លោក អាបេ ត្រៀមជួបលោក ពូទីន ដើម្បីជជែករកដំណោះស្រាយជម្លោះកោះគូរីល

អន្តរជាតិ

នយោបាយអន្តរជាតិ

លោក អាបេ ត្រៀមជួបលោក ពូទីន ដើម្បីជជែករកដំណោះស្រាយជម្លោះកោះគូរីល

06, May 2016 , 4:59 pm

រូបភាព

ដោយ: ថ្មីៗ

លោក ស៊ីនហ្សូ អាបេ រំពឹងថា ជំនួបជាមួយលោក វ្ល៉ាឌីមៀ ពូទីន ខាងមុខ នឹងជួយឲ្យការពិភាក្សាលើការបង្កើតកិច្ចព្រមព្រៀងសន្តិភាពក្រោយសង្គ្រាមលោកលើកទី២ និងការដោះស្រាយជម្លោះកោះរវាងប្រទេសទាំងពីរនោះវិវត្តទៅមុខ។ តែបញ្ហាពិភពលោកច្រើនដែលភាគីនៅខ្វែងគំនិតគ្នាក្នុងនោះមានសង្គ្រាមស៊ីរី វិបត្តិអ៊ុយក្រែន និងបញ្ហានុយក្លេអ៊ែរកូរ៉េខាងជើង។

នាយករដ្ឋមន្ត្រីជប៉ុនលោក ស៊ីនហ្សូ អាបេ ជួបជាមួយប្រមុខរដ្ឋរុស្ស៊ីលោក វ្ល៉ាឌីមៀ ពូទីន នៅថ្ងៃសុក្រទី ៦ខែឧសភានេះ នៅតំបន់លំហែរកាយនាសមុទ្រខ្មៅ ក្នុងទីក្រុង Sochi។ ជំនួបជាប្រវត្តិសាស្ត្រនេះនឹងក្លាយជាពេលវេលាសំខាន់មួយសម្រាប់មេដឹកនាំទាំងពីរជជែកពិភាក្សានិងស្វែងរកដំណោះស្រាយសម្រាប់ជម្លោះដែនទឹកដែលបន្សល់ទុកមកយូរអង្វែងមកហើយនោះ។

ខណៈកំពុងស្ថិតដំណើរទស្សនកិច្ចនៅអឺរ៉ុប លោក អាបេ បានថ្លែងប្រាប់អ្នកសារព័ត៌មានពីទីក្រុងឡុងដ៍ថា លោករំពឹងមុតមាំថា ជំនួបទ្វេភាគីរវាងលោកនិងលោក ពូទីន នឹងមានផ្លែផ្កា ហើយ វាក៏នឹងជួយឲ្យការជជែកគ្នាលើកិច្ចព្រមព្រៀងសន្តិភាពក្រោយសង្គ្រាមលើកទី២មានការវិវត្តទៅមុខ។ មិនត្រឹមតែប៉ុណ្ណោះ វាក៏ជួយត្រួសត្រាយផ្លូវសម្រាប់ការចរចាគ្នាដោះស្រាយជម្លោះកោះ Kuril ផងដែរ។

លោក អាបេ បានថ្លែងថា៖«វាជារឿងមិនធម្មតាឡើយ ក្នុងរយៈពេលជាង៧០ឆ្នាំ ពោលគឺចាប់តាំងពីសង្គ្រាមលោកលើកទី២ មក ជប៉ុននិងរុស្ស៊ី មិនដែលបានបង្កើតកិច្ចព្រមព្រៀងសន្តិភាពរួមគ្នា»។

តាំងពីចប់សង្គ្រាមលោកលើកទី ២ ប្រទេសទាំងពីរមិនដែលមានកិច្ចព្រមព្រៀងសន្តិភាពរួមគ្នាឡើយ។ដែលនេះជាបញ្ហាសម្រាប់ប្រទេសមហាអំណាចទាំងពីរដែរ ហើយណាមួយការបង្កើនសកម្មភាពរបស់រុស្ស៊ីនៅលើកោះជម្លោះក៏ជាបញ្ហារសើបនិងធ្វើឲ្យភាគីប្រឈមមុខគ្នាដែរ។ យ៉ាងណាមិញ នេះជាលើកទី ១៣ ហើយលោក អាបេនិងលោក ពូទីន ជួបពិភាក្សាគ្នា ហើយលោក អាបេ យល់ថា ការជួបជជែកគ្នាដោយផ្ទាល់នេះហើយជាឱកាសសម្រាប់គូភាគីដោះស្រាយបញ្ហា។

សូមទាញការចាប់អារម្មណ៍បន្តិចដែរ ទំនាក់ទំនងរវាងរុស្ស៊ី និងជប៉ុន ធ្លាក់ចុះខ្លាំងតាំងពីសម័យក្រោយសង្គ្រាមលោកលើកទី២ ម្ល៉េះ។ ពោលគឺក្រោយពេលដែលកងទ័ពសូវៀតកាន់កាន់កោះចំនួននៅភាគខាងត្បូងនៃប្រជុំកោះ Kuril ។

ដោយឡែក លោក អាបេ ក៏បានលើកឡើងពីរឿងរ៉ាវមួយចំនួនដែលភាគីទាំងពីរ ជប៉ុននិងរុស្ស៊ីមិនអាចរកមូលដ្ឋានរួមគ្នាឃើញ។ ក្នុងនោះមានបញ្ហាសន្តិសុខអន្តរជាតិដូចជាសង្គ្រាមស៊ីរី ជម្លោះអ៊ុយក្រែន និងបញ្ហានុយក្លេអ៊ែរផង។ តែលោក អាបេ ក៏សង្ឃឹមថា ជប៉ុននិងរុស្ស៊ីអាចនឹងធ្វើការរួមគ្នា និងភ្ជាប់ទំនាក់ទំនងរួមគ្នាឲ្យជិតស្និទ្ធដើម្បីដោះស្រាយបញ្ហាទាំងនេះ។ ស្របពេលជាមួយគ្នានោះ លោក អាបេក៏បានឆ្លៀតឱកាសលើកឡើងផងដែរថា រដ្ឋាភិបាលលោកឮ ត្រៀមស្វាគមន៍លោក វ្ល៉ាឌីមៀ ពូទីន បើសិនជាមានទស្សនកិច្ចរបស់លោកមកកាន់ប្រទេសជប៉ុននៅពេលខាងមុខ៕