៤១ឆ្នាំក្រោយចប់សង្គ្រាម ឡាវនៅតែរងគ្រោះដោយគ្រាប់មិនទាន់ផ្ទុះទម្លាក់ដោយអាមេរិក

អន្តរជាតិ

នយោបាយអន្តរជាតិ

៤១ឆ្នាំក្រោយចប់សង្គ្រាម ឡាវនៅតែរងគ្រោះដោយគ្រាប់មិនទាន់ផ្ទុះទម្លាក់ដោយអាមេរិក

07, May 2016 , 11:25 am

រូបភាព

ដោយ: តន ចាន់រិទ្ធារ៉ា

មកទល់ពេលនេះ មានអស់រយៈពេល៤១ឆ្នាំមកហើយដែលសង្គ្រាមវៀតណាមត្រូវបានបញ្ចប់ ប៉ុន្តែអ្វីដែលនៅតែបន្តជាបញ្ហានោះ គឺគ្រាប់មិនទាន់ផ្ទុះរាប់លានគ្រាប់ ដែលទម្លាក់ដោយទាហានអាមេរិកលើទឹកដីឡាវ។ ជាមួយនឹងចំនួនសន្ធឹកសន្ធាប់នេះ គ្រាប់មិនទាន់ផ្ទុះតិចជាងមួយភាគរយប៉ុណ្ណោះ ដែលត្រូវបានដោះ និងកម្ទេច។

ដោយសារតែមានភូមិសាស្ត្រជាប់នឹងវៀតណាម ឡាវរងការទម្លាក់គ្រាប់បែកយ៉ាងខ្លាំងពីសំណាក់កងទ័ពអាមេរិក ដែលព្យាយាមកម្ចាត់ក្រុមកុម្មុយនីស្ត លាក់ខ្លួនលើទឹកដីឡាវ។ គ្រាប់បែកជាច្រើនលានតោន ត្រូវបានទម្លាក់ ដែលបន្សល់ទុកនូវសោកនាដកម្មច្រើនអនេកដល់ប្រជាជនឡាវ នោះគឺសំណល់គ្រាប់មិនទាន់ផ្ទុះ រាយប៉ាយពេញទឹកដីប្រទេសនេះ។

៤១ឆ្នាំកន្លងផុតទៅ ចំនួនមិនដល់មួយភាគរយទេនៃគ្រាប់មិនទាន់ផ្ទុះទាំងនោះ ត្រូវបានកម្ទេច ប៉ុន្តែពេលនេះ អាមេរិកកំពុងជួយរដ្ឋាភិបាលឡាវ ដើម្បីកម្ទេចគ្រាប់ចោល។ ចំនួនអ្នកស្លាប់ និងរបួសដោយសារគ្រាប់មិនទាន់ផ្ទុះ ថយចុះគួរឲ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយ ខណៈដែលអាមេរិកបង្កើនជំនួយលើការបោសសម្អាត។ យោងតាមអាជ្ញាធរឡាវ ចំនួនអ្នកគ្រោះថ្នាក់ធ្លាក់ចុះពីចំនួណ៣០២នាក់ក្នុងឆ្នាំ២០០៨ មកត្រឹម៤០នាក់ក្នុងឆ្នាំ២០១៥។ ខណៈបីខែដើមឆ្នាំ២០១៦ មានត្រឹមពីរករណីប៉ុណ្ណោះ។

ចាប់តាំងពីឆ្នាំ២០១០មក អាមេរិកបានបង្កើនបរិមាណជំនួយពី៥លានដុល្លារ ដល់១៥លានដុល្លារ ហើយក្នុងពេលទស្សនកិច្ចរបស់រដ្ឋមន្ត្រីការបរទេសអាមេរិក John Kerry នៅឡាវក្នុងខែមករា អាមេរិកកំពុងពិចារណាបន្ថែមជំនួយទៀត។ ស្ថានទូតអាមេរិកប្រចាំក្រុងវៀងច័ន្ទន៍បានប្រាប់ទីភ្នាក់ងារព័ត៌មាន IRIN ថា ប្រធានាធិបតី អូបាម៉ា ក៏ឯកភាពហើយដែរ។
បច្ចុប្បន្ននេះ សភាអាមេរិកសម្រេចផ្ដល់១៩.៥លានដុល្លារក្នុងថវិកាប្រចាំឆ្នាំ ហើយនេះមានន័យថា ប្រសិនបើលោក អូបាម៉ា ប្រកាសបង្កើនមែននោះ វានឹងច្រើនជាងបរិមាណឥឡូវនេះ។

ការបង្កើនជំនួយលើការដោះមីននិងគ្រាប់មិនទាន់ផ្ទុះ គឺជាសកម្មភាពលាងជម្រះអតីតកាលរបស់អាមេរិក ដែលទម្លាក់គ្រាប់ជាច្រើនលានតោននៅឡាវ។ ចន្លោះឆ្នាំ១៩៦៤ដល់ឆ្នាំ១៩៧៣ ទាហានអាមេរិកធ្វើសង្គ្រាមសម្ងាត់ដោយមិនប្រាប់សភា ជាមួយនឹងការទម្លាក់គ្រាប់ច្រើនជាងពីរលានតោនលើទឹកដីឡាវ។ បើតាមទិន្នន័យរដ្ឋាភិបាលឡាវ មួយភាគបីនៃចំនួនគ្រាប់ទាំងអស់មិនបានផ្ទុះ ហើយសម្លាប់មនុស្សជិតបីម៉ឺនាក់ ខណៈដែលមនុស្សជាងពីរម៉ឺននាក់របួស។

យ៉ាងណាមិញ រដ្ឋាភិបាលអាមេរិក ជួយត្រឹមតែ៣.២លានដុល្លារប៉ុណ្ណោះសម្រាប់ការបោសសម្អាត ចាប់ពីឆ្នាំ១៩៩៥ ដល់ឆ្នាំ២០១៣។ ប៉ុន្តែនៅក្រោមអាណត្តិប្រធានាធិបតីអូបាម៉ា ជំនួយបានកើនជាលំដាប់ ដោយសភាសម្រេចផ្ដល់យ៉ាងតិច៥លានដុល្លារប្រចាំឆ្នាំក្នុងឆ្នាំ២០១០។ គេរំពឹងដែរថា អាមេរិក នឹងបង្កើនជំនួយប្រចាំឆ្នាំឲ្យដល់២៥លានដុល្លារ។

គេត្រូវការពេលយូរទៅទៀតក្នុងការបោសសម្អាតគ្រាប់មិនទាន់ផ្ទុះរាប់លានតោន ដើម្បីឲ្យឡាវក្លាយជាប្រទេសមិនមានគ្រោះថ្នាក់ដោយសារគ្រាប់ទាំងនេះ។ នេះមានន័យថា រដ្ឋាភិបាលអាមេរិកគួរតែប្ដេជ្ញាចិត្តរយៈពេលវែង និងមាននិរន្តរភាព ក៏ដូចជាបង្កើនប្រាក់ជំនួយ សម្រាប់ប្រជាជនឡាវ ដែលរងគ្រោះដោយសារអំពើរបស់ខ្លួនពីអតីតកាល៕