យូណេស្កូបើកពិព័រណ៍កម្ពុជា និងសង្គ្រាមលោកលើកទី១ នៅសារមន្ទីរជាតិ

ជាតិ

យូណេស្កូបើកពិព័រណ៍កម្ពុជា និងសង្គ្រាមលោកលើកទី១ នៅសារមន្ទីរជាតិ

07, May 2016 , 6:59 pm

រូបភាព

ដោយ:

ភ្នំពេញ៖ អង្គការវប្បធម៌ UNESCO (The United Nations Educational, Scientific and Cultural Organization) ប្រចាំកម្ពុជា បានបើកពិព័រណ៍ក្រោមបប្រធានបទ កម្ពុជា និងសង្គ្រាមលោកលើកទីមួយ «បេតិកភណ្ឌក្រោមទឹក» ដើម្បីបង្ហាញអំពីតួនាទីកម្ពុជាក្នុងអំឡុងសង្គ្រាមលោកលើកទីមួយ។ ការតាំងពិព័រណ៍នេះ ប្រព្រឹត្តឡើង ចាប់ពីថ្ងៃ៥ ខែឧសភា រហូតដល់ថ្ងៃទី៣០ ខែកញ្ញា ឆ្នាំ២០១៦ នាសារមន្ទីរជាតិកម្ពុជា។

UNESCO បានតាំងរូបថត វីឌីអូ និងឯកសារប្រវត្តិសាស្ត្រជាង ៥០ ពាក់ព័ន្ធនឹងកម្ពុជា ក្នុងដំណាក់សង្គ្រាមលោកលើកទីមួយ។ ម្យ៉ាងទៀត អង្គការវប្បធម៌មួយ មានគោលបំណងបង្ហាញពីសារៈសំខាន់ នៃបេតិកភណ្ឌក្រោមទឹកដែលជាផ្នែកមួយ នៃបេតិកភណ្ឌពិភពលោក បច្ចុប្បន្ន។ ពិព័រណ៍នេះ បង្ហាញពីប្រវត្តិសាស្ត្រសង្គ្រាមលោកលើកទី១ និងការដឹក ជញ្ជូនប្រជាជនតាមកប៉ាល់ពីកម្ពុជាទៅអឺរ៉ុប ដើម្បីចូលរួមសមរភូមិប្រយុទ្ធក្នុងសង្គ្រាមលោក លើកទីមួយ។

លោក ហ្វីលីព ដឺឡង់ អ្នកជំនាញផ្នែកវប្បធម៌នៅអង្គការយូណេស្កូនៅរាជធានីភ្នំពេញ បាននិយាយតាមប្រវត្តិសាស្ត្រថា៖«មនុស្សជាច្រើនមិនដឹងថា ប្រទេសកម្ពុជាបានរួមចំណែកធ្វើសង្គ្រាមលោកលើកទីមួយទេ ប៉ុន្តែនេះជាកាតព្វកិច្ចរបស់ពួកគេ ខណៈពេលដែលប្រទេសកម្ពុជា ស្ថិត ក្រោមអាណាព្យាបាលបារាំង»។

ពិព័រណ៍នេះ រៀបចំឡើងដោយអង្គការយូណេស្កូ ក្រោមកិច្ចសហការជាមួយក្រសួងវប្បធម៌ និងវិចិត្រសិល្បៈ សារមន្ទីរជាតិ សាស្ត្រាចារ្យ សិស្ស និស្សិត នៃសាកលវិទ្យាល័យភូមិន្ទភ្នំពេញ សាកលវិទ្យាល័យភូមិន្ទវិចិត្រសិល្បៈ និងវិទ្យាល័យបារាំង Rene Descartes។

លោក គង់ វីរៈ ប្រធាននាយកដ្ឋានសារមន្ទីរ បានថ្លែងក្នុងពិធីសម្ពោធពិព័រណ៍ នៅថ្ងៃទី៥ ខែឧសភា សង្ឃឹមថា អ្នកចូលរួមទស្សនាទាំងអស់ នឹងស្វែងយល់ពីប្រវត្តិសាស្ត្រ និងព្រឹត្តិការណ៍សំខាន់ៗ នៃសង្គ្រាមលោកលើកទីមួយ ពិសេសគឺ សារសំខាន់នៃសំណល់នានា នៅក្រោមទឹក កាលពីអតីតកាល។

លោកស្រី Anne Lemaistre តំណាងអង្គការយូណេស្កូប្រចាំកម្ពុជា សង្ឃឹមថា ពិព័រណ៍នេះ នឹងបំផុសគំនិតសាធារណជន ឲ្យរួមគ្នាអភិរក្ស និងស្រាវជ្រាវបេតិកភណ្ឌក្រោមទឹកដែល បន្សល់ទុកពីសម័យសង្គ្រាមអតីតកាលបន្ថែមទៀត ដើម្បីបង្ហាញដល់អ្នកជំនាន់ក្រោយ។

ជាមួយគ្នាដែរ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ យល់ថា ពិព័រណ៍នេះ មានសារៈសំខាន់ខ្លាំងណាស់ ព្រោះវាជំរុញយុវជនឲ្យស្វែងយល់ពីគ្រោះមហន្តរាយនៃសង្គ្រាមលោកលើកទីមួយ។ លើសពីនេះ លោកស្រីថា ពិព័រណ៍ នឹងជួយជំរុញយុវជន ឲ្យចូលរួមថែរក្សាសំណល់បេតិកភណ្ឌក្រោមទឹកដែលបន្សលពីសម័យសង្គ្រាមផងដែរ។

លោកស្រីរដ្ឋមន្ត្រី សង្ឃឹមថា ពិព័រណ៍នេះ នឹងបំផុសគំនិតភាគីពាក់ព័ន្ធនានា បង្កើនការអភិរក្សទីតាំងប្រវត្តិសាស្ត្រ ផ្សព្វផ្សាយតម្លៃវប្បធម៌ និងបំផុសគំនិតស្រាវជ្រាវបន្ថែមទៀត ដើម្បីបន្សល់តម្លៃមរតកវប្បធម៌សម្រាប់មនុស្សជំនាន់ក្រោយៗទៀត។

គួរបញ្ជាក់ថា អង្គការយូណេស្កូ បានបង្កើតអនុសញ្ញាតាមក្របខណ្ឌប្រទេសនីមួយៗ ស្តីពី ការការពារបេតិកភណ្ឌក្រោមទឹកនៅហ្នឹងកន្លែង គ្មានការធ្វើអាជីកម្ម ដោះដូរ និងផ្តល់កិច្ចសហប្រតិបត្តិការ ការទទួលស្គាល់សម្រាប់ការងារស្រាវជ្រាវបុរាណវិទ្យាសក្រោមទឹក កាលពីឆ្នាំ ២០០១ ។ ប្រទេសចំនួន ៤៧ រួមទាំង កម្ពុជាផងដែរ បានផ្តល់សច្ចាប័នលើអនុញ្ញានេះ ក្នុងឆ្នាំ ២០០១ ៕