អន្តរជាតិ
នយោបាយអន្តរជាតិ
ឥណ្ឌូនេស៊ីមានគម្រោងទិញនាវាមុជទឹកនិងយន្តហោះពីរុស្ស៊ី
×
រុស្ស៊ីកំពុងរកឃើញទីផ្សារសម្រាប់លក់សព្វាវុធរបស់ខ្លួននៅអាស៊ីអាគ្នេយ៍ ហើយក្នុងកិច្ចប្រជុំកំពូលអាស៊ាន-រុស្ស៊ីនៅ Sochi ចុងខែឧសភាកន្លងទៅ ទាំងឥណ្ឌូនេស៊ី ថៃ ម៉ាឡេស៊ី ឡាវ សុទ្ធតែស្ថិតក្នុងកិច្ចពិភាក្សាជុំវិញការនាំចូលសព្វាវុធពីរុស្ស៊ីដែរ។ ដូចឃើញស្រាប់បច្ចុប្បន្នឥណ្ឌូនេស៊ីកំពុងពិចារណាទិញនាវាមុជទឹកនិងយន្តហោះដើម្បីពង្រឹងវិស័យការពារជាតិរបស់ខ្លួនផងដែរ។
រដ្ឋាភិបាលឥណ្ឌូនេស៊ីបានបង្ហាញចំណាប់អារម្មណ៍ចង់ទិញនាវាមុជទឹកពីសហព័ន្ធរុស្ស៊ីដើម្បីបង្កើនសមត្ថភាពការពារជាតិរបស់ខ្លួន។ ក្រៅពីនាវាមុជទឹក រដ្ឋបងធំអាស៊ានមួយនេះក៏មានគម្រោងទិញយន្តហោះអាចចុះចតលើទឹកបានផងដែរ។ បើតាមមន្ត្រីជាន់ខ្ពស់ឥណ្ឌូនេស៊ី ប្រទេសនេះចង់នាំចូលនាវាមុជទឹកចំនួន ២គ្រឿងសិន។
យោងតាមទីភ្នាក់ងារព័ត៌មានរុស្ស៊ី ឯកអគ្គរដ្ឋទូតឥណ្ឌូនេស៊ីប្រចាំនៅប្រទេសរុស្ស៊ី Mohamad Wahid Supriyadi បានបញ្ជាក់ច្បាស់ថា៖« យើងពិតជាគ្រោងទិញនាវាមុជទឹកនិងយន្តហោះរបស់រុស្ស៊ីមែន។ យើងកំពុងតែចាប់ផ្តើមត្រួតពិនិត្យគម្រោងនាំចូលសពា្វវុធទាំងនេះ ហើយមន្ត្រីជំនាញពាក់ព័ន្ធរបស់រុស្ស៊ីនឹងត្រូវអញ្ជើញមកប្រទេសឥណ្ឌូនេស៊ីពេលខាងមុខ»។
ក្រៅពីមានគម្រោងទិញអាវុធយុទ្ធភ័ណ្ឌរបស់រុស្ស៊ី ក្រុងហ្សាការតា ក៏មានចំណាប់អារម្មណ៍លើកស្ទួយកិច្ចសហប្រតិបត្តិការយោធានិងបច្ចេកទេសជាមួយរុស្ស៊ីដែរនៅពេលខាងមុខនេះ។មន្ត្រីការទូតខាងលើនេះក៏បានឆ្លៀតកោតសរសើរពីផលិតផលឧស្សាហកម្មនិងការពារជាតិរបស់រុស្ស៊ីដែរ ដោយប្រៀបធៀបជាមួយផលិតផលលោកខាងលិច។
« ផលិតផលឧស្សាហកម្មនិងយោធាបស់រុស្ស៊ីមិនចាញ់របស់លោកខាងលិចឡើយ។ វាជារឿងដែលមានតម្លៃមួយដែលត្រូវកត់សម្គាល់លើភាពជោគជ័យនៃកិច្ចសហប្រតិបត្តិការក្នុងផ្នែកយោធានិងបច្ចេកទេសដែលពាក់ព័ន្ធនោះ»។
ក្រៅពីឥណ្ឌូនេស៊ី នាវាមុជទឹករុស្ស៊ីត្រូវបានប្រើប្រាស់និងកុម្ម៉ង់ទិញដោយរដ្ឋាភិបាលវៀតណាមកន្លងមកដែរ ហើយវៀតណាមពេញចិត្តអាវុធរបស់រុស្ស៊ីខ្លាំងផងដែរ។ ប៉ុន្តែក្រោយរួចផុតពីទណ្ឌកម្មអាវុធរបស់អាមេរិក វៀតណាមក៏កំពុងគិតគូរទិញអាវុធពីអាមេរិក បន្ថែមលើអាវុធដែលខ្លួនទិញពីរុស្ស៊ីថែមទៀតផង។
ត្រលប់មកវិញ កន្លងមកឥណ្ឌូនេស៊ីបានចំណាយថវិកាច្រើនដែរដើម្បីអភិវឌ្ឍវិស័យការពារជាតិរបស់ខ្លួន ហើយប្រទេសនេះទិញអាវុធភាគច្រើនពីរុស្ស៊ីក្នុងពេលប៉ុន្មានឆ្នាំនេះ។ កាលពីខែមេសា រដ្ឋាភិបាលក្រុងហ្សាការតា បានចុះកិច្ចព្រមព្រៀងទិញយន្តហោះចម្បាំងស៊េរីថ្មីប្រភេទ Su-35 ចំនួន ១០គ្រឿងជាមួយរដ្ឋាភិបាលក្រុងម៉ូស្គូផងដែរ។ យន្តហោះចម្បាំង Su-35 នេះនឹងមកជំនួសយន្តហោះចម្បាំង F-5 Tigers ដែលកំពុងបម្រើការក្នុងកងទ័ពអាកាសឥណ្ឌូនេស៊ីបច្ចុប្បន្ន។ ហើយម្យ៉ាងយន្តហោះស៊េរីទំនើបចុងក្រោយរបស់រុស្ស៊ីនេះនឹងជួយបង្កើនសមត្ថភាពកងទ័ពនិងពង្រឹងការការពារបូរណភាពដែនដីរបស់ឥណ្ឌូនេស៊ីផងដែរ។
មានការវាយតម្លៃផងដែរថា ការនាំចូលយន្តហោះចម្បាំងរបស់ឥណ្ឌូនេស៊ី កើតឡើងស្របពេលដែលបងធំអាស៊ានមួយនេះចាប់ផ្តើមសាងសង់មូលដ្ឋានទ័ព នៅប្រជុំកោះ Natuna ដែលស្ថិតនៅ សមុទ្រចិនខាងត្បូង។ ថ្វីបើឥណ្ឌូនេស៊ីមិនមែនជាភាគីជម្លោះសមុទ្រចិនខាងត្បូងឡើយ ប៉ុន្តែផែនទីរូបអណ្តាត ឬផែនទី៩ ចំណុច របស់ចិននោះគ្របដណ្តប់លើកោះ Natuna ដែលឥណ្ឌូនេស៊ីចាត់ទុកជារបស់ខ្លួន៕
Tag:
ឥណ្ឌូនេស៊ី
រុស្ស៊ី
Mohamad Wahid Supriyadi
© រក្សាសិទ្ធិដោយ thmeythmey.com