា អ្វីដែលគួរគិតគូរនោះគឺ កំណត់ត្រាប្រវត្តិសាស្ត្រនៃចូលទៅកាន់កាប់ដោយខុសច្បាប់លើកោះរបស់ចិន និងតំបន់មួយចំនួននៅក្នុងសមុទ្រចិន ខាងត្បូងក្នុងអំឡុងសង្គ្រាមលោកលើកទី២។ ជាពិសេសនោះគឺ ការលាក់របៀបវារៈសមុទ្រចិនខាង ត្បូង។

សូមបញ្ជាក់ផងដែរជម្លោះសមុទ្រចិនខាងត្បូង គឺជាជម្លោះអធិបតេយ្យដែលមានរដ្ឋទាមទាររួមមាន ព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន។ ជម្លោះនេះ កំពុងតែវិវត្តដល់ស្ថានភាពមួយគួរព្រួយបារម្ភ ដ្បិតភាគីពាក់ព័ន្ធជាពិសេសនោះ ចិន និងហ្វីលីពីនដែលមានការជ្រៀមជ្រែងពីអាមេរិក និង ជប៉ុន បាននិងកំពុងតែពង្រឹងវិស័យយោធា។

កាលពីខែមេសាកន្លងទៅ ចិន ក៏ធ្លាប់ប្រតិកម្មខ្លាំងម្តងរួចទៅហើយជាមួយនឹងជប៉ុន នៅពេលជប៉ុន បានចេញផ្សាយពីសៀវភៅគោលនយោបាយការបរទេសឆ្នាំ២០១៦ដោយលើកពីបញ្ហាសមុទ្រចិនខាងត្បូង។ ក្នុងនោះ ចិន បានថ្លែងថាជប៉ុន គួរតែបញ្ឈប់ការបំផ្លើសបញ្ហាដែនសមុទ្រ និងការបង្កើតកំណត់សម្គាល់ដែលមិនមានការទទួលខុសត្រូវ ដែលអាចបង្កើតឲ្យមានភាពចម្រូងចម្រាសក្នុងទំនាក់ទំនងទ្វេភាគី ក៏ដូចជាស្ថានភាពនៅក្នុងតំបន់ទៀតផង៕