អន្តរជាតិ
នយោបាយអន្តរជាតិ
អ្នកសាធារណរដ្ឋពិបាកសម្រេចថាគួរគាំទ្រឬមិនគាំទ្រលោក ដូណាល់ ត្រាំ?
× អតីតប្រធានសភាអាមេរិក លោក John Boehner ប្រកាសថាលោកនឹងចូលរួមក្នុងសមាជបក្សសាធារណរដ្ឋ ខែកក្កដាដែលនឹងត្រូវរៀបចំឡើយនៅ Cleveland។ លោកទំនងជានឹងបោះឆ្នោតគាំទ្រលោក ដូណាល់ ត្រាំ ទោះជាអ្នកសាធារណរដ្ឋខ្លះមិនគាំទ្រក៏ដោយ។ តែប្រធានសភាបច្ចុប្បន្នលោក Paul Ryan ថាលោក មិនទាន់ត្រៀមលក្ខណៈប្រកាសគាំទ្រលោកឡើយ។
អ្នកសាធារណរដ្ឋកំពុងតែខ្វែងគំនិតគ្នាជុំវិញជ័យជម្នះរបស់លោក ដូណាល់ ត្រាំ ក្នុងការក្លាយជាតំណាងរបស់គណបក្សដែលត្រូវចូលរួមក្នុងការបោះឆ្នោតខែវិច្ឆិកាខាងមុខ។ ខ្លះថា ខ្លួនមិនគាំទ្រលោក ដូណាល់ ត្រាំ ឡើយ ។ តែអ្នកសាធារណរដ្ឋខ្លះទៀតថា គេនឹងចូលរួមក្នុងសមាជដើម្បីគាំទ្រលោក ដូណាល់ ត្រាំ។
ក្នុងចំណោមអ្នកគាំទ្រសេដ្ឋីអចលនទ្រព្យលោក ដូណាល់ ត្រាំ គឺលោក John Boehner អតីតប្រធានសភា ដែលទើបចុះចេញពីតំណែងចុងឆ្នាំមុន។ អ្នកនាំពាក្យរបស់អ្នកនយោបាយខាងលើនេះបានបញ្ជាក់នៅថ្ងៃ ព្រហស្បតិ៍ទី ៥ ឧសភាម្សិលមិញនេះថា លោក John Boehner នឹងចូលរួមក្នុងសមាជបក្សដែលនឹងត្រូវរៀបចំឡើងនៅខែកក្កដាខាងមុខ។
គេរំពឹងថាលោក John Boehner នឹងបោះឆ្នោតគាំទ្រនិងលើកសរសើរលោក ដូណាល់ ត្រាំ នៅពេលខាងមុខផងដែរ។ នេះក៏ព្រោះថា លោកមានទំនាក់ទំនងល្អជាមួយបេក្ខជនដូណាល់ ត្រាំនេះ។ អ្នកទាំងពីរក៏ឧស្សាហ៍ចេញវាយកូនហ្កោលជាមួយគ្នាដែរកន្លងមក។
ចំណែកអ្នកដែលមើលឃើញ លោក ដូណាល់ ត្រាំ ក្នុងផ្លូវអវិជ្ជមាននោះមានច្រើនដែរ។ ហើយពួកគេនឹងមិនចេញមុខគាំទ្រ និងបោះឆ្នោតឲ្យលោកឡើយ។ ម្សិលមិញនេះ អ្នកនាំពាក្យរបស់អតីតប្រធានាធិបតីអាមេរិកត្រកូលប៊ុស (Bush) ទី ៤១ និង ទី ៤៣ ប្រកាសថា អ្នកនយោបាយទាំងពីរនាក់គ្មានគម្រោងប្រកាសគាំទ្រលោក ដូណាល់ ត្រាំឡើយ ហើយអ្នកទាំងពីរក៏បានដកខ្លួនចេញពីនយោបាយហើយ។ ការធ្វើបែបនេះ វាផ្ទុយពីទម្លាប់ដែលអតីតប្រធានាធិបតីធ្លាប់ធ្វើកន្លងមក ហើយវាក៏បង្ហាញពីការបែកខ្ញែកគ្នាក្នុងបក្សដែរ។
ត្រលប់មកមើល អ្នកសាធារណរដ្ឋដែលមានឥទ្ធិពលខ្លាំងលោក Paul Ryan ជាប្រធានសភាវិញម្តង។ លោកមិនគាំទ្រលោក ដូណាល់ ត្រាំឡើយ។ ម្សិលមិញនេះ លោក Paul Ryan បានប្រកាសរួចហើយថា លោកមិនទាន់ត្រៀមខ្លួនរួចរាល់ឡើយដើម្បីបោះឆ្នោតគាំទ្រលោក ដូណាល់ ត្រាំ ។ ប្រធានសភារូបនេះ បានបញ្ជាក់ជាមុនថា បើសិនលោក ដូណាល់ ត្រាំ ពិតជាចង់បានទទួលការគាំទ្រពីសមាជិកបក្ស លោកចាំបាច់ត្រូវធ្វើយ៉ាងណាបង្ហាញពីសមត្ថភាពនិងលក្ខណៈសម្បត្តិដែលសក្តិសមជាអ្នកអភិរក្សដែលអាចបង្រួបបង្រួមបក្សបានជោគជ័យ៕
Tag:
ដូណាល់ ត្រាំ
John Boehner
Paul Ryan
© រក្សាសិទ្ធិដោយ thmeythmey.com