អន្តរជាតិ
នយោបាយអន្តរជាតិ
សមាជបក្សកូរ៉េខាងជើង ផ្តោតសំខាន់លើសមិទ្ធផលនុយក្លេអ៊ែរ
× គណបក្សពលករកូរ៉េខាងជើង បានចាប់បើកសមាជលើកទី៧ ជាលើកដំបូងក្នុងរយៈពេល៣៦ឆ្នាំនៅថ្ងៃ ម្សិលមិញ ក្រោមអធិបតីភាពរបស់ប្រធានាធិបតីវ័យក្មេងកូរ៉េខាងជើង និងជាប្រមុខបក្សកាន់អំណាច លោកគីម ជុងអ៊ុន។ នាថ្ងៃចាប់ផ្តើមនៃសមាជបក្សនោះផ្តោតសំខាន់លើយុទ្ធសាស្ត្រធ្វើឲ្យប្រទេសរឹងមាំ និងសមិទ្ធផលអាវុធបរមាណូ។
នៅចំពោះមុខសមាជិកបក្សប្រមាណ៣០០០នាក់នៃសមាជថ្ងៃទី០៦ខែឧសភាលេខាធិការបក្សពលករលោកគីម ជុងអ៊ុន បានថ្លែងបើកកម្មវិធីដោយផ្តោសំខាន់សមិទ្ធផលនៃការអភិវឌ្ឍន៍កម្មវិធីនុយក្លេអ៊ែរ។ លោក ថ្លែងថាសមិទ្ធផលនៃការបាញ់នុយក្លេអ៊ែរនៅដើមឆ្នាំ២០១៦ បានបង្ហាញយ៉ាងច្បាស់ទៅកាន់ពិភពលោកថាទណ្ឌកម្ម និងសម្ពាធពីខាងក្រៅ មិនមែនជាអ្វីដែលកូរ៉េខាងជើងត្រូវភិតភ័យនោះទេ។
ប្រមុខបក្សរូបនោះ បានសរសើរចំពោះអ្នកវិទ្យាសាស្ត្រដែលបង្កើតនូវអភូតប្រវត្តិសាស្ត្រសម្រាប់ប្រ ទេសជាមួយសំឡេងដ៏អស្ចារ្យនៃគ្រប់បែកបរមាណូដ៏មានឥទ្ធិពលជាលើកដំបូង។ នេះបើយោងតាមភ្នាក់ងារព័ត៌មាន Reuters ដែលបានបន្ថែមដែរថា លោក បានសង្កត់ធ្ងន់ថា ការបាញ់សាកល្បង និង ការដំណើរការនូវគ្រាប់រ៉ុក្កែតចម្ងាយឆ្ងាយកាលពីខែមុនកន្លងទៅ បានបង្ហាញយ៉ាងច្បាស់ទៅកាន់ពិភព លោក ទាំងមូលពី «អំណាចដែលមិនអាចផ្តួល និងមិនអាចបញ្ចប់បាន តាមរយៈសម្ពាធ និងទណ្ឌកម្ម ដោយកងកម្លាំងរបស់គូសត្រូវ»។
អ្វីដែលជារឿងគួរឲ្យភ្ញាក់ផ្អើលនោះ កូរ៉េខាងជើង ដែលត្រូវបានគេស្គាល់ថាជារដ្ឋផ្តាច់ការ និង មានការរឹតត្បិតខ្លាំងនោះ ក៏បានអញ្ជើញអ្នកសារព័ត៌មានបរទេសប្រមាណ១០០នាក់នាព្រឹត្តិការណ៍នោះដែរ។ តែ ក្រុមអ្នកសារព័ត៌មានទាំងនោះ មិនត្រូវបានអនុញ្ញាតឲ្យចូលទៅក្នុងវិមាន April 25 House of Culture នោះទេ។ វិមាន April 25 House of Culture គឺជាទីកន្លែងដែលអតីតមេដឹកនាំកំពូលកូរ៉េខាងជើងប្រារព្ធសមាជបក្សចុងក្រោយនៅឆ្នាំ១៩៨០។
បើទោះបីជារបៀបវារៈពិតប្រាកដនៃសមាជមិនត្រូវបានបង្ហាញជាសាធារណៈក៏ដោយ គេរពឹងថា ក្រៅពីការផ្តោតសំខាន់លើកម្មវិធីអាវុធនុយក្លេអ៊ែរ សមាជបក្សក៏នឹងលើកពីការរុះរើមន្ត្រីជាន់ខ្ពស់ និង មន្ត្រីរដ្ឋាភិបាល ដែលរាប់បញ្ចូលទាំងសមាជិកមជ្ឈិមបក្សផងដែរនោះ។ ជាពិសេសនោះ សមាជ ក៏នឹងបង្ហាញគោលនយោបាយថ្មីទាក់ទងនឹងការអភិវឌ្ឍសេដ្ឋកិច្ច ទំនាក់ទំនងអន្តរកូរ៉េ ដ្បិតកូរ៉េខាងជើង មិនត្រឹមតែរងទណ្ឌកម្មពីសហគមន៍អន្តរជាតិប៉ុណ្ណោះនោះទេ តែថែមទាំងរដ្ឋជិតខាងបងប្អូនបង្កើតខ្លួនឯងទៀតផង។
សូមរម្លឹកផងដែរថា ក្រុមប្រឹក្សាសន្តិសុខអង្គការសហប្រជាតិនៅថ្ងៃទី០២ ខែមីនាបានអនុម័តជាឯកច្ឆ័នលើសេចក្តីសម្រេចថ្មីមួយទៀតប្រឆាំងសកម្មភាពដ៏គឃ្លើនរបស់កូរ៉េខាងជើងក្នុងការបាញ់សាកល្បងគ្រាប់បែកមីស៊ីលតាំងពីឆ្នាំ២០១៤ និង២០១៥ និងជាពិសេសនោះការបាញ់គ្រាប់បែកបរមាណូនៅថ្ងៃទី០៦ ខែមករា និងនៅថ្ងៃទី០៧ ខែកុម្ភៈ ឆ្នាំ២០១៦នេះ។ សេចក្តីសម្រេចលេខ២២៧០ ដែលបានបញ្ញាត្តិ៥២ចំណុចនោះ ត្រូវបានចាត់ទុកថាជាទណ្ឌកម្មមួយដ៏ធ្ងន់ធ្ងរបន្ថែមលើទណ្ឌកម្មដែលបានអនុម័តដោយក្រុមប្រឹក្សាសន្តិសុខកន្លងមក៕
© រក្សាសិទ្ធិដោយ thmeythmey.com