អន្តរជាតិ
នយោបាយអន្តរជាតិ
អាមេរិក និងរុស្សីយល់ព្រមពង្រីកបទឈប់បាញ់ឲ្យដល់ក្រុង Aleppo
× សហរដ្ឋអាមេរិក និងរុស្សី ឯកាភាពគ្នាលើការពង្រីកបទឈប់បាញ់ដែលនឹងលាតសន្ធឹងដល់ទីក្រុងAleppo ស្របពេលដែលមានការអំពាវនាវឲ្យមហាអំណាចទាំងពីររួមគ្នា បញ្ឈប់ការវាយប្រយុទ្ធគ្នារវាងកងម្លាំងរដ្ឋាភិបាលលោក អាសាដ និងក្រុមឧទ្ទាមប្រឆាំង។ សមរភូមិAleppo នេះមានការវាយតទល់គ្នាដ៏ខ្លាំងក្លា ដែលបណ្ដាលឲ្យមនុស្សជាច្រើនបាត់បង់ជីវិត។
សហរដ្ឋអាមេរិកនិយាយ នៅថ្ងៃទី៤ ខែមេសាថា ខ្លួននឹងរុស្សីព្រមព្រៀងលើបទឈប់បាញ់នៅក្រុងAleppo ដែលមានការប្រយុទ្ធគ្នាយ៉ាងតឹងតែងរវាងទាហានរដ្ឋាភិបាលលោកប្រធានាធិបតី បាសសា អាល់អាសាដ និងក្រុមឧទ្ទាម។ ហើយក្រសួងការបរទេសអាមរិកបញ្ជាក់ថា បទឈប់បាញ់នឹងមានប្រសិទ្ធភាពចាប់ពីម៉ោង១២ ព្រឹក ម៉ោងនៅក្នុងទីក្រុងដាម៉ាស់ ប៉ុន្តែការវាយប្រយុទ្ធនៅមិនទាន់ឈប់នៅឡើយទេ។
ក្នុងជំនួបជាមួយប្រមុខការបរទេសអឺរ៉ុបលោកស្រី Federica Mogherini រដ្ឋមន្ត្រីការបរទសអាមេរិក ចន ឃេរី (John Kerry) និយាយថា លោកមិនភ្ញាក់ផ្អើលទេដែលការប្រយុទ្ធបន្តមាន នៅតំបន់មួយចំនួននោះ ដោយពេលនេះទាំងអាមេរិក និងរុស្សីកំពុងទំនាក់ទំនងជាមួយមេបញ្ជាការនៅសមរភូមិផ្ទាល់។ លោក ឃេរី បន្តថា វាពិតជាសំខាន់ដែលភាគីទាំងពីរត្រូវគោរពកិច្ចព្រមព្រៀង ហើយលោកអំពាវនាវឲ្យរុស្សី ប្រើឥទ្ធិពលរបស់ខ្លួនលើលោក អាសាដ ឲ្យបញ្ឈប់អំពើហិង្សានេះដែរ។
យ៉ាងណាមិញ ទីភ្នាក់ងារព័ត៌មានReuter ផ្សាយថា មិនទាន់មានការឆ្លើតបអ្វីពីរុស្សី លើការប្រកាសនេះទេ ប៉ុន្តែទាហានស៊ីរី និយាយថា ពួកគេនឹងអនុវត្តនៅរយៈពេល៤៨ម៉ោង។ ជាមួយគ្នានោះដែរ ក្នុងការវាយប្រយុទ្ធថ្ងៃទី៣ ខែមេសា ក្រុមឧទ្ទាមត្រូវវាយឲ្យដកថយពីសំណាក់កងកម្លាំងរដ្ឋាភិបាល ដែលនេះបង្ហាញថា ការវាយប្រយុទ្ធនៅតែបន្តនៅឡើយ។
ចំណែកនៅឯក្រុមប្រឹក្សាសន្តិសុខអង្គការសហប្រជាជាតិ តំណាងរុស្សីប្រចាំក្រុមប្រឹក្សានេះលោក Vitaly Churkin និយាយថា តាមពិតបទឈប់បាញ់ទំនងជាត្រូវប្រកាសតាំងពីថ្ងៃទី៣ ខែមេសា តែក្រុមឧទ្ទាមប្រឆាំងបានរារាំងរឿងនេះ។ លោកប្រាប់ក្រុមប្រឹក្សា ស្ថានភាពយ៉ាប់យ៉ឺននៅតាមតំបន់មួយចំនួន រួមទាំងAleppo ពិតជាបញ្ហាព្រួយបារម្ភ ហើយកងកម្លាំងរដ្ឋាភិបាល កំពុងតែប្រយុទ្ធជាមួយក្រុមជីហាដ។
ជាមួយនឹងការឯកភាពលើការពង្រីកបទឈប់បាញ់ អាមេរិក និងរុស្សីក៏កំពុងតែធ្វើការជាមួយគ្នា ដើម្បីត្រួតពិនិត្យបទឈប់បាញ់ក្នុងក្រុងAleppo។ រដ្ឋមន្ត្រីការបរទេសអាមេរិក គ្រោងនឹងជួបប្រជុំជាមួយរដ្ឋមន្ត្រីការបរទេសនៃបណ្ដាក្រុមអន្តរជាតិគាំទ្រស៊ីរី ដែលមានលោក និងរដ្ឋមន្ត្រីការបរទេសរុស្សីលោក Sergei Lavrov ជាសហប្រធាន នៅពីរសប្ដាហ៍បន្ទាប់៕
Tag:
អាមេរិក
រុស្សី
ស៊ីរី
© រក្សាសិទ្ធិដោយ thmeythmey.com