ព័ត៍មានសុខភាព
នាយកសហព័ន្ធសមាគមភាពយន្តថៃ ប្រាប់មូលហេតុដែលធ្វើឲ្យថៃជោគជ័យក្នុងវិស័យភាពយន្ត
×![]()
ដោយ: ថ្មីៗ
លោក ឈូកឆៃ ឆៃយ៉ាវ៉ាតូ ដែលជានាយកប្រតិបត្តិសហព័ន្ធសមាគមភាពយន្តថៃ បានថ្លែងនៅក្នុងកម្មវិធី Thai Film Festival នៅសណ្ឋាគារ Sofitel ភ្នំពេញ ឲ្យដឹងថា មូលហេតុដែលធ្វើឲ្យវិស័យភាពយន្តថៃរីកចម្រើនដូចសព្វថ្ងៃ ដោយសារមានការសហការរវាងស្ថាប័នរដ្ឋ និងឯកជនប្រមាណជា ៣០ស្ថាប័ន ដែលទាក់ទងនឹងវិស័យភាពយន្ត ធ្វើការស្រុះដៃគ្នា។
យ៉ាងណា លោក ឈូកឆៃ ឆៃយ៉ាវ៉ាតូ បញ្ជាក់ថា ក្នុងចំណោមនោះ ក្រសួង៤ សកម្មជាងគេក្នុងការលើកកម្ពស់ និងរកទីផ្សារឲ្យភាពយន្តថៃ បានចេញបញ្ចាំងនៅបរទេស។ ក្រសួង៤នោះ មាន ៖
១. ក្រសួងវប្បធម៌៖ គឺតែងតែលើកទឹកចិត្ត ដល់ផលិតករទាំងអស់ឲ្យផលិតរឿងថៃគ្រប់ប្រភេទទាំងអស់។
២. ក្រសួងការបរទេស៖ ក្រសួងនេះ តែងតែបង្កើតកម្មវិធីមហោស្រពភាពយន្តថៃនៅតាមប្រទេសនានាក្នុងពិភពលោក។
៣. ក្រសួងពាណិជ្ជកម្៖ វិលមកក្រសួងពាណិជ្ជកម្មវិញ គឺតែងតែមានទំនាក់ទំនងល្អជាមួយពាណិជ្ជករបរទេសនានា ក្នុងទស្សនវិស័យអូសទាញពួកគេ ឲ្យចូលមកវិនិយោគលើគម្រោងនានាពាក់ព័ន្ធនឹងសិល្បៈភាពយន្តថៃ។
៤. ក្រសួងទេសចរណ៍៖ ដោយឡែក ក្រសួងដែលគ្រប់គ្រងលើឧស្សាហកម្មគ្មានផ្សែងនេះវិញ ក៏មានកិច្ចការទទួលខុសត្រូវលើវិស័យសិល្បៈភាពយន្តរបស់ប្រទេសជិតខាងយើងមួយនេះដែរ។ លោក ឈូកឆៃ ឆៃយ៉ាវ៉ាតូ ប្រាប់ថា ក្រសួងទេសចរណ៍ គឺតែងតែសម្របសម្រួលផ្ដល់ទីតាំងថតដល់ផលិតករទាំងអស់ទូទាំងប្រទេស។
ដោយសារតែមានយន្តការគាំទ្រពីស្ថាប័នពាក់ព័ន្ធនានាខាងលើ នៅក្នុងមួយឆ្នាំៗ ថៃ ផលិតភាពយន្តបានប្រមាណជា៦០រឿងជាប្រភេទដុំ មិននិយាយរឿងភាគឡើយ ហើយបាននាំចេញទៅបរទេសប្រមាណជា៣០រឿងក្នុង១ឆ្នាំ។ និយាយពីចំណូលបានពីការនាំចេញភាពយន្តវិញ គឺបានប្រមាណជា២០លានដុល្លារអាមេរិក ហើយក្នុងនោះនាំចេញមកកម្ពុជាប្រមាណជា ៧០% ៕
ផ្តល់សិទ្ធិដោយ៖www.health.com.kh
© រក្សាសិទ្ធិដោយ thmeythmey.com
