អន្តរជាតិ
ប្រធានាធិបតីមីយ៉ាន់ម៉ា បំពេញទស្សនកិច្ចក្រៅប្រទេសលើកដំបូងទៅកាន់ឡាវ
× ប្រធានាធិបតីថ្មីមីយ៉ាន់ម៉ា លោក ធិន ច អមដំណើរដោយរដ្ឋមន្ត្រីបរទេស និងជាទីប្រឹក្សារដ្ឋលោកស្រី អ៊ុងសាន ស៊ូជី បានបំពេញទស្សនកិច្ចសុឆន្ទៈរយៈពេលមួយថ្ងៃ នៅថ្ងៃទី០៦ ខែឧសភា ម្សិលមិញ ទៅកាន់ប្រទេសឡាវតាមការអញ្ជើញរបស់លោកប្រធានាធិបតីឡាវ ប៉ុនញ៉ាង វូរ៉ាចិត។
ទស្សនកិច្ចរបស់លោក ធិន ច និងលោកស្រី អ៊ុងសាន ស៊ូជីទៅកាន់ប្រទេសឡាវដែលឆ្នាំនេះគឺជាប្រធា នវិលជុំរបស់អាស៊ានផងដែរនោះ គឺជាលើកដំបូងហើយដែលប្រមុខដឹកនាំកំពូលមីយ៉ាន់ម៉ាបានចាក ចេញក្រៅប្រទេសគិតចាប់តាំងពីឡើងកាន់អំណាចមក។
បើយោងតាមសេចក្តីថ្លែងការណ៍របស់ក្រសួងការបរទេសឡាវ រដ្ឋាភិបាលមីយ៉ាន់ម៉ា និងឡាវ បានព្រមព្រៀងគ្នាក្នុងការធ្វើកិច្ចសហប្រតិបត្តិការស៊ីជម្រៅជាមួយគ្នាលើផ្នែកពាណិជ្ជកម្ម វិនិយោគ អប់រំ និង ទេសចរណ៍។ ជាពិសេសនោះ ភាគីទាំងពីរ ក៏គ្រោងនឹងបង្កើតជើងហោះហើរដោយផ្ទាល់រវាង ទីក្រុងនៃប្រទេសទាំងពីរផងដែរ។
តាមពិតទៅ ដំណើរទស្សនកិច្ចរបស់ប្រមុខដឹកនាំកំពូលមីយ៉ាន់ម៉ាទៅកាន់ឡាវ ក៏ជាឱកាសមួយនៃការណែនាំខ្លួនរវាងមេដឹកនាំទាំងពីរ ដ្បិត ប្រទេសទាំងពីរសុទ្ធសឹងទើបតែជ្រើសរើសមេដឹកនាំថ្មី។
លោក ធិន ច បានឡើងកាន់អំណាចជាប្រធានាធិបតីថ្មីមីយ៉ាន់ម៉ានៅថ្ងៃទី០១ខែមេសា បន្ទាប់ជ័យជម្នះភ្លុកទឹកភ្លុកដី នៃបក្សសម្ព័ន្ធជាតិដើម្បីប្រជាធិបតេយ្យនៅចុងឆ្នាំ២០១៥។ រីឯលោក ប៉ុនញ៉ាង វូរ៉ាចិតដែលជាអគ្គលេខាធិការបក្សកុម្មុយនីស្តឡាវ បានឡើងកាន់តំណែងជាប្រធានាធិបតីនៅថ្ងៃទី២០ ខែមេសាកន្លងទៅផងដែរ៕
© រក្សាសិទ្ធិដោយ thmeythmey.com