អ្នកនាំពាក្យក្រសួងយុត្តិធម៌ថា បក្សប្រឆាំងចាត់ទុកសំណួររបស់ខ្លួន ជាបាយឡុកបាយឡ

ជាតិ

អ្នកនាំពាក្យក្រសួងយុត្តិធម៌ថា បក្សប្រឆាំងចាត់ទុកសំណួររបស់ខ្លួន ជាបាយឡុកបាយឡ

09, Jun 2016 , 10:47 am

រូបភាព

ដោយ: ម៉ៅ សុផា

លោក គឹម សន្តិភាព អ្នកនាំពាក្យក្រសួងយុត្តិធម៌ បានរិះគន់តំណាងរាស្ត្រគណបក្សសង្គ្រោះជាតិ ថា កំពុងបន្ទាបតម្លៃរបស់ខ្លួនឯង។ ការចំអករបស់លោក គឹម សន្តិភាព បែបនេះ ធ្វើឡើងបន្ទាប់ពីរដ្ឋមន្រ្តីក្រសួងយុត្តិធម៌ បញ្ចប់ការឆ្លើយបំភ្លឺពីការអនុវត្តច្បាប់ នៅអង្គប្រជុំរដ្ឋសភា នាថ្ងៃទី៩ មិថុនានេះ។

ការទិតៀនរបស់លោក គឹម សន្តិភាព ដោយសារតែតំណាងរាស្ត្របក្សប្រឆាំង មិនចូលរួមប្រជុំក្នុងរដ្ឋសភា ដើម្បីស្តាប់ការឆ្លើយបំភ្លឺនូវសំណួរ ដែលខ្លួនលើកសួរទៅកាន់រដ្ឋមន្ត្រីក្រសួងយុត្តិធម៌។
លោក គឹម សន្តិភាព បានថ្លែងទៅកាន់ក្រុមអ្នកសារព័ត៌មានថា គណបក្សបក្សសង្គ្រោះជាតិ មិនត្រឹមតែមិនផ្តល់តម្លៃដល់ខ្លួនឯងនោះទេ តែថែមទាំងមិនផ្តល់តម្លៃដល់ស្ថាប័ននីតិបញ្ញតិ្ត ផងដែរ។

អ្នកនាំពាក្យក្រសួងយុត្តិធម៌រូបនេះបានបញ្ជាក់បែបនេះថា៖«ខ្ញុំយល់ថា អ្វីដែលតំណាងរាស្ត្រទាំង១៦រូប តាំងសំណួរ តែបែរជាមិនមកស្តាប់ គឺពួកគាត់ហាក់បីដូចជាចាត់ទុករឿងនេះជាបាយឡុកបាយឡ។ ក្នុងនាមគាត់ជាតំណាងរាស្រ្ត បែរជាមិនគោរពនូវអ្វីដែលជា សំណួររបស់ខ្លួនដែលបានតាំង»។

ជុំវិញការរិះគន់របស់អ្នកពាំក្យក្រសួងយុត្តិធម៌ខាងលើ សារព័ត៌មានថ្មីៗ មិនអាចទាក់ទងមន្រ្តីបក្សប្រឆាំង ដើម្បីសុំការឆ្លើយតបនោះទេ។

សូមបញ្ជាក់ថា នៅថ្ងៃទី៩ ខែមិថុនានេះ លោក អង្គ វង្សវឌ្ឍនា រដ្ឋមន្រ្តីក្រសួងយុត្តិធម៌ បានដឹកនាំសមាជិករបស់ខ្លួន ចូលឆ្លើយសំណួររបស់តំណាងរាស្រ្តបក្សប្រឆាំង នៅវិមានរដ្ឋសភា។ ប៉ុន្តែ តំណាងរាស្រ្តបក្សប្រឆាំង ដែលតាំងសំណួរ បានធ្វើពហិការមិនចូលប្រជុំនៅក្នុងរដ្ឋសភា។ សំណួរ ដែលតំណាងរាស្រ្តបក្សប្រឆាំង ស្នើឲ្យរដ្ឋមន្ត្រីក្រសួងយុត្តិធម៌ ឆ្លើយបំភ្លឺ គឺទាក់ទងនឹង គោលការណ៍នៃការអនុវត្តក្រមនីតិវិធីព្រហ្មទណ្ទ ពាក់ព័ន្ធនឹងការឃុំខ្លួនបណ្តោះអាសន្ន រួមទាំងគោលការណ៍ច្បាប់មួយចំនួនទៀត៕