ប្រាំឆ្នាំក្រោយបាត់បង់ ប៊ិនឡាដិន ក្រុមអាល់កៃដានៅតែបន្តឥទ្ធិពលរបស់ខ្លួន

អន្តរជាតិ

នយោបាយអន្តរជាតិ

ប្រាំឆ្នាំក្រោយបាត់បង់ ប៊ិនឡាដិន ក្រុមអាល់កៃដានៅតែបន្តឥទ្ធិពលរបស់ខ្លួន

07, May 2016 , 7:59 pm

រូបភាព

ដោយ: តន ចាន់រិទ្ធារ៉ា

អស់រយៈពេល៥ឆ្នាំមកហើយ ក្រោយពេលដែលប្រមុខដឹកនាំអាល់កៃដា អូសាម៉ា ប៊ិនឡាដិន ត្រូវបានសម្លាប់ដោយកងកម្លាំងពិសេសអាមេរិកក្នុងទឹកដីប៉ាគីស្ថាន។ បន្ទាប់ពីនេះ ក្រុមភេរវករ អាល់កៃដា ហាក់ដូចជាធ្លាក់ដៃបាត់ឥទ្ធិពលទៅលើក្រុមជ្រុលនិយមឥស្លាមមួយទៀតគឺក្រុមរដ្ឋឥស្លាម។ ប៉ុន្តែក្រុមអាល់កៃដា មិនមែនអស់អំណាចទាំងស្រុងនោះទេ។

សហរដ្ឋអាមេរិកបានសងសឹកបានសម្រេចលើក្រុមអាល់កៃដា ដែលនៅពីក្រោយការវាយប្រហារថ្ងៃទី៩ ខែកញ្ញា ឆ្នាំ២០០១ ដោយបានសម្លាប់មេដឹកនាំ អូសាម៉ា ប៊ិនឡាដិន ក្នុងប្រតិបត្តិការសម្ងាត់លើទឹកដីប៉ាគីស្ថាន។ ការបាត់បង់ អូសាម៉ា ប៉ះពាល់យ៉ាងខ្លាំងដល់ក្រុមជ្រុលនិយមអាល់កៃដា ដែលតែងធ្វើសកម្មភាពភេរវកម្មនៅស្ទើរទូទាំងពិភពលោក។ បើទោះជាថមថយសកម្មភាពក៏ដោយ មិនមែនមានន័យថា ក្រុមនេះអស់ឥទ្ធិពលទាំងស្រុងនោះទេ។

ក្រុមជ្រុលនិយមរដ្ឋឥស្លាមបានឡើងឈរលើក្រុមអាល់កៃដា ជាក្រុមដែលបង្កការភ័យខ្លាចដល់ពិភពលោក។ ប៉ុន្តែអាល់កៃដា នៅតែមានសមត្ថភាពគំរាមកំហែង និងធ្វើសកម្មភាពភេរវកម្មដដែល។ ជាក់ស្ដែង ការវាយប្រហារលើកាសែតបារាំង Charlie Hebdo ក្នុងក្រុងប៉ារីស និងការវាយប្រហារជាបន្តបន្ទាប់នៅអាហ្វ្រិកខាងលិច ជាភស្តុតាងបង្ហាញថា អាល់កៃដា នៅតែជាក្រុមមានឥទ្ធិពល និងគ្រោះថ្នាក់ដដែល។ ជាមួយគ្នានេះ ក្រុមអាល់កៃដា ឆក់ឱកាសជម្លោះនៅស៊ីរី និងយេម៉ែន ដោយបានការកាន់កាប់ទឹកដីមួយចំនួននៅទីនោះ។

យ៉ាងណាក្ដី មកត្រឹមពេលកងកម្លាំងពិសេសអាមេរិកសម្លាប់ ប៊ិន ឡាដិន ក្នុងខែឧសភា ឆ្នាំ២០១១ ក្រុមអាល់កៃដា ដែលត្រូវបង្កើតក្នុងទសវត្សរ៍ឆ្នាំ៨០ គឺបែកបាក់ខ្លាំងណាស់ទៅហើយ ខណៈដែលសកម្មជនរបស់ខ្លួន និងមេដឹកនាំមួយចំនួនត្រូវបានសម្លាប់ឬចាប់ខ្លួនដោយអាមេរិក។ ការបែកបាក់នៅតែបន្ត នៅពេលដែលមេដឹកនាំថ្មី Ayman al-Zawahiri ស្នងតំណែង ប៊ិន ឡាដិន ហើយសាខាមួយរបស់ក្រុមនេះ ក៏ទៅបង្កើតក្រុមជ្រុលនិយមរដ្ឋឥស្លាម។

បន្ទាប់ពីបង្កើត ក្រុមនេះក៏ហៅខ្លួនឯងថា រដ្ឋឥស្លាមនៅស៊ីរី និងអ៊ីរ៉ាក់ (ISIS) ឬរដ្ឋឥស្លាម (IS) បង្កព្យុះភ្លៀងយ៉ាងខ្លាំង ដោយកាន់កាប់ទឹកដីជាច្រើនរបស់ស៊ីរី និងអ៊ីរ៉ាក់។ ពីពេលនោះមក ក្រុមនេះកើនឥទ្ធិពលលើសលប់លើក្រុមអាល់កៃដា ហើយថែមទាំងទាក់ទាញបានអ្នកប្រយុទ្ធជាច្រើនមកចូលរួមជាមួយទៀតផង។ លើសពីនេះ ក្រុមនេះក៏នៅពីក្រោយការវាយប្រហារភេរវកម្មជាច្រើននៅ បារាំង បែលហ្ស៊ិក លីប៊ី អេហ្ស៊ីប យេម៉ែន ជាដើម។

បើទោះជាបាត់បង់ទឹកដីមួយភាគទៅក្រុមរដ្ឋឥស្លាម និងធ្លាក់ចុះឥទ្ធិពលក្ដី មិនមែនមានន័យថា អាល់កៃដាបាត់សូន្យនោះទេ។ អាល់កៃដា នៅតែរក្សាឥទ្ធិពលរបស់ខ្លួននៅតាមតំបន់មួយចំនួននៅទ្វីបអាហ្វ្រិកខាងជើង និងតំបន់មួយចំនួនក្នុងទឹកដីស៊ីរី និងយេម៉ែន។ នៅស៊ីរី ក្រុមរណសិរ្ស Al Nusra នៅមានសមត្ថភាពប្រយុទ្ធជាមួយកងកម្លាំងលោក អាសាដ និងកាន់កាប់ទឹកដីមួយផ្នែកដែរ។

ចំណែកនៅយេម៉ែនវិញ សាខាក្រុមអាល់កៃដា ក៏បានគ្រប់គ្រងទឹកដីជាច្រើនផងដែរ ខណៈកងកម្លាំងឧទ្ទាមហ៊ូធី និងទាហានរដ្ឋាភិបាលកំពុងប្រយុទ្ធគ្នានោះ។ នៅឯអាហ្វ្រិកខាងជើងវិញ សាខាក្រុមអាល់កៃដា តែងវាយប្រហារក្នុងប្រទេសម៉ាលី បួគីណាហ្វាសូ និងកូដឌីវ័រ ជាដើម។

ជាមួយនឹងការបន្តសកម្មភាពមិនឈប់បែបនេះ បង្ហាញថា ថ្វីដ្បិតតែមេដឹកនាំកំពូល អូសាម៉ា ប៊ិនឡាដិន បាត់បង់ជីវិតក៏ដោយ ក៏ក្រុមអាល់កៃដានៅជាក្រុមគ្រោះថ្នាក់ និងខ្លាំងក្លាមួយ ទោះជាធ្លាក់ចុះឥទ្ធិពលខ្លះ ដោយសារការងើបឡើងរបស់ក្រុមរដ្ឋឥស្លាមក៏ដោយ៕