អាមេរិក៖ បុរសម្នាក់លួចកូនសត្វពស់ដាក់ក្នុងខោរបស់ខ្លួន

អន្តរជាតិ

អាមេរិក៖ បុរសម្នាក់លួចកូនសត្វពស់ដាក់ក្នុងខោរបស់ខ្លួន

08, May 2016 , 7:39 pm

រូបភាព

ដោយ: ធីតា

នៅក្រុង St. Petersburg រដ្ឋហ្វ្លរីដា សហរដ្ឋអាមេរិក បុរសម្នាក់ត្រូវបានចាប់ខ្លួនកាលពីសប្តាហ៍កន្លងមក បន្ទាប់ពីគេបានលួចយកកូនពស់មួយក្បាលពីហាងមួយដាក់ចូលហោប៉ៅរបស់ខ្លួន។ សកម្មភាពរបស់ចោររូបនោះ ត្រូវបានបុគ្គលិកហាងមើលឃើញតាមរយៈកាមេរ៉ាសុវត្ថិភាព។

ជនល្មើសឈ្មោះ Travis Treder ត្រូវបានបុគ្គលិកហាងលក់សត្វ Animal House Pet Center នៅតំបន់ Saint Augustine នាំគ្នាព្រួតដៃចាប់ខ្លួន បន្ទាប់ពីពួកគេមើលឃើញសកម្មភាពយុវជនរូបនេះ លួយយកកូនពស់មួយក្បាល ដាក់ចូលក្នុងហោប៉ៅឆ្វេងរបស់ខ្លួន។

កូនពស់ដែល Travis Treder ប៉ុនប៉ងលួចយកនោះ មានតម្លៃប្រមាណ១៥០ដុល្លារអាមេរិក។ លោក Steve Silk ដែលជាម្ចាស់ហាង បានរៀបរាប់ថា ពួកលោកបានលួចសង្កេតតាមដានសកម្មភាពរបស់ Travis អស់២០នាទី នៅមុនដែលគេបានសម្រេចយកពស់ដាក់ចូលហោប៉ៅ។

Travis ព្យាយាមរើបម្រាស់ និងរត់គេចេញពីហាង ប៉ុន្តែបុគ្គលិកហាងនាំគ្នាឃាត់ជាប់នៅមុខទ្វារ។ លោក Steve Silk បានអះអាងថា Travis ជាមុខសញ្ញាចាស់ ដោយបុរសម្នាក់នេះ ធ្លាប់ធ្វើសកម្មភាពលួច២លើករួចមកហើយនារយៈពេល៩ខែចុងក្រោយនេះ ប៉ុន្តែម្ចាស់ហាងមិនបានបញ្ជាក់ថា ចោរប្រើប្រាស់វិធីសាស្ត្រដូចគ្នា ឬយ៉ាងណានោះឡើយ៕