អន្តរជាតិ
នយោបាយអន្តរជាតិ
មីយ៉ាន់ម៉ា គ្រោងចុះកិច្ចព្រមព្រៀងការពារជាតិថ្មីមួយជាមួយនឹងរុស្ស៊ី រូបភាព៖ ក្រសួងការពារជាតិរុស្ស៊ី
×
ចុងក្រោយនេះ រុស្ស៊ី បាននិងកំពុងតែងាកមកបន្តកិច្ចសហប្រតិបត្តិការជិតស្និទ្ធឡើងវិញជាមួយនឹង បណ្តាប្រទេសមួយចំនួននៅតំបន់អាស៊ីអាគ្នេយ៍។ ដើម្បីទាញយកឱកាសនេះ ក្រសួងការពារជាតិមីយ៉ាន់ម៉ាក៏គ្រោងនឹងចុះកិច្ចព្រមព្រៀងការពារជាតិថ្មីមួយជាមួយរុស្ស៊ី បន្ទាប់ពីទទួលបានការអនុញ្ញាតពីសភា។
ក្រសួងការពារជាតិមីយ៉ាន់ម៉ា កំពុងតែដាក់សំណើទៅកាន់សភាសហភាពដើម្បីអនុម័តយល់ព្រមសម្រាប់ការចុះហត្ថលេខាលើកិច្ចព្រមព្រៀងសហប្រតិបត្តិការការពារជាតិជាមួយនឹងរុស្ស៊ី។ សំណើ នេះធ្វើឡើង ក្រោយតែប៉ុន្មានថ្ងៃប៉ុណ្ណោះនៃកិច្ចប្រជុំរដ្ឋមន្ត្រីការពារជាតិរុស្ស៊ី និងអាស៊ាននៅក្នុងក្រុង មូស្កូនៃប្រទេសរុស្ស៊ី។
អនុរដ្ឋមន្ត្រីការពារជាតិមីយ៉ាន់ម៉ា លោកឧត្តមសេនីយ៍ Myint Swe ដែលជាអ្នកដាក់សំណើនោះ បាន អះអាងថា ការចុះហត្ថលេខាលើកិច្ចព្រមព្រៀងជាមួយនឹងរុស្ស៊ី នឹងបង្កើតកិច្ចសហប្រតិបត្តិការកម្រិតថ្មីមួយទៀតរវាងប្រទេសទាំងពីរ ហើយ វា ក៏ជួយជំរុញកិច្ចសន្ទនា និងការយោគយល់រួមគ្នានៃគោល នយោបាយការពារជាតិទាំងក្របខណ្ឌសន្តិសុខអន្តរជាតិ និងតំបន់។ នេះបើយោងតាមសារព័ត៌មាន Xinhua ដែលដកស្រង់ចេញពីសារព័ត៌មានក្នុងស្រុកមីយ៉ានម៉ា។
ជាមួយគ្នានេះ មេបញ្ជាការកំពូលកងទ័ពមីយ៉ាន់ម៉ា លោក ឧត្តមសេនីយ៍ មិន អ៊ុងឡាំង ក៏បានស្នើឲ្យរុស្ស៊ីបន្តចូលរួមចំណែកក្នុងការធានាសន្តិភាពពិភពលោក ដែលកំពុងតែប្រឈមនឹងអស្ថិរភាពដែល បង្កដោយបញ្ហាប្រឈមនយោបាយ សេដ្ឋកិច្ច សង្គម និងសាសនានៅក្នុងតំបន់មួយចំនួន។
នៅថ្ងៃទី២៦ ខែមេសាកន្លងទៅ រដ្ឋមន្ត្រីការពារជាតិមីយ៉ាន់ម៉ា លោក Sein Win ក៏បានជួបជាមួយនឹងរដ្ឋមន្ត្រីការពារជាតិរុស្ស៊ី លោក Sergey Shoigu ជាលក្ខណៈទ្វេភាគី នាឱកាសនៃកិច្ចប្រជុំការពារជាតិរុស្ស៊ីនិងអាស៊ានក្នុងទឹកដីរុស្ស៊ី។
ក្នុងជំនួបក្រៅកិច្ចប្រជុំនោះ ក្រៅពីការអះអាងឡើងវិញនូវទំនាក់ទំនងការទូត ប្រមុខការពារជាតិរុស្ស៊ី លោក Sergey Shoigu ក៏បានបង្ហាញពីក្តីសង្ឃឹមយ៉ាងមុតមាំថាជំនួបរុស្ស៊ីនិងមីយ៉ាន់ម៉ា នឹងកាន់តែរឹងមាំ ជាពិសេសលើវិស័យយោធា និងបច្ចេកទេសយោធា។ នាពេលនោះដែរ មេដឹកនាំមីយ៉ាន់ម៉ា ក៏បាន អរគុណភាគីរុស្ស៊ី និងកងទ័ពរុស្ស៊ី ដែលតែងតែគាំទ្រមីយ៉ាន់មា់នៅពេលប្រទេសជួបនឹងភាពលំបាក៕
Tag:
មីយ៉ាន់ម៉ា់
រុស្ស៊ី
© រក្សាសិទ្ធិដោយ thmeythmey.com