ថៃទំនងជាកម្ទេចប្រាសាទព្រះវិហារសិប្បនិម្មិតចោល ព្រោះខ្លាចប៉ះពាល់ដល់កម្ពុជា

អន្តរជាតិ

ថៃទំនងជាកម្ទេចប្រាសាទព្រះវិហារសិប្បនិម្មិតចោល ព្រោះខ្លាចប៉ះពាល់ដល់កម្ពុជា

06, May 2016 , 8:19 pm

រូបភាព

ដោយ: តន ចាន់រិទ្ធារ៉ា

ប្រភពពីយោធាថៃបានបញ្ជាក់ថា ប្រាសាទព្រះវិហារសិប្បនិម្មិតដែលទើបកសាងលើទឹកដីថៃ ទំនងជាត្រូវកម្ទេចចោលវិញហើយ ព្រោះខ្លាចធ្វើឲ្យប៉ះពាល់ដល់ទំនាក់ទំនងជាមួយកម្ពុជា ដែលជាម្ចាស់ប្រាសាទពិតប្រាកដ។ វាមានរយៈពេលខ្លីប៉ុណ្ណោះ ក្រោយប្រាសាទសិប្បនិម្មិតទំហំតូចនេះ ត្រូវបានកសាងរួចរាល់កាលពីខែមេសាកន្លងមក។

មន្ត្រីយោធាបាននិយាយថា ប្រាសាទព្រះវិហារសិប្បនិម្មិតនឹងត្រូវវាយចោលវិញ ដើម្បីចៀសវាងទំនាស់ជាមួយភាគីកម្ពុជា។ ការលេចចេញព័ត៌មានបែបនេះគឺ បន្ទាប់ពីអ្នកទេសចរណ៍ទៅកាន់តំបន់ឧទ្យានជាតិ Khao Phra Viharn ដែលមានទីតាំងក្នុងខេត្តស៊ីសាកេត បានរអ៊ូថា ប្រាសាទព្រះវិហារសិប្បនិម្មិតនេះនៅទាន់បើកជាសាធារណៈនៅឡើយទេ បើទោះជាកសាងរួចហើយក៏ដោយ។

កាសែត Bangkok Post បានស្រង់ប្រភពយោធាថា មេបញ្ជាការភូមិភាគ២ថៃលោក Vichai Saejohor បានបញ្ជាឲ្យផ្អាកការបើកចូលទស្សនាប្រាសាទសិប្បនិម្មិតនេះ។ ទាក់ទិននឹងរឿងនេះដែរ មេបញ្ជាការទ័ពជើងគោកថៃលោកឧត្តមសេនីយ៍ Teerachai Nakwanich ក៏បង្ហាញការព្រួយបារម្ភចំពោះការកសាងប្រាសាទ ដែលចម្លងតាមប្រាសាទព្រះវិហារខ្មែរផងដែរ ដោយលោកនិយាយថា ប្រសិនបើកឲ្យចូលទស្សនាមែន វាអាចនឹងប៉ះពាល់ដល់ទំនាក់ទំនងទ្វេភាគី។

ជាមួយគ្នានេះ ក្រសួងការបរទេសថៃក៏បង្ហាញការបារម្ភដូចគ្នាផងដែរ ជាមួយនឹងបញ្ជាក់ពីការលូតលាស់ទៅមុខនៃទំនាក់ទំងថៃ និងកម្ពុជា ហើយគ្មានអ្វីដែល នឹងធ្វើឲ្យខូចខាតទំនាក់ទំនងនេះទេ។

យ៉ាងណាក្ដីប្រភពយោធាថៃក៏ឲ្យដឹងដែរថា មានមន្ត្រីយោធាខ្លះអះអាង ប្រាសាទព្រះវិហារសិប្បនិម្មិតនេះ គឺធ្វើលើទឹកដីថៃ មិនមែនលើតំបន់មានជម្លោះឬតំបន់ត្រួតស៊ីគ្នានោះទេ។ មួយវិញទៀត ការកសាងប្រាសាទដែលមានមាត្រដ្ឋាន១លើ១០ នៃប្រាសាទពិត គឺដើម្បីតែទាក់ទាញទេសចរណ៍ និងសម្រាប់ប្រាប់ប្រជាជនពីប្រវត្តិសាស្ត្រប៉ុណ្ណោះ។

យោធាថៃក៏និយាយដែរថា នេះមិនមែនជាលើកទីមួយទេ ដែលក្រុមយោធាថៃប្រចាំខេត្តស៊ីសាកេត កសាងប្រាសាទចម្លងបែបនេះ។ ប៉ុន្មានឆ្នាំមុន យោធាថៃក៏ធ្លាប់កសាងប្រាសាទចម្លងពីកម្ពុជាផងដែរ ហើយភាគីកម្ពុជាក៏មិនដែលតវ៉ាអ្វីដែរ។ ប៉ុន្តែចំពោះករណីនេះ យោធាថៃត្រូវបានណែនាំឲ្យហ៊ុមព័ទ្ធប្រាសាទព្រះវិហារចម្លងនេះ មុននឹងកម្ទេចចោល៕