អន្តរជាតិ
នយោបាយអន្តរជាតិ
វៀតណាម ថៃ មីយាន់ម៉ា ឡាវ បានផលប្រយោជន៍ច្រើនក្នុងដំណើរទស្សនកិច្ចរបស់ជប៉ុន
× ដំណើរទស្សនកិច្ចផ្លូវការក្នុងតំបន់អាស៊ីអាគ្នេយ៍របស់រដ្ឋមន្ត្រីការបរទេសជប៉ុន លោក Fumio Kishida បានបញ្ចប់នៅថ្ងៃទី០៦ខែឧសភាម្សិលមិញហើយ។ វត្តមានរដ្ឋមន្ត្រីការបរទេសរូបនេះ បាននាំមកនូវផល ប្រយោជន៍ដែលជាកិច្ចសហប្រតិបត្តិការ និងជំនួយជាច្រើនមកកាន់ប្រទេសនៅក្នុងតំបន់អាស៊ីអាគ្នេយ៍ដែលជាប្រទេសមេគង្គក្រោមនោះ។
រដ្ឋមន្ត្រីការបរទេសជប៉ុន លោក Fumio Kishida បានវិលត្រលប់ទៅកាន់ជប៉ុនវិញហើយបន្ទាប់ពីលោក បានបិទបញ្ចប់ទស្សនកិច្ចផ្លូវការមកកាន់ចិន និងប្រទេសអាស៊ីអាគ្នេយ៍រួមមានថៃ មីយ៉ាន់ម៉ា ឡាវ និង វៀតណាម។ ដំណើរទស្សនកិច្ចមុនពេលនៃកិច្ចប្រជុំកំពូលនៃក្រុម G7 ក្នុងក្រុងតូក្យូនេះ បានធ្វើឲ្យរដ្ឋអាស៊ានដែលស្ថិតនៅតំបន់មេគង្គទទួលបានផលប្រយោជន៍ជាច្រើនតាមរយៈគំនិតផ្តួចផ្តើមរបស់ជប៉ុន ។
ក្នុងដំណើរទស្សនកិច្ចទៅកាន់ថៃដែលជាទិសដៅទីមួយក្នុងតំបន់អាស៊ីអាគ្នេយ៍ នៅថ្ងៃទី០២ ខែឧសភាលោករដ្ឋមន្ត្រី Fumio Kishida បានជួបជាមួយនឹងលោកនាយករដ្ឋមន្ត្រីថៃប្រា
យុទ្ធ ច័ន្ទអូចាដើម្បី ជជែកពីបញ្ហានយោបាយ និងសេដ្ឋកិច្ច។ ប្រមុខការការទូតរូបនោះ បានអះអាងនៅក្នុងក្រុងបាងកកថាជប៉ុន នឹងធ្វើការជិតស្និទ្ធជាមួយនឹងបណ្តាប្រទេសក្នុងតំបន់ទន្លេមេគង្គ ហើយ លោកក៏បានប្រកាសដំណើរការគំនិតផ្តួចផ្តួចដែលជាជំនួយរបស់ជប៉ុនក្នុងទំហំ៧ពាន់លានដុល្លារដើម្បីអភិវឌ្ឍហេដ្ឋារចនាសម្ព័ន្ធ និងសេដ្ឋកិច្ចរបស់បណ្តាប្រទេសអាស៊ីអាគ្នេយ៍ផងដែរ។
បន្ទាប់ពីបញ្ចប់ទស្សនកិច្ចនៅក្រុងបាងកក នៅថ្ងៃទី០៣ ខែឧសភា លោករដ្ឋមន្ត្រី Fumio Kishida បានបន្តទស្សនកិច្ចនៅមីយ៉ាន់ម៉ា និងចូលជួបពិភាក្សាជាមួយនឹងសមភាគីរដ្ឋមន្ត្រីការបរទេស និងទីប្រឹក្សារដ្ឋមីយ៉ាន់ម៉ាលោកស្រី អ៊ុងសាន ស៊ូជី។ នាជំនួបនោះ លោករដ្ឋមន្ត្រី Kishida ក៏បានអះអាងដែរថា ជប៉ុន ក៏មានគម្រោងក្នុងការគាំទ្រមីយ៉ាន់ម៉ាលើវិស័យការងារ ការអប់រំ កសិកម្ម ហេដ្ឋារចនាសម្ព័ន្ធ ហិរញ្ញវត្ថុ និងវិស័យជាច្រើនផ្សេងទៀតផងដែរ។ ជាពិសេសនោះ ជប៉ុន ក៏គ្រោងនឹងបង្កើតសាលាវេជ្ជសាស្ត្រនៅមីយ៉ាន់ម៉ានៅពាក់កណ្តាលខែឧសភានេះ ដើម្បីបង្ហាត់បង្រៀនប្រជាជនឲ្យចេះប្រើប្រាស់សម្ភារវេជ្ជសាស្ត្រទំនើបៗផងដែរ។ លោករដ្ឋមន្ត្រី Kishida ក៏បានសង្កត់ធ្ងន់ថា ជប៉ុន នឹងជួយមីយ៉ាន់ម៉ាក្នុងការដំណើរការផ្សះផ្សារជាតិឲ្យអស់ពីលទ្ធភាពដែលអាចធ្វើទៅបាន។
ចាកចេញពីមីយ៉ាន់ម៉ា ប្រមុខការទូតជប៉ុន បានបន្តដំណើរទៅកាន់ឡាវ។ ក្នុងជំនួបជាមួយនឹងនាយករដ្ឋមន្ត្រីឡាវ លោក Thongloun Sisoulith លោករដ្ឋមន្ត្រី Fumio Kishida មិនបានលើកឡើងពីកិច្ចសហប្រតិបត្តិការច្រើននោះទេ តែលោក គ្រាន់តែបញ្ជាក់ពីចេតនារបស់ជប៉ុនក្នុងការធ្វើការជិតស្និទជាមួយ ឡាវដើម្បីកាត់បន្ថយភាពតានតឹងនៃជម្លោះសមុទ្រចិនខាងត្បូង។
បន្ថែមពីនេះ នៅក្នុងទិសដៅចុងក្រោយនៃដំណើរទស្សនកិច្ចក្នុងតំបន់ លោករដ្ឋមន្ត្រី Fumio Kishida បានចូលជួបពិភាក្សាជាមួយនិងសមភាគីវៀតណាមលោក Pham Binh Minh។ ខណៈពេលស្ថានភាពសមុទ្រចិនខាងត្បូងកំពុងតែតានតឹង លោក Fumio Kishida បានសន្យាពង្រឹងកិច្ចប្រតិបត្តិការជាមួយនឹងវៀតណាមដែលជាភាគីនៃជម្លោះផងដែរនោះដើម្បីធានាពីសន្តិសុខដែនសមុទ្រ។ ជាពិសេសនោះ លោកក៏បានបញ្ជាក់ថា ជប៉ុន នឹងផ្តល់នាវាល្បាតដែលប្រើប្រាស់ហើយបន្ថែមលើនាវាល្បាតដែលផ្តល់កាលពីមុន៦គ្រឿងទៅឲ្យវៀតណាមដើម្បីប្រើប្រាស់ក្នុងការពង្រឹងសមត្ថភាពការពារដែនសមុទ្ររបស់វៀតណាម៕
© រក្សាសិទ្ធិដោយ thmeythmey.com