ក្រសួងកិច្ចការនារី និងសង្គមស៊ីវិល ជំរុញស្ត្រីឲ្យប្រឡូកចូលវិស័យនយោបាយ

ជាតិ

ក្រសួងកិច្ចការនារី និងសង្គមស៊ីវិល ជំរុញស្ត្រីឲ្យប្រឡូកចូលវិស័យនយោបាយ

11, May 2016 , 8:59 pm

រូបភាព

ដោយ:

ភ្នំពេញ៖ ក្រសួងកិច្ចការនារី អង្គការមិនមែនរដ្ឋាភិបាល និងភាគីពាក់ព័ន្ធ បានជំរុញស្ត្រីឲ្យ ប្រឡូកចូលវិស័យនយោបាយជាមួយនឹងបុរស ដើម្បីដោះស្រាយបញ្ហាដែលស្ត្រីជួបប្រទះ។ យ៉ាងណា សង្គមស៊ីវិលមើលឃើញថា គណបក្សនយោបាយបានរើសអើងស្ត្រីឈរឈ្មោះជាមេដឹកនាំ បើធៀបនឹងបុរស ទោះបីជាពួកគេមានគោលការណ៍លើកកម្ពស់ស្ត្រីក្តី។

លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារីទទួលស្គាល់ថា ស្ត្រីពិតជា ដើរតួនាទីយ៉ាងសំខាន់ក្នុងការអភិវឌ្ឍប្រទេស ពិសេសគឺ ការដោះស្រាយបញ្ហាស្ត្រី ព្រោះពួកគេយល់ច្បាស់ពីបញ្ហាស្ត្រីផ្ទាល់។

រដ្ឋមន្ត្រីក្រសួងការកិច្ចការនារីរបស់រដ្ឋាភិបាល បានថ្លែងក្នុងពិធីបើកការអនុវត្តគម្រោងស្ត្រីក្នុង វិស័យនយោបាយ នៅថ្ងៃទី១១ ឧសភានេះថា រដ្ឋាភិបាល បានដាក់គោលនយោបាយលើកកម្ពស់សិទ្ធិស្ត្រីលើគ្រប់វិស័យ ដើម្បីចូលរួមអភិវឌ្ឍសង្គមជាមួយនឹងបុរស។ លើសពីនេះ លោកស្រី បានផ្តល់យោបល់ដល់ស្ត្រីគ្រប់រូប គួរស្វែងរកការបណ្តុះបណ្តាលសមត្ថភាពជំនាញពួកគេបន្ថែមទៀត ដើម្បីពង្រឹងសមត្ថភាពដឹកនាំក្នុងវិស័យនយោបាយ។ លោកស្រីរដ្ឋមន្ត្រីនារីរូបនេះ ជឿជាក់ថា អ្នកបោះឆ្នោតនឹងមិនគាំទ្រស្ត្រីទេ ប្រសិនបើស្ត្រីពុំមានសមត្ថភាពតស៊ូដោះស្រាយបញ្ហា។

‬
លោកស្រីថ្លែងយ៉ាងដូច្នេះ៖«ស្ត្រីនៅក្នុងវិស័យនយោបាយត្រូវតែចេះចរចា តស៊ូមតិក្នុងការធ្វើ យុទ្ធនាការរបស់ខ្លួន ដើម្បីឲ្យគេបោះឆ្នោតឲ្យយើង...។ អ្នកបោះឆ្នោតមានស្ត្រី និងបុរស តើធ្វើយ៉ាងម៉េចឲ្យស្ត្រីបោះឆ្នោតឲ្យស្ត្រី? កន្លងមក ស្ត្រីខ្លួនឯងនៅមិនមានជំនឿលើស្ត្រីដែល ប្រឡូកចូលក្នុងវិស័យនយោបាយ។ តើមានមូលហេតុអ្វី»?

‬
បន្ថែមលើសពីនេះ លោកស្រី បានអំពាវនាវភាគីពាក់ព័ន្ធទាំងអស់ ឲ្យចូលរួមពិភាក្សាដោះស្រាយបញ្ហាស្ត្រីបន្តទៀត ដើម្បីលើកកម្ពស់សិទ្ធិស្ត្រីលើគ្រប់វិស័យ។

យ៉ាងណា សង្គមស៊ីវិលមើលឃើញថា ស្ត្រីមានសមត្ថភាពដឹកនាំដូចបុរសដែរ តែពួកគេពុំមានឱកាសទទួលបានតំណែងដឹកនាំស្ថាប័ន បច្ចុប្បន្ន។ នាយិកាអង្គការសីលការ អ្នកស្រី ធីតា ឃឹះ ពុំយល់ឃើញដូចលោកស្រីរដ្ឋមន្ត្រីក្រសួងកិច្ចការនារីឡើយ។

‬
ប្រធានអង្គការសីលការ បានប្រាប់អ្នកសារព័ត៌មានថា ស្ត្រីភាគច្រើន ពុំមានឱកាសចូលរួមធ្វើ ការសម្រេចចិត្តនោះទេ ពីព្រោះគណបក្សនយោបាយភាគច្រើន បានដាក់បេក្ខជនភាគច្រើន ជាអ្នកសម្រេចិត្ត។ លោកស្រី បន្តទទួលស្គាល់តាមរយៈការចូលរួមវិស័យនយោបាយថា ស្ត្រីពិតជាដើរតួនាទីសំខាន់ក្នុងការអភិវឌ្ឍប្រទេសលើគ្រប់វិស័យ ដើម្បីធានាឲ្យមានតុល្យភាព និងនិរន្តរភាពរវាងស្ត្រី និងបុរស។

លោកស្រីថ្លែងយ៉ាងដូច្នេះ៖«បញ្ហាប្រឈមរបស់ស្ត្រីក្នុងវិស័យនយោបាយ គឺការរើសអើង។ គ្រប់គណបក្សនយោបាយទាំងអស់ រើសអើងស្ត្រី ដូច្នេះគេត្រូវការវិធានការផ្ទៃក្នុង វិធានការច្បាប់ ដើម្បីធ្វើយ៉ាងណា ផ្តល់ឱកាសដល់ស្ត្រីចូលរួមធ្វើការសម្រេចចិត្ត។ មិនមែនមានន័យថា ស្ត្រីអត់ចេះទេ...។ អ្នកដែលធ្វើការសម្រេចចិត្តថា តើអ្នកណាគេដែលត្រូវដាក់ក្នុងបញ្ជី ហើយ អ្នកណាគេត្រូវដាក់ ក្នុងលំដាប់បញ្ជីលេខមួយ លេខពីរយ៉ោងម៉េច? អ្នកធ្វើការសម្រេចចិត្តអស់នេះ សុទ្ធតែបុរស»។

‬
មិនខុសគ្នាដែរ លោកស្រី ជា ស៊ុនដាណែត នាយិកាប្រតិបត្តិមណ្ឌលព័ត៌មានស្ត្រីកម្ពុជា ទទួល ស្គាល់ថា ស្ត្រី ពិសេសស្ត្រីវ័យក្មេង ពិតជាមានបញ្ហាប្រឈមក្នុងការឈរឈ្មោះបោះឆ្នោត ក្នុងវិស័យនយោបាយ ព្រោះគណបក្សនយោបាយមិនបានដឹងពីសក្តានុពលបេក្ខភាពស្ត្រី។ ម្យ៉ាងទៀត លោកស្រី បន្តថា ស្ត្រីខ្លួនឯងទៀតសោត ពុំមានសមត្ថភាពគ្រប់គ្រាន់ថ្លែងប្រាប់ ពលរដ្ឋពីគោលនយោបាយ ដើម្បីដណ្តើមយកសន្លឹកឆ្នោតពីអ្នកបោះឆ្នោត។

លើសពីនេះ នាយិកាប្រតិបត្តិមណ្ឌលព័ត៌មានស្ត្រីរូបនេះ លើកឡើងថា ប្រព័ន្ធផ្សព្វផ្សាយ កម្រផ្សព្វផ្សាយព័ត៌មានទាក់ទិននឹងការលើកកម្ពស់ស្ត្រីក្នុងវិស័យនយោបាយ ដើម្បីបង្កើនបេក្ខ ភាពស្ត្រីជាតំណាងរាស្ត្រ និងអ្នកដឹកនាំស្ត្រីគំរូ នៅកម្ពុជា។

គួរបញ្ជាក់ថា គម្រោងស្ត្រីក្នុងវិស័យនយោបាយ មានគោលបំណងបង្កើនចំនួនស្ត្រីឲ្យឈរ ឈ្មោះបោះឆ្នោតក្រុមប្រឹក្សាឃុំ/សង្កាត់ឆ្នាំ ២០១៧ និងការបោះឆ្នោតជាតិឆ្នាំ ២០១៨ ខាងមុខ។ គម្រោងនេះ រៀបចំឡើងដោយមណ្ឌលព័ត៌មានស្ត្រីកម្ពុជា អង្គការបន្ទាយស្រី និង អង្គការអភិវឌ្ឍន៍ប្រព័ន្ធផ្សព្វផ្សាយអាល្លឺម៉ង់ ក្រោមជំនួយមូលនិធិពីសហភាពអឺរ៉ុប។ គម្រោងនេះ មានរយៈពេល ៣ឆ្នាំ ចាប់ពីឆ្នាំ២០១៦ ដល់២០១៨ ហើយវានឹងត្រូវដាក់ឲ្យអនុវត្តក្នុងខេត្តចំនួន ៣ គឺខេត្តកំពង់ធំ បាត់ដំបង និងខេត្តសៀមរាប៕