ជាតិ
នយោបាយជាតិ
«យុទ្ធនាការស្លៀកពាក់ខ្មៅ» ក្រសួងមហាផ្ទៃព្រមានចាត់វិធានការណ៍
× ភ្នំពេញ៖ ខណៈក្រុមអង្គការសង្គមស៊ីវិលជាតិ និងអន្តរជាតិ ត្រៀមធ្វើ«យុទ្ធនាការស្លៀកពាក់ខ្មៅ» ដើម្បីទាមទារឲ្យមានដោះលែងមន្ត្រីការពារសិទ្ធិមនុស្ស ក្រសួងមហាផ្ទៃ បានចេញសេចក្តីប្រកាសព័ត៌មានដោយព្រមានប្រើវិធានការណ៍ផ្លូវច្បាប់យ៉ាងតឹងរ៉ឹងប្រឆាំងសកម្មភាពដែលប៉ះពាល់សន្តិភាព ស្ថេរភាពនិងសេចក្តីសុខសាន្តរបស់ពលរដ្ឋទូទៅ។
សេចក្តីប្រកាសព័ត៌មានរបស់ក្រសួងមហាផ្ទៃ ដែលចុះផ្សាយនៅថ្ងៃទី០៨ ខែឧសភា ឆ្នាំ២០១៦ បានសរសេរថា មានក្រុមអង្គការសង្គមស៊ីវិលមួយចំនួនតូច បានធ្វើការផ្សព្វផ្សាយព័ត៌មានបំផុសការញុះញង់ឲ្យមាន«យុទ្ធនាការស្លៀកពាក់ខ្មៅ» ដើម្បីទាមទារឲ្យមានការដោះលែងជនល្មើសមួយចំនួន(មន្ត្រីការពារសិទ្ធិមនុស្ស)ដែលតុលាការកំពុងឃុំខ្លួនជាបណ្តោះអាសន្ន។
សេចក្តីប្រកាសព័ត៌មានដដែលសរសេរបន្តថា រដ្ឋាភិបាលកម្ពុជា តែងចាត់ទុកអង្គការក្រៅរដ្ឋាភិបាល គឺជាដៃគូមិនអាចខ្វះបាន ប៉ុន្តែសកម្មភាពរបស់អង្គការសង្គមស៊ីវិល គឺត្រូវស្ថិតក្រោមក្របខណ្ឌច្បាប់។
សេចក្តីប្រកាសដដែលបានបញ្ជាក់យ៉ាងដូច្នេះ៖«រដ្ឋាភិបាលកម្ពុជា ចាត់ទុកសង្គមស៊ីវិលជាដៃគូ ប៉ុន្តែសកម្មភាពរបស់អង្គការសង្គមស៊ីវិលត្រូវស្ថិតក្នុងក្របខ័ណ្ឌច្បាប់ និងដាច់ខាតមិនត្រូវធ្វើសកម្មភាពណាមួយ ដែលធ្វើឲ្យប៉ះពាល់ដល់សន្តិភាព ស្ថេរភាពនយោបាយ និងសេចក្តីសុខសាន្តរបស់ប្រជាពលរដ្ឋឡើយ»។ សេចក្តីប្រកាសរបស់ក្រសួងមហាផ្ទៃសរសេរបន្ថែមទៀតថា៖«អាជ្ញាធរមានសមត្ថកិច្ចគ្រប់លំដាប់ថ្នាក់នឹងអនុវត្តតួនាទី ភារកិច្ចរបស់ខ្លួន ដើម្បីអនុវត្តច្បាប់ដោយម៉ឺងម៉ាត់ ក្នុងគោលដៅថែរក្សាសន្តិភាព ស្ថេរភាពនយោបាយ សណ្តាប់ធ្នាប់សាធារណៈ និងពង្រឹងនីតីរដ្ឋ ក្នុងក្របខ័ណ្ឌនៃលទ្ធប្រជាធិបតេយ្យ»។
គួរបញ្ជាក់ផងដែរថា ការចេញសេចក្តីប្រកាសរបស់ក្រសួងមហាផ្ទៃនេះ គឺបន្ទាប់ពីការចាប់ខ្លួនមន្ត្រីការពារសិទ្ធិមនុស្ស ពាក់ព័ន្ធនឹងករណីកញ្ញា ស្រីមុំ ហៅ ខុម ចាន់តារ៉ាទី។ ការឃុំខ្លួននេះ ត្រូវបានមជ្ឈដ្ឋានទូទៅ និងអង្គការសង្គមស៊ីវិលជាតិ និងអន្តរជាតិ រិះគន់ថា អយុត្តិធម៌។ ការណ៍នេះ ទើបបណ្តាលឲ្យគំនិតផ្តួចផ្តើមរបស់សង្គមស៊ីវិលមួយចំនួន ដើម្បីធ្វើ«យុទ្ធនាការស្លៀកពាក់ខ្មៅ» ដើម្បីទាមទារឲ្យមានការដោះលែងសកម្មជនសិទ្ធិមនុស្សដែលកំពុងឃុំខ្លួន ដោយតុលាការ។ គួរជម្រាបជូនថា អ្នកដែលកំពុងជាប់ឃុំក្នុងពន្ធធនាគារនោះរួមមាន៖ មន្ត្រីអង្គការសិទ្ធិមនុស្ស អាដហុក៤រូប គឺលោក នី សុខា, លោក យី សុខសាន្ត, លោក ណៃ វង់ដា និងលោកស្រី លឹម មុន្នី ព្រមទាំងអគ្គលេខាធិការរង គ.ជ.ប លោកនី ចរិយាផងដែរ៕
© រក្សាសិទ្ធិដោយ thmeythmey.com