អន្តរជាតិ
ថៃ ៖ សាកលវិទ្យាល័យវេជ្ជសាស្ត្រមួយលុបចោលការប្រឡង ដោយសារបច្ចេកវិទ្យាខ្ពស់នៃការចម្លងឯកសារ
× និស្សិតបីនាក់ត្រូវគេចាប់បានកំពុងលួចចម្លងឯកសារក្នុងពេលប្រឡងចូលសាកលវិទ្យាល័យវេជ្ជសាស្ត្រដ៏ល្បីល្បាញមួយនៅប្រទេសថៃ ដែលបានប្រព្រឹត្តទៅកាលពីថ្ងៃទី ៧ - ៨ ឧសភាកន្លងទៅនេះ ដោយប្រើប្រាស់វ៉ែនតាបំពាក់កាមេរ៉ា និងនាឡាដៃភ្ជាប់បណ្តាញអ៊ីនធឺណេត។
និស្សិតទាំងបីនាក់នេះបានប្រើប្រាស់វ៉ែនតាទំនើបនោះដើម្បីថតវិញ្ញាសា រួចផ្ញើទិន្នន័យទាំងនោះទៅឲ្យដៃគូសមគំនិតរបស់ខ្លួនដែលស្ថិតនៅខាងក្រៅបរិវេណមណ្ឌលប្រឡង តាមរយៈនាឡិកាដៃ។ បន្ទាប់មក ដៃគូរបស់ពួកគេបញ្ជូនចម្លើយមកវិញតាមរយៈមធ្យោបាយដូចគ្នានេះ។ បន្ទាប់ពីចាប់បានករណីលួចចម្លងឯកសារតាមបច្ចេកវិទ្យាដ៏ទំនើបនេះ លោក Arthit Ourairat សាកលវិទ្យាធិការនៃសាកលវិទ្យាល័យ Rangsit ដ៏ល្បីល្បាញនេះក៏បានប្រកាសលុបចោលការប្រឡង។ បើតាមរូបលោក ជនសមគំនិតខ្លះគឺជាសាស្ត្រាចារ្យនៃសាលាមួយដែលទទួលបន្ទុករៀបចំការប្រឡងនេះ។ ម្យ៉ាងទៀត លោកបានឲ្យដឹងថា និស្សិតម្នាក់ៗត្រូវបង់ប្រាក់សរុប ៨០ ម៉ឺនបាតដែលស្មើនឹងជាង ២ ម៉ឺនដុល្លារសម្រាប់ការដំឡើងឧបករណ៍ និងថ្លៃឈ្នួលរបស់សាស្ត្រាចារ្យដែលខំជួយក្នុងថ្ងៃប្រឡង បើសិនជាពួកគេទទួលបានជោគជ័យ។
និស្សិតទាំងបីនាក់នេះគ្មានសិទ្ធិប្រឡងចូលសាកលវិទ្យាល័យ Rangsit ទៀតទេ។ ដោយឡែក ការប្រឡងនឹងត្រូវធ្វើឡើងវិញនៅថ្ងៃទី ៣១ ឧសភា និងទី ១ មិថុនាខាងមុខ។ ម្តងនេះ គេនឹងធ្វើការត្រួតពិនិត្យយ៉ាងល្អិតល្អន់ចំពោះបេក្ខជនទាំង ៣ ពាន់នាក់ បើសិនជាពួកគេមានពាក់វ៉ែនតា និងនាឡិកាដៃ។
គួរបញ្ជាក់ថា សាលាវេជ្ជសាស្ត្រគឺជាគ្រឹះស្ថានសិក្សាដ៏ពេញនិយមក្នុងប្រទេស ព្រោះថាគ្រូពេទ្យអាចរកចំណូលបានយ៉ាងច្រើននៅក្នុងវិស័យឯកជន ដោយសារតែពលរដ្ឋនៃប្រទេសជិតខាងធ្វើដំណើរទៅកាន់ប្រទេសថៃ ដើម្បីទទួលយកសេវាសុខាភិបាល៕
© រក្សាសិទ្ធិដោយ thmeythmey.com