អន្តរជាតិ
នយោបាយអន្តរជាតិ
រុស្សីនឹងឆ្លើយតប ប្រសិនណាតូបន្តពង្រាយទ័ពនៅអឺរ៉ុបខាងកើត និងបាល់ទិក
× ខណៈដែលណាតូប្រកាសផែនការពង្រាយទ័ពនៅតំបន់អឺរ៉ុបខាងកើត និងតំបន់បាល់ទិក រុស្សីបានឆ្លើយតបវិញថា ខ្លួននឹងចាត់វិធានការចាំបាច់ដើម្បីទប់ទល់នឹងការពង្រាយនេះ ជាមួយការបង្កើតអង្គភាពយោធាថ្មីមួយចំនួន។ សម្ព័ន្ធយោធាណាតូ មានគម្រោងពង្រាយកងទ័ពប្រមាណបួនពាន់នាក់នៅតំបន់ព្រំដែនខាងលិច និងខាងត្បូង សម្រាប់ការពារសម្ព័ន្ធមិត្តដែលជាប់នឹងរុស្សី។
មន្ត្រីក្រសួងការបរទេសរុស្សីលោក Andrei Kelin និយាយនៅថ្ងៃទី៤ ខែមេសាថា រុស្សីនឹងឆ្លើយតបនឹងផែនការរបស់បក្សសម្ព័ន្ធណាតូលើការពង្រាយកងកម្លាំងចំនួនបួនវរសេនាតូច នៅតាមព្រំដែនប្រទេសប៉ូឡូញ និងប្រទេសតំបន់បាល់ទិក។ រុស្សីចាត់ទុកផែនការពង្រាយនេះ ជាប្រភពនៃការព្រួយបារម្ភរបស់ក្រុងមូស្គូ ហើយរុស្សី នឹងចាត់វិធានការវាយបកវិញផងដែរ។
ការលើកឡើងរបស់មន្ត្រីជាន់ខ្ពស់រុស្សី គឺឆ្លើយតបនឹងផែនការថ្មីរបស់អាមេរិក និងណាតូដែលចង់ពង្រឹងកម្លាំងរបស់ខ្លួននៅតំបន់ខាងកើត។ នៅថ្ងៃទី២ ខែមេសា រដ្ឋមន្ត្រីការពារជាតិអាមេរិកលោក Ash Carter ប្រកាសថា ណាតូកំពុងតែថ្លឹងថ្លែងផ្លាស់ប្ដូរកងឯកភាពទ័ពចំនួនបួន នៅតាមរដ្ឋជាសមាជិកនៅអឺរ៉ុបខាងកើត ខណៈដែលការតានតឹងកើនឡើងក្នុងតំបន់នេះ។
ចំណែកមេបញ្ជាការថ្មីរបស់កងទ័ពណាតូលោកឧត្តមសេនីយ៍ Curtis Scaparrotti ក៏បញ្ជាក់ជំហររបស់លោកក្នុងការពង្រឹងសមត្ថភាពរបស់ខ្លួន ប្រឆាំងនឹងរុស្សី។ និយាយក្នុងពិធីទទួលតំណែង នៅថ្ងៃទី៤ ខែមេសា លោក Scaparrotti និយាយថា ណាតូពិចារណាថា គួរតែផ្ដល់អាវុធឲ្យអ៊ុយក្រែនឬទេ ស្របពេលដែលកងកម្លាំងអ៊ុយក្រែន កំពុងប្រយុទ្ធនឹងក្រុមឧទ្ទាមដែលគាំទ្រដោយរុស្សី។
ឆ្លើយតបនឹងរឿងពង្រាយទ័ពរបស់ណាតូនៅតំបន់អឺរ៉ុបខាងកើត លោក Kelin ប្រាប់សារព័ត៌មានInterfax ថា នេះជាជំហានដ៏គ្រោះថ្នាក់ ហើយវានឹងរងការឆ្លើយតបមួយមិនខាន។ កាលពីខែមករាកន្លងទៅ រុស្សីប្រកាសថា ខ្លួននឹងបង្កើតកងឯកភាពថ្មីចំនួនបី និងយកកងវរសេនាធំមីស៊ីលនុយក្លេអ៊ែរយុទ្ធសាស្ត្រ ថ្មីចំនួន៥មកប្រើប្រាស់ផងដែរ។
ជាមួយគ្នានេះ នៅថ្ងៃទី៣ ខែមេសា រដ្ឋមន្ត្រីការពារជាតិរុស្សីលោក Sergei Shoigu និយាយថា កងឯកភាពថ្មី នឹងត្រូវបង្កើតនៅដំណាច់ឆ្នាំនេះ ដោយលោកសង្កត់ធ្ងន់ថា បង្កើតឡើងដើម្បីតបតនឹងអ្វីដែលក្រុងមូស្គូយល់ថា ជាការកើនកម្លាំងរបស់ណាតូ។ បើតាមប្រភពព័ត៌មានរបស់រុស្សី អង្គភាពនីមួយៗដែលត្រូវបង្កើត មានកងទ័ពប្រមាណ១ម៉ឺននាក់។
សូមរម្លឹកថា ការភ្ជាប់តំបន់គ្រីមេចូលទឹកដីរុស្សីក្នុងឆ្នាំ២០១៤ បង្កជាការតានតឹងយ៉ាងខ្លាំងរវាងណាតូ និងរុស្សី។ ប្រទេសអឺរ៉ុបខាងកើត និងបាល់ទិក ដូចជាលីទុយអានី អេស្តូនី និងឡាត់វី ស្នើឲ្យសម្ព័ន្ធមិត្តណាតូចូលអន្តរាគមន៍លើទឹកដីរបស់ខ្លួន សម្រាប់ទប់ទល់រុស្សី។ ការពង្រីកឥទ្ធិពលនេះហើយ ដែលធ្វើឲ្យរុស្សីមិនសប្បាយចិត្តនោះទេ ជាពិសេសនៅពេលដែលណាតូធ្វើសមយុទ្ធយោធា នៅក្បែរព្រំដែនរបស់ខ្លួនទៀតនោះ៕
Tag:
រុស្សី
ណាតូ
អឺរ៉ុប
© រក្សាសិទ្ធិដោយ thmeythmey.com