អន្តរជាតិ
លោក អូបាម៉ា នឹងទៅហ៊ីរ៉ូស៊ីម៉ា តែមិនសុំទោសរឿងទម្លាក់គ្រាប់នុយក្លេអ៊ែរឡើយ
× ប្រធានាធិបតីអាមេរិកលោក បារ៉ាក់ អូបាម៉ា នឹងធ្វើដំណើរទៅកាន់ទីក្រុងហ៊ីរ៉ូស៊ីម៉ា ជាទីដែលកងទ័ពអាមេរិកទម្លាក់គ្រាប់បរមាណូកាលពី៧០ឆ្នាំមុន ក្នុងពេលសង្គ្រាមលោកលើកទីពីរ។ លោកនឹងក្លាយជាប្រធានាធិបតីក្នុងតំណែងទីមួយ ដែលធ្វើទស្សនកិច្ចនៅទីក្រុងនោះ ប៉ុន្តែលោកនឹងមិនសុំទោសចំពោះសកម្មភាពពីអតីតកាលនោះទេ។
សូមស្ដាប់ព័ត៌មានលម្អិត៖
សេតវិមានអាមេរិកនិយាយថា ប្រធានាធិបតី បារ៉ាក់ អូបាម៉ា នឹងធ្វើដំណើរទៅក្រុងហ៊ីរ៉ូស៊ីម៉ា នៅថ្ងៃទី២៧ ខែឧសភា ក្នុងពេលដែលលោកស្ថិតក្នុងប្រទេសជប៉ុន ដើម្បីចូលរួមកិច្ចប្រជុំមហាអំណាចទាំង៧ (G7) នៅចុងខែនេះ។ លោកនឹងអមដំណើរដោយនាយករដ្ឋមន្ត្រីជប៉ុន ស៊ីនហ្សូ អាបេ ទៅកាន់ទីដែលអាមេរិកទម្លាក់គ្រាប់បរមាណូក្នុងឆ្នាំ១៩៤៥ ដែលបង្ខំឲ្យជប៉ុនចុះចាញ់សង្គ្រាម។ យ៉ាងណាក្ដី ការសុំទោសណាមួយចំពោះរឿងនេះ នឹងមិនមាននោះទេ។
ជាមួយនឹងទស្សនកិច្ចនេះ លោកអូបាម៉ា ដែលជាជ័យលាភីណូបែលសន្តិភាពឆ្នាំ២០០៩ នឹងលើកពីជំហររបស់លោកក្នុងការទប់ស្កាត់ការសាយភាយនុយក្លេអ៊ែរ។ ក្នុងសេចក្ដីប្រកាសនៅថ្ងៃទី១០ ខែឧសភា សេតវិមានបញ្ជាក់ដែរថា ខណៈដែលអាណត្តិរបស់លោកនឹងចប់នៅចុងឆ្នាំ២០១៦ លោកអូបាម៉ានឹងបន្តការប្ដេជ្ញាចិត្តក្នុងការរក្សាសន្តិភាពនិងសន្តិសុខពិភពលោក ដែលគ្មាននុយក្លេអ៊ែរ។
សេចក្ដីប្រកាសដដែលបន្តថា លោកអូបាម៉ានឹងមិនរម្លឹកពីការសម្រេចចិត្តប្រើប្រាស់នុយក្លេអ៊ែរ ដើម្បីបញ្ចប់សង្គ្រាមនោះទេ។ ជំនួសមកវិញ ប្រធានាធិបតីរូបនេះនឹងលើកឡើងពីទស្សនវិស័យទៅមុខ ដែលនឹងផ្ដោតលើការអនាគតរួមគ្នា។ នេះក៏ដោយសារតែ លោក អូបាម៉ា កំពុងតែជំរុញឲ្យពិភពលោកទាំងមូលគ្មាននុយក្លេអ៊ែរ ដែលជាអាវុធដ៏មានឥទ្ធិពលឥតគណនា។
ដំណើរទស្សនកិច្ចរបស់លោក បារ៉ាក់ អូបាម៉ា លើកនេះ គឺជាផ្នែកនៃដំណើរនៅអាស៊ីចាប់ពីថ្ងៃទី២១ ដល់ថ្ងៃទី២៨ ខែឧសភា ដែលរួមបញ្ចូលទាំងការចូលរួមប្រជុំG7 នៅជប៉ុន និងធ្វើទស្សនកិច្ចលើកដំបូងទៅកាន់វៀតណាម។ ទស្សនកិច្ចនេះក៏ជាការបញ្ជាក់ម្ដងទៀតពីនយោបាយងាកមកតំបន់អាស៊ីរបស់អាមេរិក បើទោះជាពេលខ្លះ មិនសូវជាច្បាស់លាស់ក៏ដោយ។
ជាមួយគ្នានេះដែរ ទស្សនកិច្ចទៅកាន់ទីក្រុងហ៊ីរ៉ូស៊ីម៉ា ជាសញ្ញាបង្ហាញពីការផ្សះផ្សារវាងអាមេរិកនិងជប៉ុន ប៉ុន្តែលោកអូបាម៉ាហាក់មានការប្រុងប្រយ័ត្នជាមួយដំណើរលើកនេះ។ លោកត្រូវបញ្ជាក់ថា ដំណើរនេះមិនមែនជាការសុំទោសចំពោះការទម្លាក់គ្រាប់នុយក្លេអ៊ែរនោះទេ។ លោក Josh Earnest លេខាធិការព័ត៌មានរបស់លោក អូបាម៉ា ប្រាប់អ្នកព័ត៌មានថា ក្នុងពេលដែលលោក អូបាម៉ា យល់ពីការទទួលខុសត្រូវរបស់អាមេរិកជាប្រទេសតែមួយគត់ដែលប្រើនុយក្លេអ៊ែរ ប្រធានាធិបតីអាមេរិកក៏នឹងនាំមុខគេក្នុងលុបបំបាត់អាវុធនេះដែរ។
សូមរម្លឹកថា នៅថ្ងៃទី៦ ខែសីហា ឆ្នាំ១៩៤៥ ទាហានអាមេរិកបានទម្លាក់គ្រាប់បែកនុយក្លេអ៊ែរលើទីក្រុងហ៊ីរ៉ូស៊ីម៉ា ហើយបានសម្លាប់មនុស្សប្រមាណ១៤ម៉ឺននាក់ ដោយគិតនៅចុងឆ្នាំដដែល។ បីថ្ងៃបន្ទាប់ គ្រាប់បែកនុយក្លេអ៊ែរមួយគ្រាប់ទៀតក៏ត្រូវទម្លាក់នៅណាហ្គាសាគី ដែលបង្ខំឲ្យជប៉ុនចុះចាញ់សង្គ្រាមលោកលើកទីពីរ។ ប្រជាជនអាមេរិកភាគច្រើនគិតថា ការទម្លាក់នេះជារឿងត្រឹមត្រូវ ដើម្បីបញ្ចប់សង្គ្រាម ប៉ុន្តែពលរដ្ឋជប៉ុនគិតថា នេះមិនត្រឹមត្រូវនោះទេ៕
Tag:
បារ៉ាក់អូបាម៉ា
អាមេរិក
ជប៉ុន
© រក្សាសិទ្ធិដោយ thmeythmey.com